¹ Chakaba bobo Jeso naakamanizha mazwi woonse aza, wakaamba kubashichiiya bakwe, ² "Mulizhi kwaamba ati kwayita mazuba obile ikubi lyakwiitilila lilashika, amana Mwanaa Muntu ulaabwa nkubabele kwaamba akankaminwe." ³ Awo bapayizhi bakando alimwi u bakando kando ba bantu kababungene mubusena bwamupayizhi mukando, walo waakutewa ati Kayifasi. ⁴ Bakakanza antoomwi kumukwata Jeso chakumubenda amana u kumuyaya. ⁵ Kaambo kabaamba ati, "chitali chiindi chepobwe, kwaamba kutabi nikuba nikubuka inkondo akati kabantu ⁶ Inzho lelyo Jeso nakaakuchili ku Betani mung'anda yaka Simoni mulema, ⁷ lelyo nakaakuchili kwitebulu, mukaintu wakaya kwakwe waakukwete kakopo kamafwuta aali muulo mukando akunana, amane wakaakununa a mutwi wakwe. ⁸ Pele lelyo bashichiiya bakwe nibakabona chechi, bakalemana bamane bakaamba ati, "Kaambooyi kuchita chili bolya chakuzonauna? ⁹ Chechi kacheelele kuuzhiwa kumuulo mukando amana kupa kubapushi." ¹⁰ Pele Jeso, kuzhiba chechi, wakaamba nkubabele ati, "Kaambooyi mulapenzha wezu mukaintu? Kaambo walo wachita chintu chili kabotu kwangu. ¹¹ Pele lyoonse mulibakwete baba bapushi, pele talili lyoonse nimukakaba ame. ¹² Kaambo lelyo naakaakununa aza mafwuta a mubili wangu, wakachichita kukuzhikwa kwangu. ¹³ Chini chini Ume ndamushimwina, koko koonse wezu mulumbe mubotu nkuukakambaukwa muluundu loonse, chechi wezu mukaintu nchaakachita a cho chilakabandikwa mukutelaika nguwe." ¹⁴ Wezo umwi wabali ikumi u bobile, wezo wakaakutewa ati Judasi Sikaliyoti, wakaya ku bapayizhi bakando ¹⁵ waamba ati, "Nchiiyi nchimutelaika kumpa kwaamba mulete muntu wezu kwenu?"Bakapima makumi otatwe aa siliva. ¹⁶ Kuhwa achiindi checho wakakapula mbwaati amutole nkubabele. ¹⁷ Mubuzuba butaanzhi bwa chinkwa chiina bumena bashichiiya bakazhiza kwa Jeso baamba ati, "Nkukwi nkuuzanda kwaamba uswe tukubambile kuti ulye chakulya chakwiitilila?" ¹⁸ Wakaamba ati, "Kamuya mumunzhi mukando ku mulombwana umwi mukaambe kwakwe ati, 'Mwiiyi waamba ati, "Chiindi changu chili afwaafwi. Ume ndalila chilyo chakwiitilila kung'anda yako u bashichiiya bangu.''''' ¹⁹ Bashichiiya bakachita mbubona Jeso mbwaakabalailila, bamane bakabamba chakulya chakwiitilila. ²⁰ Awo nikwakaba mangolezha, wakakala kwaamba balye u bashichiiya bakwe bali ikumi u bobile. ²¹ Awo nibakaakulya, wakaamba ati, "Chini chini Ume ndamushimwina kwaamba umwi wenu ulangaba." ²² Bakafwa buusu boonse, amane umwi umwi wakatalika kumubuzha, "Ume indime, Mwami?" ²³ Wakayingula, "Nguwezo ngutubwenga aze mumutiba inguwe uya kungaba. ²⁴ Mwanaa Muntu ulakaya, mbubona mbuchilembelwe kutwaambo twakwe. Pele mawe ku muntu wezo walo uya kwaaba Mwanaa Muntu! Kachili kabotu kwaamba wezo muntu naatakazhalwa bulyo." ²⁵ Judasi, shikumwaaba wakaamba ati, "Saa Ndime, Mwiiyi?" Wakaamba kwakwe ati, "Wachaamba uwe umwini." ²⁶ Awo nibakaakulya, Jeso wakabweza chinkwa, wachilongezha, amane wachikomauna. Wakachipa ku bashichiiya waamba ati, "Amubweze, mulye. wezu mubili wangu." ²⁷ Wakabweza inkapu amane wapa kulumba, wakachipa nkubabele waamba