¹ Bona kwaamba ati utabi nuuchita michito yabululami a bantu kwaamba ulibonye nkubabele, naakuti mbubobo mulakabula bulumbu kuhwa kwa Ushenu uuli kwizeulu. ² Lelyo wapa chintu, utabi nuulizha impeta lwako umwini ukoya bashikoopoopa amenso mbubachita muma sinagogi umu mazhila, kwaamba ati batembaulwe kubantu. Chini chini Ume ndamushimwina, batambula kale bulumbu bwabo buzulile. ³ Pele lelyo wapa shintu, utachiti kwaamba itashi lyachimonsho lizhibe nchilichita itashi lya chilyo ⁴ Kwaamba ati nshintu nshiwapa shipewe mukutezhiba bamwi. Kwamana Uswenu uu bonena kumabali ulaka mulumbula. ⁵ Lelyo nuukomba, utabi ukoya bashikoopoopa amenso, kaambo balazandisha kuzhima u kukomba mu masinagogi u mumazhila kwaamba babonwe kubantu. Chini chini Ume ndamushimwina ati, babutambula kale bulumbu bwabo. ⁶ Pele umwe, mwatalika kukomba, amunjila mukati kang'anda. Yala chitendele u kukomba kwa Uswenu, wezo uuli kumabali. Ngaawo Ushenu uu bonena kumabali ulakamulumbula. ⁷ Lelyo waakukomba, utabi nuuyituluka shakwaamba ukoya buchita bakomba baleza banji, balo balazunga ati nibakateelelwa ukaambo kakuhwuzha mazwi ⁸ Ubobo, utabi ukoya mbubale, kaambo Uswenu ulizhikale shintu shimuzanda kamutana kumukumbila. ⁹ Ubobo amukombe bolya: 'Ushesu uuli kwizeulu, inzhina lyako alilemekwe mukusalala. ¹⁰ Abuzhize bwami bwako. Luzando lwako aluchitwe ano anshi umbona buli mbukubele kwizeulu. ¹¹ Tupe bwasunu shilyo shesu shalyoonse. ¹² Tulekelele milandu yesu, mbubona aswe mbutubalekelela batukwatile milandu. ¹³ Utatutoli mukutepaulwa, pele tuhwune kuwezu mubiyabi.' ¹⁴ Ubobo kuti mwabalekelela bamubishizha, Ushenu uuli kwizeulu ulakamulekelela amwe. ¹⁵ Alimwi naakuti tamulekelela bamubishizha, aze Ushenu takamulekelela nshimwakabisha. ¹⁶ "Lelyo waakuliimya kulya, utabi nuukwata bushu bukali ukoya bashikoopoopa amenso mbubachita, kaambo balabisha amenso abo kwaamba bali bonye kubantu ati balaliimya kulya. Chini chini Ume ndamwaambila, batambula kale bulumbu bwabo buzwile. ¹⁷ Pele umwe, lelyo nimuliimya kulya, amulishobe kumutwi ukusanzha bushu bwenu ¹⁸ kwaamba mutalibonya kubantu kwaamba mwaakuliimya kulya. pele bulyo Ushenu uuli kumabali; amana umwe Ushenu uu bonena kumabali ulakamulumbula. ¹⁹ "Mutabi nimulizobolela lubono lwenu nubeni ano anshi, awo bupuka u senke kushizonauna, alimwi awo batewu ngubayaya u kwiba. ²⁰ Unizho, amulizobwele lubono lwenu kwizeulu, koko kwalo kwiina bupuka naa senke shizonauna, alimwi kwiina mutewu ulozha kuyaya u kwiba. ²¹ Kaambo koko kuli lubono lwenu, nkukukaakubele umyonzo yenu. ²² Linso ndilambe lya mubili. Ubobo, naakuti linso lyako lili kabotu, mubili woonse ulaakuzwilile mumuni. ²³ Pele kuti linso lyako talili kabotu, woonse mubili wako ulaakuzwile umushinze. Ubobo, naakuti mumuni wezo uuli mwako ulashiisha, nomukando buti wezo mushinze! ²⁴ Kwiina naaba womwi ukonzha kusebezela bashimalelo bobile, naabulyo ulasula womwi naakuzanda umwi, naabulyo kulemeka naa kusampaula umwi. Tukonzha kusebezela Leza u lubono. ²⁵ Ubobo Ume ndaamba kwenu ati, mutabi nimulibilika kubumi bwenu, kuli checho nchimukalya na checho nchumukanwa; na shamubili wenu, na nshimukasama. Sa takuli kuti bumi bulabaazha kubaala chakulya, awo mubili ulabaala ali shakusama? ²⁶ Amulange ku bazuni bali mwizeulu. Taba shangi na kutebula na kubungika mumatala, pele Ushenu uuli kwizeulu ulabasanina. Sa umwe tamukwete bulemu kubaala mbabo? ²⁷ Nguni womwi wenu aali umwe uzandisha walo uukonzha nikaba kantu komwi kuzungila kubumi bwakwe? ²⁸ Kaambooyi umwe mulalibilika aali shakusama? Amutelaike buli maluba aa mumyuunda, alo mbwaakula. Taasebezi, alimwi taapangi shakusama. ²⁹ Ubobo Ume ndamwaambila, naaba Solomoni mubulemu bwakwe boonse wiina nakasamikwa shili bolya. ³⁰ Naakuti Leza ulalonzha kusamika bwizu mumyuunda, chalo chipona lya bwasunu uzona bwacha chaswewa munhondo, chili buti walo kuli umwe mbwakonzha kumusamika, umwe nuba shilushomo lushoonto? ³¹ Ubobo mutabi numupenga u kwaamba ati, 'Nchiiyi nchitukalya?' naaba Nchiiyi nchitukanwa?' naaba 'Nchakusama chili buti nchitukasama?' ³² Abo bahwa mashi balakapula shintu sheshi, aze Ushenu wa kwizeulu ulizhi kwaamba mulashizanda sheshi. ³³ Pele amutaangune kukapula bwami bwakwe u bululami bwakwe, amana shoonse sheshi shintu shilapewa kwenu. ³⁴ Ubobo, mutabi nimupenga kuli sha zona, u bwa zona bulali bambila bwini. Buzuba u buzuba bulikwete bubi bukwene kuli mbubo bwini.