¹ Lelyo Jeso naakaselemuka kuhwa a luulu makamu makamu akamuchilila. ² Ngoonaawo, ushichinsenda wakashika kwakwe u kumukotamina, waamba ati, "Mwami, naakuti ulazanda, ulakonzha kunsalazha." ³ Jeso wakahwungulula itashi lyakwe u kumwaampa, waamba ati, "Ndalozha. Salala." Ngoonaawo wakasalazhiwa kuchinsenda chakwe. ⁴ Jeso wakaamba kwakwe ati, "Bona kwaamba ati kwiina mulombwana nguukashimwina naaba omwi. Koya uukuya, ukalibonye kumupayizhi, ukupa chipo checho Mozesi nchaakamushimwina, bukabe bumboni nkubabele. ⁵ lelyo naakashika mu Kapenaumu, mushilikani mukando wakashika kwakwe, wamulomba ⁶ u kwaamba ati, "Mwami, muzhike wangu ulilele wazuminina ulimwi chilachisa." ⁷ Amane Jeso wakaamba kwakwe ati, "Ndezhiza kumuponya." ⁸ Mushilikani mukando wakayingula u kwaamba ati, Mwami, Ume nsheelela kwaamba uwe unjile mung'anda yangu. Amba bulyo izwi muzhike wangu ulapona. ⁹ Kaambo ame ndimuntu uupelwe insana, ulimwi Ume ndikwete bashilikani mbwinyendelezha. Ume ndaamba kuli wezu, 'koya,' ulaya, ulimwi ukuli umwi, 'kweza,' uleza, ulimwi ukumuzhike, 'chita chechi,' ulachichita." ¹⁰ Lelyo Jeso naakateelela bobo, wakazhingwa u kwaamba kuli babo bakaakumuchilila ati, "Chini chini ndaamba nkumubele, Ume nshina kuyana naaba womwi uukwete lushomo luli bolya mono mu Izilayeli. ¹¹ Ndamwaambila umwe, banji banji balakahwa kwiwe u kumbo, bamana balakeza kwitebulu lyaba Abulahamu, Iyizeki, u Jakobo, mubulelo bwakwizeulu. ¹² Pele bana beembezhi balakasowelwa kunze mumushinze, koko kukakaba kukwiila u kulumanya meno." ¹³ Jeso wakaamba kumushilikani mukando ati, "Koya! Mbubona mbuwashoma, mbubona bobo achichitwe kwako." Ngoona awo muzhike wakaponyiwa achiindi checho nchichoona. ¹⁴ Lelyo Jeso naakenjila mung'anda yaka Pita, wakabona mukwaakwe Pita ulilele mulwazhi. ¹⁵ Jeso wakamukwata kwitashi, bulwazhi bwakamuleka. Ngoona wakazhimuka wakatalika kubasengelela shakulya. ¹⁶ Lelyo nikwakaba kumangolezha, bantu bakaleta kwa Jeso banji banji bakaakunjililwe bashikazwa. Wakeekusha myoza kwizwi u kubaponya boonse baakuli balwazhi. ¹⁷ Chechi kakuli kuzuzukizha kuli chakaambwa umushinshimi Izaya, kwaamba ati, "wakabweza shilwazhi shesu u malwazhi esu." ¹⁸ Lelyo ninzho Jeso naakabona mabunga mabunga aakumuzhingulukile, wakabalayilila kwaamba baye mumutala wa Lwateele lwa Galili. ¹⁹ Ngoona awo mulembi wakazhiza kwakwe u kwaamba ati, "Mwiiyi, Ndakuchilila koonse nkuukaya." ²⁰ Jeso wakaamba kwakwe ati, Bamwaba balikwete mumena mwakukala, ulimwi ubazuni bamwizeulu balikwete shitaanto, pele Mwanaa Muntu wiina aakooneka mutwi wakwe." ²¹ Uumwi wabashichiiya wakaamba kwakwe ati, "Mwami, nhwumizha ntaangune kazhike bataata." ²² Pele Jeso wakaamba kwakwe ati, 'Nchilila, u baleke bafwu balizhike beni." ²³ lelyo Jeso naakenjila mubwato, bashichiiya bakwe bakamuchilila abo mubwato. ²⁴ Ngoonaawo, kwakaba muuwo mukando a lwaatele, ubobo bwato bwakaumwa mankwishita, Walo Jeso kali mutulo. ²⁵ Bashichiiya bakwe bakaya kwakwe u kumubusha, baamba ati, "Tufwutule, Mwami; tukalamana!" ²⁶ Jeso wakaamba nkubabele ati, "Kaambooyi mulatiya, umwe nubashilushomo lushoonto?" Ngoonaawo wakazhimuka u kulemanina myuuwo u luwatele. ²⁷ Ngoona kwakaba kuliinza. Baba balombwana bakazoowa baamba ati, Muntu ulibuti wezu, uuteelelwa kumyuuwo ulimwi uluwatele?" ²⁸ Uninzho Jeso naakashika kubusena bumwi ku chishi chaba Gadala, balombwana bakaakunjililwe bashikazwa bakamuswaanganya. Bakahwila munamaumbwe ulimwi kabali bakali, kakwiina uuyenda uyelele kwiita inzhila yezho. ²⁹ Ngoonaawo, bakapozomoka kulila u kwaamba ati, "Nchiinzhi checho chitukonzha kuchita kwako, Mwanaa Leza? Saa wezhiza kutupenzha chiindi chibikilwe chitana kushika?" ³⁰ Inzho butanga bwa ngulube kabuchela, kaatali alaale unkubaakubele. ³¹ Bashikazwa bakalikombelezha kwa Jeso bakaamba ati, "Watukusha mono, tutume molya mubutanga bwa ngulube." ³² Jeso wakaamba kwabo ati, "Kamuya!" Bashikazwa bakahwa baya kunjila mungulube; amana ngoonaawo, butanga boonse bwakalukanka bwakunkuluka kuhwa aluulu kuya kuliwaala muluwatele u kufwa mumeenzhi. ³³ Babo bakaakweembela ingulube bakalukanka baya kunjila mumunzhi mukando u kuya kwaamba makani woonse, akando kuli chakachitika ku balombwana bakaakunjililwe bashikazwa. ³⁴ Ngoonaawo, woonse munzhi mukando wakahwa kuya kumuswaanganya Jeso. Inzho nibakamubona, bakamukumbila kwaamba amuhwe mubusena bwabo.