ati, "Amunwe chechi, noonse. ²⁸ Bobu mbulowa bwangu bwa chihwuminano bwakatikila ku banji banji kukulekelelwa kwa shibi. Pele ²⁹ Ume ndaamba kwenu ati, Ume ndiina linji ninjakunwa alimwi muchelo wa vaini, Chita bulyo kubuzuba bobo mbwinja kunwa mupiya antoomwi amwe mubwami bwaka Taata." ³⁰ Nibakamana kwiimba lwiimbo, bakaya kulupili lwa Oliva. ³¹ Jeso wakaamba nkubabele ati, "Umwe noonse mulandukanka mashiku a bwasunu kaambo kangu, u kuti kulilembelwe ati, 'Ndakauma imbelele amana imbelele shabutanga shilakamwaala.' ³² Pele ndakamana kubushiwa, Ume ndakaba kumbele kwenu kuya ku Galili." ³³ Pele Pita wakaamba kwakwe ati, "Nikuba kwaamba boonse bakalukanke kaambo kako, Ume shikalukanka pe." ³⁴ Jeso wakaamba kwakwe ati, "Chini chini Ume ndaamba kwako ati, mashiku aza a bwasunu, katana kukokoloka mukombwe, ulantama shiindi shotatwe." ³⁵ Pita wakaamba kwakwe ati, "Nikuba buti ndafwa aze, Ndiina ndiina ninkakutama." Boonse bashichiiya bakaamba mbubona bobo. ³⁶ Amane Jeso wakaya abo kubusena butewa ati Getesemani amane waamba ku bashichiiya bakwe ati, "Amukale awa ninchiya kolya kuya kukomba." ³⁷ Wakabweza Pita alimwi u banakwe Zebede bobile wakakwata buusu u kupenga. ³⁸ Awo wakaamba kwabo ati, "Moza wangu wakwata buusu bubaala, nikuba kulufwu. Amushaale ano atulangile amwe." ³⁹ Wakaya ansansa ashoonto, wakalosha bushu bwakwe, wakomba. Waamba ati, "Taata, kuti nichaakuba, yezhi inkapu neenjitilile. Pele kutali kuzanda kwangu, pele kuzanda kwako." ⁴⁰ Wakazhoka ku bashichiiya bakwe wakabayana baloona, amane waamba kwa Pita, "Kaambooyi tamukonzha kulindila ame kwe woola lyomwi bulyo? ⁴¹ Amulindile mukombe kwaamba mutabi munjila mumasunko. Moza chini chini ulazandisha, pele mubili wabula insana." ⁴² Wakaya kumabali alimwi lwabili kuya kukomba. Wakaamba ati, "Taata, naakuti chechi chatachitika chita Ume kuchinwa, akuchitwe luzando lwako." ⁴³ Wakazhoka alimwi wabayana baloona, kaambo menso abo kali malemu. ⁴⁴ Awo naakabashiya alimwi, wakaya kukomba lwatatu, wakaamba mazwi ngoona alimwi. ⁴⁵ Awo Jeso wakazhiza ku bashichiiya amane waamba nkubabele ati, "Saa muchoona alimwi u kupumuna? Amulange, chiindi chili afwaafwi, Mwanaa Muntu u kalaabwa mumatashi a bashishibi. ⁴⁶ Amuzhimuke, katuya. Amulange, wezo uzanda kungaba uli afwaafwi." ⁴⁷ Awo naakakuchaamba, Judasi, umwi wababo bali ikumi u bobile, wakashika. Imbunga inkando yakashika aze kuhwa kubapayizhi bakando u bakando kando ba bantu. Bakazhiza u macheba alimwi u misako. ⁴⁸ Inzho mulombwana uzhiza kumwaaba Jeso wakabapa chitondezho, waamba ati, "Wezo ngwikashonta ati inguwe. Amumukwate." ⁴⁹ Chakufwambaana wakashika kwa Jeso amane waamba ati, "Ndakwaazha, Mwiiyi," amane wakamushonta. ⁵⁰ Jeso wakaamba kwakwe ati, "Mweenzuma, chita nchiwezhila kuchita." Ngoona bakazhiza, bakabika matashi ali Jeso, bamukwata. ⁵¹ Amubone, umwi wababo wakaakuli u Jeso wakatandabika itashi lyakwe, wakakusha icheba lyakwe, amane wayasa musebezhi wa mupayizhi mukando, wamukosola kutwi. ⁵² Ngoonaawo Jeso wakaamba kwakwe ati, "Lipilushe