¹ Alimwi wakatalika kuyiisha kumbali ku Lwatele, uninzho kwakamubunganina bantu banji banji. Wakanjila mubwato bwakaakuli mulwaatele, wakakala mubwato. Bantu kumbali ku Lwaatele. ² Wakabayiisha shintu shinji shinji mushikozhanyo, mukuyiisha kwakwe, chichechi nchaakabaambila. ³ "Amupupulale! mulimi wakaya kushanga imbuto. ⁴ Naakashanga, shimwi imbuto shakawila muzhila, ubobo bazuni bakeza kushilya. ⁵ Ushimwi imbuto shakawila amabwe, a kaakwiina bulongo. Shakahwa chakufwambaana, nkaambo kakuti kakwiina bulongo bunji bunji. ⁶ Inzho izuba nilyakabala, shakanyana shazuma, kaambo kwaakwina mizanda shakazuma. ⁷ Ushimwi imbuto shakawila mumeya. Meya nakakomena akashiya shakafwa, shiina nishakeezha michelo. ⁸ Shimwi imbuto shakawila mubulongo bubotu ukuzhala michelo shimwi shakeezha makumi otatwe, shimwi makumi chisambomwi, shimwi mwaanda" . ⁹ Amane wakaamba ati, "ukwete matwi ateelele!" ¹⁰ Jeso nakaakuli iche, babo bakaakuli a kufwaafwi aze alimwi ubashichiiya bakwe bakamubuzha kwaamba abapandululile shikozhanyo. ¹¹ Wakabaambila ati, "umwe mwakapewa luzhibo lwamasoseke a Bwami bwa Leza. Pele kuli babo bali ansengwe shoonse shilachitwa mushikozhanyo, ¹² kwaamba balanga, ee balange, pele tababoni, kwaamba ee bateelele, pele tabateelelesha, chita bakasandukila kwa Leza ulakabalekelela." ¹³ Wakabaambila ati, "Samwiina kuuteelela mukozhanyo wezu? Mbuti mbumukonzha kuteelela mushikozhanyo?'' ¹⁴ Mushanji nguushanga izwi. ¹⁵ Imbuto yakawila muzhila, koko nkulyaashangwa izwi. Chiindi nibaateelela, Shaatani ndilyona weza walikusha izwi lelya lyakashangwa muli mbabo. ¹⁶ Yezhi njiimbuto yakashangwa mumabwe; mbubabo chiindi nibaliteelela izwi balitambula mukubotelwa. ¹⁷ Pele baina mizanda balachilila bulyo ashoonto. Pele mbukwabela mapenzhi naa makatazho kaambo ke zwi, balanga kunji. ¹⁸ Alimwi bamwi mbubalya bashangwa mumeya, mbubalya bateelela izwi, ¹⁹ kaambo kakuzandisha Luundu uluchengo lwa lubono umizeezo ishiyene shiyene yenjila mimuonzo yabo ukwaashaanichizha makani, amana akakilwa kuzhala michelo. ²⁰ Yelya yakashangwa mu bulongo bubotu mbubalya bantu bateelela mazwi, ukwaabamba ukuzhala michelo, makumi otatwe, makumi chisambomwi nikuba shiindi shili mwaanda. ²¹ Jeso wakabaambila ati, "Sa mulakonzha kuleta ilambe mung'anda mwamana mwalihunika intundu na mumisena yabulo? ulalileta ukulibika achikalilo chelambe. ²² Kwiina chisoseke chitakaabonwa, alimwi lwiina maseseke atakeezhiza antangalala. ²³ Wezo ukwete matwi aateelela, ateelele!" ²⁴ Wakabaambila ati, "Amuteelele kuli checho nchimwateelela, chisebezho nchiwasebezha chilakasebezhewa kwako, uwe chako chilakabaala. ²⁵ Kaambo wezo ukwete, ulakazungililwa, wezo uuyina ulakanangwa, koonse ukaukwete". ²⁶ Alimwi wakabaambaila ati, "Bwami bwa Leza buli ukoya mulombwana wakashanga imbuto. ²⁷ Mashiku uloona bwacha wabuka, wayana imbuto shamena ukukomena, wiina ukezhiba mbushaakakomena. ²⁸ Bulongo mbubukomenya shishango ukweezha michelo. busonga bulataanguna, kwamana kweza chishiko, umtuhu kumamanino nikwiza ikunka lyamaila. ²⁹ Maila akwe abizwa, ulabweza Ijekesi waachesa kaambo ashika amatebulilo." ³⁰ Alimwi wakabaambila ati, "Bwami bwaka Leza, na nchikozhanoonzhi chikonzha kubupandulula? ³¹ Buli ukoya kaseke ka Masitaadi, lelya nikashangwa nkaesek kabaala kucheya anshi ano. ³² Lelyo, chiindi nikashangwa, kalamena ukukomena kubaala masamu oonse ali mumuunda, lilakwata mitabi mikando, kwalo bazuni bamwizeulu mupanga shitaanto shabo." ³³ Mumikozhanyo minji minji ili ukoya yezhi mwaakubaambila izwi, mbubona mbubaakukonzha kuteelelesha, ³⁴ Kwiina nakabaambila bulyo kwiina mukozhanyo. Pele naakuli ubashichiiya bakwe wakabapandulila shoonse. ³⁵ Kubobo buzuba, mangolezha, Jeso wakabaambila ati, "Atwende kumutala welya." ³⁶ Bakashiya inkamu yabantu, batolelezha u Jeso, umbuli mbwaakuli, mubwato. Kakuli amwi maato anji aakubachilila. ³⁷ Ngoona awo Muuwo mukando wakashika kwakaba Mankwishita akatalika kunjila mubwato meenzhi akatalika kuzula mubwato. ³⁸ Pele Jeso wakoona mutulo ankombo, ya bwato. Wakamushishimuna, u kwaambaati, "Mwiiyi, sa tubweene kwaamba tukalafwa? " ³⁹ Nakabuka, wakaulemanina Muuwo, amane wakaambila lwaatele ati, "Luumuno! Liinze!" Ngoonaawo muuwo wakashitikila, amane kwakaliinza. ⁴⁰ Alimwi wakabaambila ati, "Kaambooyi mulatiya? uninzho muchiina lushomo?" ⁴¹ Bakazula bukandu bunji bunji u kwaamba kuli umwi uumwi, "nguni anu wezu, wezu ukonzha kuteelelwa uku Muuwo ulimwi u lwaatele?"