¹ Inzho nibwakacha,bapaizhi bakando u bakando kando babantu bakakanza kwaamba bamuyaye Jeso. ² Bakamwaanga, bamutola, u kwa Pilato muleli. ³ Inzho awo Judasi, wezo wakamwaaba, naakabona kwaamba Jeso bamupa mulandu, wakasanduka waabweezha ma peni a siliva aali makumi otatwe kubapaizhi bakando u bakando kando, ⁴ wakaamba ati, "ndachita chibi kwaaba bulowa bwiina mulandu." Pele bakaamba ati, "No nchiiyi checho kwesu? Chibone umwini checho." ⁵ Ngoonaawo wakaasowa anshi ma peni muchikombelo, amane wakaya ansengwe waya kulishina lwakwe mwini. ⁶ Bapaizhi bakando bakaabweza ma peni a siliva baamba ati, "Tachili mumulawo kwaabika muchizobolelo kaambo nga muulo wabulowa." ⁷ Baakabandika kaambo boonse antoomwi, bamane mali azo bakaula muunda waakutwa ati pota wezo waakuzhikwa beenzu. ⁸ Kaambo ka checho wezu muunda ulatewa ati, Muunda wa bulowa" kushika u bwasunu. ⁹ Inzhi checho chakaambwa u mushinshimi Jelemiya chakazuzukizhiwa, kwaamba ati, "Bakabweza ma peni a siliva aali makumi otatwe, muulo wakabikwa aali nguwe u bana ba Izilaili, ¹⁰ bamane bakaapa kumuunda wa pota, ukoya Mwami mbwaakalailila." ¹¹ Inzho Jeso kazhimine kumbele lya muleli, amane muleli wakamubuzha, "Saa ndiwe Mwami waba Juda?"Jeso wakayingula ati, "Waamba bobo," ¹² Pele lelyo nibakamutamikizha bapayizhi bakando u bakando kando, wiina naakayingula pe. ¹³ Awo Pilato wakaamba kwakwe ati, "Saa tuteelele shintu shinji shinji shesho nshibakutamukizha?" ¹⁴ Pele wiina naakayingula linji niliba izwi lyomwi, ubobo muleli wakazhingwa chini chini. ¹⁵ Inzho lyashika ikubi muleli kazhibile kukusha mwaange womwi wasalwa kuli bambunga. ¹⁶ Kuchiindi checho kabakwete muyazhi waakuli mwaange wezhina lya Jeso Balabasi. ¹⁷ Awo lelyo nibakaakuchibungene, Pilato wakaamba kwabo ati, "Nguni umwe ngumuzanda kwaamba mwaangululile? Balabasi, naa Jeso wezo uutewa ati Kilisito?" ¹⁸ Kezhi kwaamba bakamupa Jeso kwakwe u kaambo kamunyono. ¹⁹ Lelyo naakaakushite a chuuna chalubeta, mwinakwe wakatuma izwi kwakwe waamba ati, "Bula nchuuchita ku mulombwana wezo wiina mulandu. Ume ndapenga bwasunu u kaambo ka muntu wezo muchiloto." ²⁰ Awo bapayizhi bakando u bakando kando bakashinikizha bambunga kwaamba ati bakumbile Balabasi bamana bazonaune Jeso. ²¹ Muleli wakababuzha, "Nguni akati kabantu bobile baba ngumuzanda kwaamba ati ume mwaangululile?" Bakaamba ati,"Balabasi." ²² Pilato wakaamba kwabo ati, "No ndachita buti u wezu Jeso walo utewa ati Kilisito?" Boonse bakayingula ati, "Aa bambulwe." ²³ Amane wakaamba ati, "Kaambooyi, nchibiiyi nchaachita wezu?" Pele bakampozomoka chibaala, "Naabambulwe." ²⁴ Awo lelyo Pilato naakabona kwaamba ati kwiina nchaakachita, u kuti kabazanda kukanka kulwa, wakabweza meenzhi, wakasazha matashi akwe a bushu bwabo bambunga, waamba ati, "Ume ndiina mulandu kubulowa bwa wezu mulombwana. Mwabona bobo." ²⁵ Bantu boonse bakaamba ati, "Bulowa bwakwe a bube aali uswe u bana besu." ²⁶ Amane wakakusha Balabasi nkubabele, amane wakamukwipaula Jeso wakabapa kwaamba bamubambule. ²⁷ Ngoonaawo bashilikani babaleli bakamutola Jeso mukati muli bafulumende bamane bakabungika boonse bashilikani. ²⁸ Bakamusamununa bamane bamubika isani lisalala. ²⁹ Bakapanga mushini wameya bamane bamubika amutwi wakwe, bamupa u musako mwitashi lyakwe lyalulyo. Bakamukotamina kumusaalizha, baamba ati, "bakamunhumpa, Mwami waba Juda!" ³⁰ Bakamufwila mate, amane bakabweza musako bamuuma a mutwi chabweelela. ³¹ Nibakamana kumusaalizha, bakalikusha isani aali nguwe bamane bakamubika lyakwe mwini. amane bakamutola kuya kumubambula. ³² Awo nibakaakumukusha ansengwe, bakayana mulombwana waku Sailini wezhina lya Simoni, walo ngubakashinikizha kuyaabo kwaamba amubwezele chichinkano. ³³ Bakashika kubusena butewa ati Gologota, chaamba