¹ Jeso wakoompolola bashichiiya bakwe bali ikumi ubobile antoomwi wabapa insana a myoza mibiyabi, kwaamba baakuyikusha, kwaamba baakulozha kuponya mishobo mishobo yamalwazhi alimwi u mishobo mishobo yashilwazhi. ² Uninzho mazhina a babo bali ikumi ubobile batumwa ngaaza. Wakutaanguna, Simoni (wezo waakutewa ati Pita), u Andulu munina; Jemusi mwanakwe Zebede, u Johani munina; ³ Filipu, u Batelomeo; Tomasi, u Matewo shimutelo; Jemusi mwanakwe Alufiyasi, u Tadeyasi; ⁴ Simoni waku Zeloti, u Judasi Sikaliyoti, uukaka mwaaba. ⁵ Babo bali ikumi ubobile mbaakatuma Jeso. Wakabashimwina waamba ati, "Mutabi nimuya kufwumbwa busena koko kukala bahwa mashi, alimwi mutabi nimunjila kufwumbwa munzhi waba Samaliya. ⁶ Pele kamunaya koko kuli imbelele izhiminine yamung'anda ya Izilaili; ⁷ amana mwaakuya buya, amukambauke mwaambe ati, 'Bwami bwakwizeulu buli afwaafwi.' ⁸ Kuponya balwazhi, kubusha bafwu, kusalazha bashichinsenda, u kukusha basangushi.Mwapewa bulyo, amwe amukape bulyo. ⁹ Mutabi nimubweza ingolida, siliva, naaba kopa uuli mulutambo lwenu. ¹⁰ Mutabi nimubweza chinzuma a mushinzo, nikuba chakusama chamukati, nishiba impato, nuuba musako, kaambo musebezhi ulyeelele kupewa chakulya. ¹¹ Kufwumbwa munzhi mukando naa munzhi mushoonto ngumukakanjila, amukalange nguuliye muhubi, mukakale koko mpaka mukakuhwe. ¹² Mwakanjila mung'anda, amukabaazhe. ¹³ Naakuti ing'anda ileelela, luumuno lwenu lube aalinjiyo. Pele naakuti talweelele,Luumuno lwenu aluzhoke kwenu. ¹⁴ U kuli babo bati batakamutambuli na kwaateelela mazwi enu, lelyo mwakamuhwa mung'anda yezho na mumunzhi mukando, amukakunkumune lufwuko lwenu kumatende. ¹⁵ Chini chini Ume ndamushimwina, chilakaakuli chuubauba kunshi ya Sodoma u gomola kubuzuba bwa lubeta kubaala munzhi mukando welya. ¹⁶ "Amulange, Ume ndamutuma ukoya imbelele akati kaba mwaaba, ubobo amuchenjele ukoya muzoka mulilemeke buli inkwilimba. ¹⁷ Amubalangishe bantu! Balakamutola kutubunga, amana balakamuuma muma sinagogi abo. ¹⁸ Mwamana mulakatolwa kubaleli uku bami kaambo kezhina lyangu, bukabe bumboni nkubabele alimwi u kubahwashi. ¹⁹ Awo bakamutola koko, mutabi nimuya kulibilika kuli chimwi naaba nchimuya kwaamba, kaambo chakwaamba chilakapewa kwenu achiindi checho nchichona. ²⁰ U kuti indimwe nimuya kwaamba, pele moza waka ushenu nguuya kwaamba mwenu. ²¹ Munuina ulakatola munina ku lufwu, alimwi aze ushi ku mwanakwe. Bana balakabukila babazhele u kuya kuchita kwaamba bafwe. ²² Umwe mulakasulwa kuli bamwi u kaambo kezhina lyangu. Pele kufwumbwa uu kaatolelela kushika kumamanino, wezo muntu ulakafwutulwa. ²³ Awo bakamupenzha umwe momu mumunzhi mukando, amukaye kuli umwi, u kuti Ume ndamwaambila, mwiina nimukakaita muminzhi mikando ya Izilaili katana kushika Mwanaa Muntu. ²⁴ "Shichiiya tali mukando aali mwiiyi wakwe, naaba musebezhi aali shimatwangaakwe. ²⁵ Chilyeelele ku mutumwa kwaamba abe ukoya mwiiyi wakwe, alimwi aze musebezhi ukoya shimatwangaakwe. Naakuti bakamwita shimatwanga wa ng'anda Belizebu, alakabiya buti mazhina ngubabanda bankamu ba mung'anda yakwe! ²⁶ Ubobo mutakabatiyi, u kuti kwiina chihwumbilwe chitakaazubululwa, alimwi kwiina chisosekelwe checho chitakaazhibwa. ²⁷ Checho nchindakushimwina umushinze, chaambe ishikati, alimwi checho nchuwateelela mukabotu kabotu u matwi ako, kachaambe aatuba. ²⁸ Mutabi nimutiya babo bayaya mubili pele tabalozha kuyaya moza. Ubobo, amutiye ulozha kuzonauna shoonse moza u mubili mwilindi lyamulilo. ²⁹ Saa tuzuni tobile tatuulwa ipeni ishoonto? Nikuba bobo kwiina naaba womwi wabo uuwila anshi chakubula Ushenu luzhibo. ³⁰ Pele woonse masusu aali ku mutwi alikwete mweelwe. ³¹ Utabi nuutiya. Muli bazandishi kubaala tuzuni tunji tunji. ³² Ubobo woonse wezo uwaamba meni meni aangu kubantu, Ame mbubona ndakaamba meni meni kwa Taata wezo uuli kwizeulu. ³³ Pele woonse wezo unkaka ume kubantu, Ame mbubona ndakamukaka ambele kwa Taata wezo uli kwizeulu. ³⁴ Mutabi nimutelaika kwaamba ati Ume ndezhiza kuleta luumuno ano anshi. Ume ndiina indezhiza kuleta luumuno, pele ndaleta icheba. ³⁵ Ume ndakeza kuchita muntu kulwisha ushi, mwana mushimbi ulakalwisha baina, mukwe ulakalwisha baina zhala. ³⁶ Bashinkondonina muntu balakaba babo bamung'anda yakwabo. ³⁷ Wezo woonse uuzandisha baushi naa baina kubaazha ume teelela mwangu; Wezo woonse uuzandisha mwanakwe mweembezhi naa mwana mushimbi kubaala ume teelela mwangu. ³⁸ Wezo woonse utabwezi chichinkano chakwe u kunchilila teelela mwangu. ³⁹ Wezo woonse uuyana bumi bwakwe ulakabuluza. Pele woonse wezo uuluza bumi bwakwe kaambo kangu ulakabuyana. ⁴⁰ Wezo woonse uukamutambula wantambula ame, alimwi wezo woonse uuntambula ume ati watambula u wezo wakantuma. ⁴¹ Wezo woonse uutambula mushinshimi mwizhina lyangu ku mushinshimi ulakatambula bulumbu bwa mushinshimi, alimwi wezo woonse uutambula muntu mululami mwizhina lyangu kwiita mumuntu wezo mululami ulakatambula bulumbu bwa wezo muntu mululami. ⁴² Woonse wezo uupa babo bashoonto shoonto inkapu ya meenzhi atontola aakunwa mwizhina lya shichiiya, chini chini ndamushimwina, kwiina mbwaaya kuluza bulumbu bwakwe."