¹ Chitondezho chikando chakaboneka mwizeulu: mukaintu usamine izuba, u mwezhi kushi ku matende akwe alimwi u mushini wa ntongwezhi shili ikumi u shobile a mutwi. ² Kemishi, alimwi kalila nkaambo ka kusunga kuzanda kutumbuka. ³ Kumane kwaalibonya chitondezho chimwi kwizeulu: Langa! Kakuli mupuka umwi usubila ukwete mitwi ili chiloba u meya ali ikumi, alimwi kakuli mishini ili chiloba a mitwi yakwe. ⁴ Muchila wakwe wakapeela mweelwe umwi wa ntongwezhi mwizeulu ukushileta ano anshi. Mupuka wakazhima kumbele lya mukaintu wakuzanda kutumbuka, kwaamba mwati atumbukile buyo mwanakwe amulye. ⁵ Wakazhala mwana mwembezhi, mwana mulombwana, walo uyakwendelezha mashi oonse u mungwala wa chibulo. Mwanakwe wakabwezwa kwa Leza alimwi uku chuuna chakwe cha bwami, ⁶ kumane mukaintu wakalukankila mulukula, kwalo Leza nkwakaku mubambilile busena, kwaamba akakulanganyiwa kabotu kwa mazuba ali Chuulu u myaanda yobile u makumi chisambomwe. ⁷ Inzho kwakaba inkondo kwizeulu. Maiko u bangelo bakwe bakamulwana mupuka, aze mupuka u bangelo bakwe bakazhola. ⁸ Pele mupuka katakwete insana shakukonzha kuzunda. Inzho kakuchiina linji busena kwizeulu. ⁹ Mupuka mukando - welya muzoka wakale utewa Dyabulosi na shatani, uchenga luundu loonse - wakasowelwa ano anshi, u bangelo bakwe antoomwi. ¹⁰ Ngoona ndakatelela izwi ikando kuvwa kwizeulu: ''Inzho kweza lufutuko iinsana sha bwami bwa Leza wesu, alimwi u bwendelezhi bwa Kilisito wakwe. Ukuti muzangi wabakwesu wasowelwa anshi, walo wakabazanga ku bushu bwa Leza muunza u mashiku. ¹¹ Bakamuzunda nkaambo ka bulowa bwa Mwanambelele alimwi u mazwi a bumboni, nkaambo kabatazandisha maumi abo kushikila u ku lufu. ¹² Ubobo amusapwe, nu mazeulu antoomwi u babo bakala mo! Pele maawe ku luundu u ku lwatele, nkaambo satani wamuselukila umwe! Ulibuzwile bukali nkaambo ulizhi ati ulikwete buyo kaindi kashoonto! ¹³ Mupuka nakabona ati wasowelwa ano anshi, wakamuchilila mukaintu wakatumbuka mwana mwembezhi. ¹⁴ Pele mukaintu wakapewa mababa obile a shikwaze mukando kwaamba akonzhe kulukila ku busena mbwabambililwe mu lukula. Bobu mbubusena mwati akabambililwe kabotu kabotu, kwa chiindi, shiindi alimwi kwachisela - kuvwa kubushu bwa muzoka. ¹⁵ Muzoka wakatila meenzhi kuvwa mukanwa lyakwe ukoya mulonga kwaamba apange izambangulwe likonzha ku mutola mukaintu. ¹⁶ Pele Inshi yakamuyovwelezha mukaintu. Inshi yakayalula mulomo ukumina mulonga wakalukwa kuvwa ku mulomo wa mupuka. ¹⁷ Ngoona mupuka wakabiilwa nkaambo ka mukaintu ngoona wakaavwa waya kulwana boonse ba lunungu lwa mukaintu, babo batobela milawo ya Leza alimwi uku kakatila ku bumboni bwa Jeso. ¹⁸ Ngoona mupuka wakazhima a musenga uli a muuma wa Lwatele.