¹ Ndakapewa lubu kwaamba lube ukoya cipimyo. Ndakaambilwa ati, "Zhimuka upime i tempele lya Leza alimwi u Chipaililo, ubabo bakombela mo. ² Pele utabi nulupima lubanza, nkaambo lwapewa ku bantu bakunze. Balakolyatauka munzhi usalala kwa myezhi ili makumi osanwe. ³ Ndakapa bakamboni bangu bobile kwaamba bakashinshime kwa mazuba ali chuulu u myaanda yobile u makumi chisambomwe balisamine masaka.'' ⁴ Bakamboni baba masamu obile a olive u shikala ma lambe azo azhimine kumbele lya Mwami wa anshi. ⁵ Kuti na kuli umwi wasala kubalwana, mulilo ulavwa ku milomo yabo ukuzonauna bashinkondonokwabo. Kufumbwa uzanda kubalwana ulyelele kuyayiwa munzhila yezhi njiyona. ⁶ Baba bakamboni balikwete insana shakuliyala izeulu kwaamba kubule imvula ikawa mu mazuba akushinshima kwabo. Balikwete insana shakusandula meenzhi kuba bulowa alimwi ukuleta miika ishiyene shiyene chishi choonse kufumbwa chiindi nchibazanda kuchita bobo. ⁷ Bakamanizha buyo bumboni bwabo, munyama uvwa mwilambwe liteeli ulakabalwana. Ulakabazunda ukubayaya. ⁸ Mitunta yabo ilakalabna munzhila ya munzhi mukando( chalo chitondezho chitewa Sodoma alimwi u Ejipiti koko Mwami wabo nkwakabambulilwa. ⁹ Ukwa mazuba otatwe u chisela bamwi ku bantu boonse, kuvwa ku mishobo, milaka u mashi alakalanga mitunta yabo. Tabakavuvumizha kwaamba izhikwe mu shuumbwe. ¹⁰ Bantu banshi balakabotelwa ukutangala. Balakatuminana u shipo akati kabo nkaambo baba bashinshimi bobile bakapenzha babo bakupona anshi. ¹¹ Pele kwaita bulyo mazuba otatwe u chisela moza wa bumi kuvwa kwa Leza ulakanjila muli mbabo, alimwi balakabuka ukuzhimuka. Bukandu bulakabanjila babo bati bakabone. ¹² Inzho balakatelela izwi livwa kwizeulu libaambila ati, "Kamwiza kono!" Bamana balakaya kwizeulu mwikumbi, lelyo bashinkondonokwabo kabalangilile. ¹³ Achiindi nchichona checho kulakaba kuzungaana kukando kwa nshi, alimwi chipanzha che kumi cha munzhi mukando chilakawa. Shuulu shili chiloba sha bantu balakayayiwa kuvwa ku kuzungana kwa nshi, babo batai bakafutuke balakapa bulemu kwa Leza wa kwizeulu. ¹⁴ Ipenzhi lyabili lyaita. Langa! Ipenzhi lyatatu lileza chakufwambaana. ¹⁵ Kumane Angelo wa chiloba wakafwiba impeta yakwe, inzho mazwi akaamba kuvwa kwizeulu ati, "Bwami bwa nshi bwaba bwami bwa Mwami wesu alimwi u Kilisito wakwe, alimwi ulakendelezha shikwense u shikwense." ¹⁶ Kumane bakando bali makumi obile ubatesha bobile babo bakala a shuuna shabo kumbele lya Leza, bakafukama bamukomba Leza. ¹⁷ Bakaamba ati, "Twakulumba Mwami Leza Shinsana shoonse, walo uuliko alimwi wakuliko, nkaambo washibweza insana shako shikando alimwi watalika kwendelezha. ¹⁸ Mashi akalemana, pele bukali bwko bwashika. Chiindi chashika cha bafu kwaamba babetekwe alimwi kwaamba upe bulumbu ku batwanga bako bashinshimi alimwi u banamusalazhi ba Leza, u babo bakutiya izhina lyako, balemu u batalemekwa. Chiindi chako chashika chakuzonauna babo bazonauna inshi.'' ¹⁹ Ngoona chikombelo cha Leza kwizeulu chakayalulwa alimwi ikwati lya chivuminano lyakabonwa mu chikombelo cha Leza. Kakuli kulaba kwa mvula, mizuzumo ukuzungaana kwa nshi u chihulamabwe