Chaandano 24
1
Jeso wakamuhwa muchikombelo amane wakaya kwakwe mwini. Bashichiiya bakwe bakazhiza kwakwe kwaamba bamutondezhe buzake bwachikombelo.
2
Pele wakayingula wakaamba kwabo ati, "Saa tamushibwene shintu sheshi shoonse? Chini chini ndamushimwina, kwiina ibwe likakashaala ebwe nina lelyo litakakaanduka."
3
Lelyo naakakala Alupili lwa Oliva, bashichiiya bakazhiza kwakwe kumabali bamane baamba ati, "Tushimwine, ndililiye sheshi shintu nishiya kuchitika? Chitondezhooyi checho chiyakuba kubuzhoke bwako alimwi u mamanino a musela?"
4
Jeso wakayingula amane waamba kwabo ati, "Amuchenjele kutabi naaba womwi u mukusha munzhila.
5
U kuti banji banji balakazhiza mwizhina lyangu. Balakaamba ati, Ume ndime Kilisito,' alimwi balakasowa banji banji.
6
Mulakateelela a nkondo alimwi u twaambo twankondo. Mukabone kwaamba mutakapengi, u kuti shintu sheshi shilyeelele kuchitika; pele mamanino ati taana kushika.
7
Kaambo chishi chilakalwa u chishi nina, alimwi bwami u bwami nina. Kulakaakuli inzala u kuzhangama kwanshi mumasena ashiyene shiyene.
8
Pele shoonse shintu sheshi alaakuli bulyo matalikilo ukoya mishika yakutumbuka.
9
Bamana balakamutola kukupenzhiwa alimwi u kuyayiwa. Mulakasulwa kuli bamashi boonse kaambo kezhina lyangu.
10
Bamwi balakazhokela munshi, alimwi u kwaaba umwi u mweenzhiina alimwi u kusula umwi u mweenzhiina.
11
Bashinshimi babeshi banji banji balakashika kwiza kusowa banji banji.
12
Kaambo kutatobela mulawo kulakaya ambele, luzando lwabo banji banji lulakatontola.
13
Pele wezo u kalilila kushika kumamanino ulakafwutulwa.
14
Wezu mulumbe mubotu wabwami ulakakambaukwa inshi yoonse bukabe bumboni kumashi woonse. Amana mamanino alakashika.
15
"Ngoonaawo, mwakabona shitonda shaba atuba, shesho shakabandikwa u mushinshimi Daniyeli, kazhimine mubusena busalala" (uu bala naateeleleshe),
16
"U bali mu Judeya a balukankile mumapili,
17
Wezo uuli alululi lwang'anda ataseluka anshi kwiza kubweza chintu mung'anda yakwe,
18
alimwi wezo uuli mumuunda atakazhoka kwiza kubweza ikoti lyakwe.
19
Pele mawe kuli babo bamishi alimwi kuli babo banonsha bana bashoonto kumazuba azo!
20
Amukombe kwaamba kubwezwa kwenu kutakabi mweto naa muchibelu.
21
U kuti kulakaba mapenzhi makando, azo aa tanabele kuhwa kumakankilo kwanshi kushikila ninzho, pe, nikuba kuya kuchitika alimwi.
22
Chita kuti mazuba azo a kafwiinshiwe, kwiina naaba womwi uyakufwutuka. Pele kaambo kababo basale mazuba azo alakafwiinshiwa.
23
Naakuti umwi waamba kwako ati, 'Bona, nguweno Kilisito!' naa, 'Nguwelya Kilisito!' mutakachishomi.
24
Kaambo ba Kilisito babeshi alimwi u bashinshimi babeshi balakashika kwiza kutondezha alimwi ushizoosha, kwaamba mukamuhwe munzhila, chaakuhwumina, nibaba basale.
25
Amubone, Ume ndamushimwinina limwi kachitana kushika chiindi.
26
U bobo, naakuti baamba kwenu ati, 'Bona, uli mulukula,' mutabi nimuya mulukula. Naaba, 'Amubone, uli mung'anda,' mutakachishomi.
