¹ Ngoona ndakabona mungelo umwi shinsana ulaseluka kuvwa kwizeulu. Kasamine ikumbi, alimwi kakuli filichoongo ezeulu lya mutwi wakwe. Bushu bwakwe kabuli ukoya izuba awo matende akwe kaali ukoya shaanda sha mulilo. ² Kakwete kabuka kashoonto kakuyalulilwe mu matashi akwe. Wakabika itende lyakwe lya chilyo mu lwatele ulya chimonsho kalili a muuma. ³ Ngoona wakapozomoka iizwi ikando ukoya kuhuluma kwa shuumbwa. Chiindi nakapozomoka mizuzumo ili chiloba ya kaamba mu mazwi. ⁴ Mizuzumo ili chiloba niyakaamba, ndakakuzanda kutalika kulemba, Pele ndakatelela izwi kuvwa kwizeulu lilaamba ati, "Ayalile mazwi avwa ku mizuzmo ili chiloba. Utabi nulemba." ⁵ Inzho mungelo ngundakabona ulizhimine a lwatele a muuma wakatambika itashi lyakwe lya chilyo kwizeulu. ⁶ Wakalumbila mwizhina lya wezo upona lyoonse u lyoonse, walo wakalenga izeulu u shoonse shili mo, inshi u shoonse shiyanika mo, lwatele u shoonse shili mo. Ngoona mungelo wakaamba ati, "Kuchiina linji kumuka. ⁷ Pele buzuba bobo mungelo wa chiloba nakaazanda kulizha impeta yakwe, inzho maseseke a Leza alakamaninina, mbubona mbwaka kambauka mazwi mabotu ku basebezhi bakwe ba shinshimi." ⁸ Izwi ndindakatelela kuvwa kwizeulu lyakanshimwina alimwi ati: "Koya, bweza ibuka lili mwitashi lya mungelo uzhimine mu lwatele a muuma." ⁹ Ngoona ndakaya ku mungelo kumwambila ati ampe kabuka kashoonto. Wakanshimwina ati, "Kabweze kabuka wamana ukalye. Pele kalakutela kuchisa mwifu, pele mukanwa kulalweela ukoya buchi." ¹⁰ Ndaakabweza kabuka kuvwa ku mungelo ngoona ndakalya. Mukanwa lyangu kakalweela ukoya buchi, pele mane kulya mwifu mwangu mwakachisa. ¹¹ Ngoona umwi wakaamba kwangu ati, "Uwe ulyelele kushinshima alimwi ku makani a mashi mishobo, alimwi u bami babantu."