¹ ngoonaawo Jeso wakabwezwa kwa moza usalala wakaya mulukula kwaamba a kasukushiwe ku mubiyabi. ² Lelyo naakamana kuliimwa kulya kwa mazuba makumi one u mashiku makumi one, wakafwa inzala. ³ Shikumusunka wakashika kwakwe waamba ati, "Naakuti uli Mwanakwe Leza, shimwina mabwe aza kwaamba chibe chinkwa." ⁴ Pele Jeso wakamwiingula waamba kwakwe ati, "Kulilembelwe ati, 'Muntu taponi kuchakulya chalo, pele kuzwi lelyo lihwa kumulomo waka Leza.''' ⁵ Ngoona shatani wakamutola mumunzhi mukando usalala amane wakamubika ezeulu sha a bwaanda bwachikombelo, ⁶ amane waamba kwakwe ati,"Naakuti uli Mwanakwe Leza, liwaale anshi, kaambo kulilembelwe ati, 'Ulakatuma baangelo bakwe kukukwabilila,' Balakakubweza mumatashi abo, kwaamba utakabi nulyuuma itende kwibwe.''' ⁷ Jeso wakaamba kwakwe ati, "Alimwi kulilembelwe ati, 'Utabi nusukusha Mwami Leza wako.''' ⁸ Alimwi, shatani wakamubweza aluulu lulafwusha amane wakamutondezha mami woonse a muluundu ubulemu bwawo boonse. ⁹ Waamba kwakwe ati, "Shoonse shintu sheshi ndakupa, kuti wawaanshi wamana u nkombe." ¹⁰ Ngoonaawo Jeso wakaamba kwakwe ati, "Kuhwe kwangu, satani! Kaambo kulilembelwe, 'Mulyeelele bulyo kukomba Mwami Leza, alimwi ngumwelele kusebezela bulyo.''' ¹¹ Amane satani wakamushiya, ngoonaawo, baangelo bakazhiza kumusebezela. ¹² Uninzho awo Jeso nakateelela kwaamba ati Johani bamupa bamukwata, wakabweela ku Galili. ¹³ Wakakuhwa ku Nazaleta amane waya kukala mu Kapenaumu, koko kuli kufwaafwi ku lwaatele lwa Galili mumasena a Zebuloni u Nafutali. ¹⁴ Chechi chakachitika kuzuzukizha checho chakaambwa u mushinshimi Ayizaya, ¹⁵ Inshi ya Zebuluni alimwi inshi ya Nafitali, kuya muya lwaatele, kwiitilila Jodani, u Galili wa bahwamashi! ¹⁶ Bantu babo bakaakushite mumushinze babona mumuni mukando, alimwi kuli babo baakushite mubusena u kutiya chinhwule chalufwu, aali mbabo alibonya mumuni." ¹⁷ Kuhwa kuchiindi checho Jeso wakatalika kukambauka kaamba ati, "Amusanduke, kaambo bwami bwa kwizeulu buli afwaafwi." ¹⁸ Awo naakakuya bweendeenda kulwaatele lwa Galili, wakabona babunina bobile, Simoni utewa ati Pita, alimwi u Andulu munina, kabawaala kanyandi mulwaatele, kaambo kabali bazezhi. ¹⁹ Jeso wakaamba nkubabele ati, "Amuzhize, munchilile, amana Ume ndamuchita kuba bazezhi ba bantu." ²⁰ Kufwambaana bakatushiya tunyandi bamane bakamuchilila. ²¹ Alimwi Jeso kachiya buya kuhwa awo wakabona alimwi babunina bobile, Jemusi mwanakwe Zebede alimwi u Johani munina. Kabali mubwato u Zebede ushabo kabasasa tunyandi. Wakaboopolola, ²² ngoonaawo chakufwambaana bakabushiya bwato alimwi ushabo bamane bakamuchilila. ²³ Jeso wakanjilauka moonse mu Galili, kayiisha muma sinagogi abo, kukambauka mulumbe wabwami alimwi u kuponya mishobo mishobo yamalwazhi u shilwazhi akati ka bantu. ²⁴ Twaambo twakwe twakateelelwa moonse mu Siliya, alimwi bantu bakaakuletwa kwakwe babo boonse bakaakusata malwazhi ashiyene shiyene u shichisa, babo bakaakunjililwe basangushi, bawa chaku mutwi, alimwi u balema. Jeso wakabaponya. ²⁵ Mabunga mabunga a kamuchilila kuhwa ku Galili, Dekapolisi, Jelusalemu, alimwi uku Judeya, alimwi u kwiitilila ku Jodani.