27
U kuti lulabo lulakamweka kuhwa kwiwe kutuba kuya kumbo, mbubona bobo mbwaakakazhiza Mwana a Muntu.
28
Kufwumbwa kuli munyama ufwile, u bashikube nkubabungana.
29
"Pele chakufwambaana a kamana mapenzhi kumazuba azo izuba lilakashiya, mwezhi tookapi mumuni, intongwezhi shilakawa kuhwa mwizeulu, alimwi insana shamazeulu shilakazungaana.
30
Ngoonaawo chitondezho cha Mwanaa Muntu chilakabulika mwizeulu, amana mishobo yoonse yaanshi ano ilakalila. Balakamubona Mwanaa Muntu a makumbi aa mwizeulu insana alimwi u bulemu bukando.
31
Ulakatuma baangelo bakwe u mukunga wampeta, balakabungika antoomwi basale bakwe kuhwa ku myoza yone, kuhwa kweela izeulu kuya kuli limwi.
32
Amwiiye chiiyo kuhwa kwisamu lyekuzu. Ndilyona ulyona mitabi yatalika kukwata lutuhwu lupiya ukukusha alya matuhwu akale kale, muzhibe ati chilimo chili afwaafwi.
33
Mbubona bobo, mwakabona shintu sheshi shoonse, mulyeelele kuzhiba kwaamba ati uli afwaafwi, kumanjililo.
34
Chini chini ndamushimwina, wezu musela tookamana chita sheshi shintu shoonse shikachitike.
35
Izeulu alimwi inshi shilakamana, pele mazwi angu ayina naati akamane
36
Pele chaamba buzuba alimwi u chiindi kwiina naaba womwi u chizhi, nikuba baangelo bakwizeulu, nikuba Mwana, pele chita bulyo Taata iche.
37
Mbubona mbukwakaakubele kumazuba aka Nowa, mbukukakaba u kuzhiza kwa Mwana Muntu.
38
Kaambo kumazuba azo kakutana kuzula meenzhi bakaakulya alimwi u kunwa, kutwala alimwi u kutwazha mpaka kubuzuba bwaka Nowa nibakanjila mubwato,
39
kakwiina nchibakaakwizhi kumakani a kuzula kwa meenzhi chita meenzhi naakabatola boonse---mbubona bobo mbuchikakaba kukuzhiza kwa Mwanaa Muntu.
40
Awo balombwana bobile balakaakuli mumuunda---womwi ulakabwezwa, alimwi womwi ulakashaala.
41
Bakaintu bobile balakaakuzhiya a munchini---umwi ulakabwezwa, alimwi umwi ulakashaala.
42
U bobo amuchenjele, u kuti tamubwizhi buzuba Mwami wenu naaya kushika.
43
Pele amuzhibe chechi, kwaamba kuti mukamwini ing'anda naakakwizhi chiindi chamashiku mutewu naakazhiza, naamulindila kwaamba amubone alimwi naataleka kwaamba ing'anda yakwe kuti iyayiwe.
44
U bobo amwe mulyeelele kulibambila, kaambo Mwanaa Muntu ulakazhiza kwiwoola lelyo ndimutalibambile.
45
"Unizho nguuliye mushomeshi alimwi musebezhi musongo wezo shimatwangaakwe ngwaabika mung'anda yakwe kwaamba akubapa chakulya chabo achiindi cheelele?
46
Mulongezhe wezo musebezhi walo shimatwangaakwe ngwaati akayane kuli nchaachita lelyo naayakuzhoka.
47
Chini chini Ume ndamushimwina mukamwini ing'anda ulakamubika kubona shintu shoonse shakwe.
48
Pele naakuti musebezhi mubiyabi waamba mumonzo wakwe ati, 'Shimatwangaangu wachelwa,'
49
amana watalika kuuma basebezhinina, kulya u kunwa u bachakolwanina,
50
amana shimatwangaakwe wezo musebezhi ulazhoka buzuba mbwaatezhi wezo musebezhi alimwi iwoola ndyaatezhi.
51
U shimatwangaakwe ulakamukosaula shipazha pazha u kumutola kubusena bumwi antoomwi u bashikoopoopa a menso, koko kukakaba kulila u kulumanya meno