ati "Busena bwakaanza." ³⁴ Bakamupa waini wakunwa u hwelene indulwe. Pele lelyo naakamusola, wiina naakamunwa. ³⁵ Awo nibakamana kumubambula, bakashaandaula shisani chakwe bakawaala chisolo, ³⁶ bamane bakakala bamulindilila. ³⁷ Ezeulu a mutwi bakabika mulandu ngubakamupa, waakulembelwe ati, "Wezu ngu Jeso, Mwami waba Juda." ³⁸ Batewu bobile bakabambulwa antoomwi u Jeso, umwi kuchilyo chakwe alimwi umwi kuchimonsho. ³⁹ Babo bakaakwiita bakamutuka, kabapuka puka mitwi ⁴⁰ kabaamba ati, "Uwe nuwakaakuzanda kuyaya chikombelo u kuchizaka mumazuba otatwe, linunune umwini! Naakuti uli Mwanaa Leza, seluka achichinkano!" ⁴¹ Muzhila yezho njiyona bapayizhi bakando bakamusaalizha, antoomwi ubalembi u bakando kando, baamba ati, ⁴² "Wakafwutula bamwi, pele talozha kulifwutula mwini. Ngu Mwami wa Izilaili. Aali kushe mwini kuhwa achichinkano, amana ati tulashoma mwakwe. ⁴³ Ulashoma mwa Leza, Leza naamuhune ninzho awa, Naakuti Leza ulazanda kumuleka, ukoya mbwaakwaamba ati, Ndime mwanakwe Leza."' ⁴⁴ Munzhila njiyona u batewu mbaakaakubambulilwe abo bakatalika abo kumutukana. ⁴⁵ Uninzho kuhwa kwiiwoola lya chisambomwi mushinze wakazuzha inshi yoonse mpaka kwiwoola lye fwuka. ⁴⁶ Kuya kwiwoola lye fwuka, Jeso wakalila izwi ikando waamba ati, "Eli Eli, lama sabakatani?" chaamba ati, "Leza wangu, Leza wangu, kaambooyi wandekelezha?" ⁴⁷ Lelyo bamwi bakaakuzhimine awo bakateelela, baamba ati, "Uloompolola Elija." ⁴⁸ Uchakufwambaana umwi wabo wakalukanka waya kuleta chiponda, wachitoba mu waini ulula, wachibika kukasamu keebu, wachitambika kwakwe kwaamba anwe. ⁴⁹ Bamwi banji banji bakaamba ati, "Amumushiye mwini. Tubone naa Elija ulazhiza kumufwutula." ⁵⁰ Awo Jeso wakalila alimwi izwi ikando wakalekezha moza wakwe. ⁵¹ Ngoonaawo, isani lyakuchinjilizha muchikombelo lyakaanduka mushipanzha shobile kuhwa ezeulu kushika kunshi, ayo inshi yakazungaana, alimwi u mabwe akaandaana. ⁵² Shuumbwe shakayaluka, alimwi u mibili ya bantu basalala babo bakaakufwile bakabushiwa. ⁵³ Bakamuhwa mushuumbwe naakamana kubushiwa, wakanjila mumunzhi mukando usalala, wakabulika kubanji banji. ⁵⁴ Inzho lelyo bashilikani alimwi ubabo bakaakulindila Jeso bakabona kundindima kwanshi alimwi u shintu shesho shakachitika, bakatiya maningi baamba ati, "Chini chini wezu kali Mwanakwe Leza." ⁵⁵ Bakaintu banji banji babo bakaakuchilila Jeso kuhwa ku Galili kwaamba bamuyohwe kuli nshaakakuzanda kabaliwo awo kabalangilila alaale. ⁵⁶ A kati kabo kakuli Maliya Magadalena, Maliya baina Jemusi u Jozefu, alimwi unokwabo bana baka Zebede. ⁵⁷ Awo naakaba mangolezha, Kwakazhiza mulombwana muhubi wakahwa ku Alimatiya, Wezhina lya Jozefu, wezo aze kali shichiiya waka Jeso. ⁵⁸ Wakaya kwa Pilato wakumbila mubili waka Jeso. Ngoonaawo Pilato wakabashimwina kwaamba bamupe. ⁵⁹ Jozefu wakoobweza mubili, woohunga mwisani ibotu, ⁶⁰ Amane wakoowoneka muchuumbwe chipiya checho nchaakasha mwibwe. Amane wakakunkulusha ibwe ikando amulyango wa chuumbwe amane wakaya. ⁶¹ Maliya Magalena alimwi u Maliya umwi kabaliwo, kabashite kulangana u chuumbwe. ⁶² Buzuba bwakachilila, kabuli buzuba nibakamana kulibambila, bapaizhi bakando alimwi uba Falisi kabashite antoomwi u Pilato. ⁶³ Bakaamba ati, "Ulemekwa, tulatelaika kwaamba welya muchenzhi naakuchilanga, wakaamba ati, 'kwaita mazuba otatwe ulakabuka alimwi.' ⁶⁴ Ubobo shimwina kwaamba chuumbwe chilanganyiwe mpaka kubuzuba bwatatu, ubulyo bashichiiya bakwe balakazhiza kumwiba bamana bakaambe kubantu ati, 'wabuka kuhwa kubafwu,' amana mbuchibele ninzho chilakabaala buli mbuchaakubele kumatalikilo." ⁶⁵ Pilato wakaamba kubabele ati, "Amulangishe. Kamuya mukachibambe mbubona mbumuchizhi." ⁶⁶ Ngoonaawo bakaya bachibamba chuumbwe kabotu kabotu, kuchishingulula babika u mulindizhi.