¹ Ndakalanga ndabona Mwanambelele ulizhimine a lupili lwa Ziyoni. Wakuli u bantu bali shuulu shili mwaanda u makumi one intwesho shone bakulembelwe izhina lyakwe alimwi iizhina lya Ushi ankumu shabo. ² Ndakatelela izwi livwa kwizeulu lili ukoya kuvuuma kwa meenzhi manji manji alimwi ukuhuluma kwa mvula. Kuvuuma nkwindakatelela kakuli ukoya kalumbu kalizhiwa . ³ Bakaimba lwiimbo lupiya ku chuuna cha bwami alimwi ukumbele lya shilenge shipona shone u basololi. kwiina wakukonzha kuluzhiba lolu lwiimbo chita babo bantu bali shuulu shili mwaanda u makumi one intweso shone balo bakakushiwa kuvwa anshi. ⁴ Baba imbabo babo batakalisofwaazha ku bamakaintu, ukuti balo bakalitantumuna kuvwa ku mamambe. Imbabo bamutobela Mwanambelele kufumbwa nkwaaya. Baba imbabo bakafutulwa akati ka bantu mbuli michelo miaanzhi ya Leza u Mwanambelele. ⁵ Kwiina twaambo twakuchenga twakayanwa mu milomo yabo; baina nibatongaukwa. ⁶ Ndakabona alimwi umwi mungelo ulauluka mwizeulu, wezo wakukwete mulumbe mubotu uteeli kwaamba akambaukile babo bakukakala anshi - ku mashi, mishobo, milaka, ya bantu. ⁷ Wakoompolola iizwi ikando ati, "Nomutiye Leza ukumupa bulemu. Ukuti i woola lya bubeteshi bwakwe bwashika. Nomukombe, wakalenga izeulu, inshi, lwatele, alimwi u mazhiba a meenzhi.'' ⁸ Umwi mungelo - mungelo wabili - wakatobela, ulaamba, "Uliwile, uwile ngu Babiloni mukando, walo wakasungilizha chishi choonse kunwa waini wa mamambe.'' ⁹ Umwi mungelo - mungelo watatu - wakabatobela, ulaamba iizwi ikando ati, "Kuti na kube muntu ukomba munyama u chibumbwa chakwe ukutambula chaando chakwe a nkumu naba etashi lyakwe, ¹⁰ aze ulakanwa waini umwi wa bukali bwa Leza, waini walo wakatilwa utali mupindule mu nkapu yabukali bwakwe. Wezo muntu unwa ulakasubulwa u mulilo u salufa kubushu bwa bangelo ba Leza basalala alimwi ukubushu bwa Mwanambelele. ¹¹ Bushi bufwa kukusubulwa kwabo bulaululuka lyoonse u lyoonse, alimwi kwina nibalyookezha mashiku u muunza - baba mbakombi ba munyama alimwi alimwi u boonse batambula chaando che zhina lyakwe. ¹² Ano ngazandwa bushichamba uku kakatila kwa bana musalazhi ba Leza, babo batobela milawo ya Leza aliwmi u Lushomo lwabo muli Jeso." ¹³ Ndakatelela izwi livwa Kwizeulu lilaamba, Bali u choolwe bafu bafwila mu Mwami.'' ''Eee,'' Moza mbuwaamba, ''kwaamba balyochezhe ku milimo yabo, ukuti inchito shabo shilakabachilila.'' ¹⁴ Ndakalanga kakuli ikumbi lituba. Wezo wakushite wo ekumbi kali ukoya Mwanaa muntu. Kakwete mushini wa Golide ku mutwi wakwe alimwi kakwete i chekesi lilampa mwitashi lyakwe. ¹⁵ Ngoona mungelo umwi wakavwa mu chikombelo woompolola iizwi ikando kuli wezo wakushite ekumbi ati: "Bweza ichekesi lyako utalike kutebula. Ukuti chiindi cha butebuzhi chashika, nkaambo chiindi chakutebula luundu chabizwa.'' ¹⁶ Ngoona wezo wakushite ekumbi wakatandabika ichekesi lyakwe anshi yoonse, ukwiizapula inshi. ¹⁷ Umwi mungelo wakavwa mwitempele Kwizeulu; aze kakwete ichekesi lilampa. ¹⁸ Mbubona mungelo umwi wakavwila ku chipaililo cha tununkilizho, walo wakukwete bwendelezhi bwa mulilo. Wakamoomplola iizwi ikando wezo wakukwete i chekesi lilampa ati, "Bweza i chekesi lyako lilampa utebule mitabi ya masaansa kuvwa ku myuunda ili anshi, nkaambo masaansa abizwa.'' ¹⁹ Mungelo wakazhingulusha ichekesi lyakwe anshi ukutebula oonse masaansa akuli anshi. Wakasowela muchishinino cha bukali bwa Leza. ²⁰ Chishinino chakashininwa ansengwe kuvwa Mu munzhi mukando, alimwi bulowa bwakakunka kuvwa kuvwa momo kumyeelwe ya bulamfu bwa mbizhi, bushika ku chuulu u myaanda ili chisambomwe.