¹ Jeso wakanjila mubwato, waya mumutala, amane wakaya mumunzhi wakwe mukando. ² Ngoonaawo, bakamuletela mulombwana uuzuminine wakaakulele amuseme. Naakabona lushomo lwabo, Jeso wakaamba ku mulombwana uuzuminine ati,"Mwanangu, zuma. shibi shako shalekelelwa." ³ Ngoonaawo, bamwi balembi bakaamba lwabo beni ati, "Wezu mulombwana ulasampaula." ⁴ Jeso keezhi mizeezo yabo wakaaamba ati, "Kaambooyi mulatelaika shibiyabi mumyonzo yenu? ⁵ Nchichiliye chuubauba, kwaamba ati, 'shibi shalekelelwa,' nakwaamba ati, 'zhimuka uyende'? ⁶ Pele bulyo kwaamba muzhibe ati Mwanaa Muntu ulikwete insana anshi ano shakulekelela shibi, ... "Wakaamba kumulema ati, "Zhimuka, bweza museme wako koya kung'anda yako." ⁷ Ngoonaawo mulombwana wezo wakazhimuka waya kung'anda yakwe. ⁸ Inzho mabunga mabunga naakabona chechi, bakafwa bukandu bakalumbaizha Leza, walo wakapa insana shili bolya ku bantu. ⁹ Awo Jeso naakakwiita kuhwa koko, wakabona mulombwana uukwete izhina lya Matayo kashite kwitente lyashikubwezelela mutelo. Wakaamba kwakwe ati, "nchilila." Wakazhimuka wamuchilila. ¹⁰ Awo Jeso naakakala mung'anda kwaamba balye, ngoonaawo, bashikubwezelela mutelo banji banji u bashishibi bakazhiza kulya u Jeso antoomwi u bashichiiya. ¹¹ Lelyo ba Falisi nibakachibona chechi, bakaamba kubashichiiya bakwe ati, "Kaambooyi mwiiyi wenu ulalya ubashikubwezelela mutelo alimwi u bashishibi?" ¹² Inzho Jeso naakateelela bobo, wakaamba ati, "Bantu batali balwazhi tabakapula mushilishi, chita bulyo babo balwazhi. ¹³ Mulyeelele kuya mukachiiye nchichaamba chechi: 'Ume ndazandisha luse kutali shakulyaaba.' Ndiina kwiza kwita baluleme kwaamba bachileke nchibachita, pele bashishibi." ¹⁴ Inzho bashichiiya baka Johani bakazhiza kwakwe baamba ati, "Kaambooyi uswe uba Falisi tulaliimwa kulya, pele bashichiiya bako tabaliimwa kulya?" ¹⁵ Jeso wakaamba kwabo ati, "Saa bana bamung'anda yabwinga balalila lelyo nabwiinga naachili abo? Pele mazuba alakazhiza lelyo shibwiinga naati akabwezwe kuhwa kwabo, awo ninzho balakaliimya kulya. ¹⁶ Kwiina muntu ubika chisani chipiya achisani chakale kale, kaambo chikamba chilazapuka ukwaahwa, amana kulaba chipulo chikando. ¹⁷ Mbubona bantu mbubatabiki waini mupiya muchisaka cha waini chakale kale. Naakuti bachita bobo, shisaka shilaanduka, ati waini ulatika, shisaka sha waini shilazonauka. Ubobo, balabika waini mupiya mushisaka shipiya, shoonse ati shilakalilila." ¹⁸ Awo Jeso naakaakuchaamba sheshi shintu kwabo, ngoonaawo, umwi mushilikani wakashika wamukotamina. waamba ati, "Mwana mushimbi wangu nachihwa kufwa, pele kweza umubike matashi, amana ulabuka." ¹⁹ Ngoonaawo Jeso wakazhimuka amane wakabachilila, u bashichiiya abo bakamuchilila. ²⁰ Ngoonaawo, mukaintu wakaakusata kusesa bulowa kwa ikumi umyaka yobile wakazhiza kumanuma kwa Jeso amane wakwata kweela isani lyakwe. ²¹ Kaambo wakaamba lwakwe mwini, "kuti ndachikwata chisani chakwe, Ati ndaba kabotu." ²² Pele Jeso wakachinduluka wamubona, waamba ati, "Mwanangu, yana kuzuma; lushomo lwako lwakuponya." Ngoonaawo mukaintu wakapona achiindi checho nchichona. ²³ Awo Jeso naakashika mung'anda ya mushilikani wezo,wakabona baakulizha tulumbu iinkamu yaakulila. ²⁴ Wakaamba ati, "Amumuhwe, wezu mwana tafwile, uloona bulyo." Pele bakamuseka u kumulimbusha. ²⁵ Lelyo inkamu niyakaya kumabali, wakanjila mung'anda wamukwata kwitashi, mwana wakabuka. ²⁶ Makani aza akachitika a kamwaala mubusena boonse. ²⁷ IInzho Jeso naakaakwiita kuhwa momo, boofwu bobile bakamuchilila. Kabapozomoka kabaamba ati, "Tufwile luse, Mwanakwe Devidi!" ²⁸ IInzho Jeso naakanjila mung'anda, baba balombwana boofwu bakazhiza kwakwe. Jeso wakaamba kwabo ati, "Saa mulashoma kwaamba ndachichita chechi?" Bakaamba kwakwe ati, "Ee, Mwami." ²⁹ Ngoonaawo Jeso wakabakwata kumenso waamba ati, "Achichitwe kwenu kwiingaina u lushomo lwenu," ³⁰ amane menso abo akayaluka. Ngoonaawo Jeso wakabashimwina waamba ati, "mubone kwaamba ati kwiina naaba womwi u wezhiba aza." ³¹ Pele baba balombwana bobile bakaya bautola mulumbe wakachitika mubusena boonse. ³² Checho chiindi balombwana bobile baba nibakaya, ngoona, muntu wataakwaamba wakaakunjilwe musangushi wakaletwa kwa Jeso. ³³ Lelyo musangushi naakakushiwa, wezu mulombwana wataakwaamba wakatalika kwaamba. Mabunga mabunga a kazoowa bamane baamba ati, "Chechi chiina nichakabawo mono mu Izilaili!" ³⁴ Pele ba Falisi bakaamba ati, "Kwiita mumuleli wabasangushi, ulatanda basangushi." ³⁵ Jeso wakanjilauka muminzhi mikando yoonse u mutunzhi tushoonto. Wakatolelela kuyiisha muma sinagogi abo, kukambauka mulumbe wabwami u kuponya mishobo yoonse ya shilwazhi alimwi u mishobo yoonse ya malwazhi. ³⁶ Lelyo naakabona mabunga mabunga, wakabafwila inkumbu, kaambo kabapengele u kubula chakuchita. Kabali ukoya imbelele shiina mweembezhi. ³⁷ Wakaamba kubashichiiya bakwe ati, "Butebuzhi mbunji bunji, pele batebula mbashoonto. ³⁸ Ubobo chakufwambaana amukombe ku Mwami wa butebuzhi, kwaamba atume basebezhi mubutebuzhi bobu."