¹ "Utakosoleli, kwaamba aze utakakosolelwa. ² kaambo bukosozhi mbuukosola, aze ulakakosolelwa mbubona, alimwi uchipimyo nchuupimyo, nchichona chilakasebezhewa kwako mbubona. ³ Kaambooyi uwe nchuulanga kasanga kashoonto kali mulinso lya mweenzhinoko, pele uwe tulilanganya isanga lili mulinso lyako umwini? ⁴ No ulakonzha kwaamba buti kumweenzhinoko ati, 'kweza nkakushe kako kantu kali mulinso lyako, aakuli isanga ikando mulili mulinso lyako umwini? ⁵ Umwe nubashikuupaupa amenso! Taanguna likushe isanga lili mulinso lyako, ndilelyo nuukabona kabotu kwaamba ulozhe kukusha isanga lili mulinso lyamweenzhinoko. ⁶ Utabi nuupa checho chisalala ku babwa, alimwi utafwusila chintu chibotu ku ngulube. Ubulyo ati shilachilyatauka, shamana shileza kumuzapaula mutupanzha panzha. ⁷ Kumbila, amana chilapewa kwako, kapula ulachiyana. Konkomona, wamana ulayalulilwa. ⁸ Kaambo uli woonse uukumbila, ulatambula; woonse wezo uukapula, ulayana; ulimwi kuli wezo muntu uukonkomona, ulayalulilwa. ⁹ Sa nguni wenu awa, mwanakwe amukumbila chinkwa , amupe ibwe? ¹⁰ Nikuba kuti akumbila inswi, umupe muzoka? ¹¹ Ngaawo, umwe nubabiyabi mulichizhi kupa shipo shibotu ku banenu, mbuti walo Ushenu uuli kwizeulu mbwalozha kupa shintu shibotu kuli babo bamukumbila? ¹² Ngaawo, kufwumbwa bulyo shintu shoonse bantu nshuuzanda kwaamba bakuchitile, ulyeelele aze u bachitile, kaambo wezu mulawo ulimwi u bashinshimi. ¹³ Amwiite mukalyango kashoonto. Kaambo manjililo makando ninzhila itola kukuzonauka, alimwi mbanji banji bantu bayita mumo. ¹⁴ Pele kanjililo kashoonto nkazhila kashupa kako katola ku bumi, alimwi mbashoonto bakayana. ¹⁵ Amuchenjele ku bashinshimi babeshi, babo bezhiza mushisamwa sha mbelele kakuli mubwini mbubaumpe baluma. ¹⁶ Kwiita mumichelo yabo mulakabazhiba. Sa bantu balakozha kuchela magileepusi kuhwa kuchisamu chameya na inkuzu kuhwa kuchisamu chimwi? ¹⁷ Mumona muzhila yezho yomwi, choonse chisamu chibotu chilazhala michelo mibotu, pele chisamu chitali kabotu chilazhala michelo itali kabotu. ¹⁸ Chisamu chibotu tachilozha kuzhala michelo mibiyabi, nikuba chisamu chibiyabi kuzhala michelo mibotu. ¹⁹ Kufwumbwa chisamu chitalozha kuzhala michelo mibotu chilatemwa ukusowelwa mumulilo. ²⁰ Inzho ubobo, mulakabazhibila kwiita kumichelo yabo. ²¹ Tabali boonse babo baamba, Mwami, Mwami,' balakanjila kubwami bwaku kwizeulu, pele bulyo babo bachita luzando lwaka Taata walo uuli kwizeulu. ²² Bantu banji banji balakaamba kwangu mubuzuba bobo ati, 'Mwami, Mwami, sa twiina nitwakashinshima mwizhina lyako, mwizhina lyako mutwakaakukushizha bashikanzwa, mumona mwizhina lyako twakaakuchitila mumo maleele manji manji?' ²³ Ngoonaawo ndakaamba atuba nkubabele ati , 'Ndiina indakamuzhiba umwe! Amukuhwe kwangu, umwe nimuchita shitali mumulawo!' ²⁴ Ubobo, wezo woonse uuteelela mazwi aangu u kwaachilila ulaba ukoya mulombwana musongo uzaka ing'anda yakwe ebwe. ²⁵ Inhula yakawa, meenzhi akazula, awo muuwo wakaunga ang'anda yezho, pele iina niyakawa anshi, kaambo keezakilwe ebwe. ²⁶ Pele woonse uuteelela mazwi angu u kutaachilila uli ukoya mulombwana wezo uzaka ing'anda yakwe amusenga. ²⁷ Inhula yakawa, meenzhi a kazula, awo muuwo wakaunga u kuuma ing'anda yelya, yakawa, ngoonaawo yakawa yakamaninina." ²⁸ Lelyo awo Jeso naakamanizha kuyiisha mazwi aza, makamu makamu akazoowa buyiishe bwakwe, ²⁹ ubobo wakabayiisha ukoya ukwete insana, u kuchita butali mbubachita balembi.