icheba momo mulikala, kaambo babo boonse babweza icheba ndilyona icheba lilakabamana. ⁵³ Saa tamwizhi kwaamba ndakozha kushimwina Taata, amana ulakonzha kuntumina babaala ali bali ikumi u bobile makamu a baangelo? ⁵⁴ Pele mbubuti malembe mbwaakonzha kuzuzukizhiwa, chechi chilyeelele kuchitika?" ⁵⁵ A chiindi checho Jeso wakaamba kumbunga ati, "Saa mwazhiza u macheba alimwi u misako kwiza kunkwata u koya mutewu? A buzuba ndaakukala u kuyiisha muchikombelo, pele mwiina nimwakankwata. ⁵⁶ Pele choonse chechi chachitika kwaamba malembe a bashinshimi azuzukizhiwe." Ngoonaawo boonse bashichiiya bakamushiya bakalukanka. ⁵⁷ Babo bakamukwata Jeso bakamutola kwa Kayifasi mupayizhi mukando, koko balembi u bakando kando nkubaakubungene. ⁵⁸ Pele Pita wakatobela lwaalale kuya mukati muyanwa mupayizhi mukando. Wakaya kumabali amane wakala u bashilikani kwaamba a bone chikachitika. ⁵⁹ Inzho bapayizhi bakando alimwi inkuta yoonse bakalanga langa bumboni bwakubeya kwaamba babeeshe Jeso kutewa bayane mwakumuyayila. ⁶⁰ Kwiina nibakayana niiba yomwi, nikuba kwaamba bapa bumboni bwakubeya kabali banji banji bakezhiza. Pele kumane bobile bakazhiza ⁶¹ baamba ati, "Wezu muntu kaamba ati, 'Ndalonzha kumwaya chikombelo cha Leza u kuchizaka mumazuba otatwe.''' ⁶² Mupayizhi mukando wakazhimuka waamba kwakwe ati, "Saa twiinguli? Chiiyi checho chalo nchibaamba aali uwe?" ⁶³ Pele Jeso kaliinzile bulyo. Mupayizhi mukando wakaamba kwakwe ati, "Ume ndakushimwina uwe kwiita mwa Leza upona, tushimwine naa ndiwe Kilisito, Mwanakwe Leza." ⁶⁴ Jeso wakamwiingula ati, "Waamba bobo u mwini. Pele ndakushimwina uwe, kuhwa awa ninzho ulamubona Mwanaa Muntu ulishite kwitashi lyalulyo lyansana, amana uleza u makumbi kuhwa kwizeulu." ⁶⁵ Ngoonaawo mupayizhi mukando wakazapaula shakusama shakwe amane waamba ati, "Waamba chitonda! Kaambooyi nchituchilanga bakamboni? Bona, inzho mwachiteelela chitonda. ⁶⁶ Mulatelaika buti?" Bakayingula baamba ati, "Uleelela lufwu." ⁶⁷ Bamane bakamufwila mate kubushu alimwi u kumuuma infwunshi shabo, awo bamwi bakamuuma imbayi ⁶⁸ kabaamba ati, "Shinshima nkutubele, uwe Kilisito. Nguni wezo wakuuma?" ⁶⁹ Inzho Pita kashite ansengwe mwibetekelo, amane musebezhi mushimbi wakazhiza kwakwe waamba ati, "Aze mbubona wakaakuli u Jeso waku Galili." ⁷⁰ Pele wakakaka kumbele lyabo boonse, waamba ati, "Ume nshichinzhi checho nchimwaamba." ⁷¹ Awo naakaya ansengwe kumanjililo, umwi musebezhi mushimbi wakamubona waamba kuli babo baakuli awo ati, "Wezu mulombwana aze kali u Jeso waku Nazaleta." ⁷² Walo alimwi wakachikaka u chakapinga u kupinga, "Ume nshimwizhi wezu mulombwana!" ⁷³ Nikwakayita bulyo kaindi kashoonto babo bakaakuzhimine awo bakazhiza baamba kwa Pita ati, "Chini chini aze uli wabamwi babo, kumwaambo uli wababo." ⁷⁴ Ngoona wakatalika koombwezha alimwi u kulipinga, "Ume nshimwizhi wezu mulombwana," Amane u mukombwe wakakokoloka. ⁷⁵ Pita wakaatelaika mazwi azo Jeso ngaakaamba ati, "Katana kulila mukombwe uwe ulantama shiindi shotatwe." Amane wakaya ansengwe wakalila chini chini.