¹ Jeso wakaamba alimwi kwabo mutwaambyo, waamba ati, ² "Bwami bwakwizeulu buli ukoya mwami umwi wakabamba shakulya shakutwala kwa mwanakwe. ³ Wakatuma basebezhi bakwe kuya koompolola babo bakaakuli batambe kwaamba bazhize kushakulya shalutwalo, pele baina nibakazhiza. ⁴ Alimwi mwami wakatuma bamwi basebezhi , waamba ati, 'Amubashimwine babo batambe, "Amubone, Ume ndabamba chakulya. Musune wangu alimwi ing'ombe shayayiwa, alimwi u shintu shoonse shabambwa kale. A bazhize kushakulya shabwinga.''' ⁵ Pele baina nibakachikwatisha bamane bakaya, umwi kumuunda wakwe, alimwi umwi kuli chakuchita chakwe. ⁶ Bamwi bakakwata basebezhi bamwami, bakabapenzha chakubula insoni, bamane bakabayaya. ⁷ Mwami wakalemana, amane wakatuma bashilikani bakwe bakaya kubazonauna babo bayazhi u kutenta minzhi yabo mikando. ⁸ Amane wakaamba kubasebezhi bakwe ati, 'Bwinga buli bambilwe kale, pele babo bakaakuli batambe baina linji bulemu. ⁹ Uninzho kamuya mumampanda a mikwakwa muye moompolole bantu banji banji kukulya kwalutwalo lolu babo mbumukonzha kuya kuyana. ¹⁰ Basebezhi bakaya mumazhila bakoobolola boonse bantu mbubakayana, babiyabi u babotu. ubobo ing'anda yabwinga yakazula u beenzu. ¹¹ Pele lelyo mwami naakanjila mukati kuya kubona beenzu, wakabona umwi mulombwana wezo watakaakusamine shikobelo shitali shabwinga. ¹² Mwami wakaamba kwakwe ati, 'Mweenzuma, anu wanjila buti mukati mono bwiina shikobelo shabwinga?' Pele wezo mulombwana wakabula chakwaamba. ¹³ Amane mwami wakaamba kubasebezhi ati, 'Amumwaange wezu mulombwana kumatashi u kumatende, mwamana mumusowele ansengwe a shiya mbi, koko kuti kukaakuli kulila alimwi u kulumanya meno.' ¹⁴ Kaambo bantu banji banji bakoompololwa, pele basale mbashoonto." ¹⁵ Ngoonaawo ba Falisi bakaya kubamba muzeezo mbubati bamukwashe Jeso mukwaamba kwakwe mwini. ¹⁶ Awo bakatuma kwakwe bashichiiya babo, antoomwi u babo baka Helodi. Bakaamba kwa Jeso ati, "Mwiiyi, tulizhi kwaamba ndiwe wa bwini, alimwi ulayiisha inzhila sha Leza mubwini. Tulanganya nuuba muzeezo wa umwi, alimwi tutondezha lwaandaano kuhwa kumuntu umwi umwi. ¹⁷ Inzho twaambile, ulatelaika buti? Saa chili mumulawo kupa mutelo kwa Kayiza naa pe pe?" ¹⁸ Pele Jeso wakazhiba bubiyabi bwabo amane waamba ati, "Kaambooyi umwe mulansunka, umwe nubashikoopoopa a menso? ¹⁹ Amuntondezhe ipeni ndimutela." Ngoona bakaleta idenali kwakwe. ²⁰ Jeso wakaamba kwabo ati, "Nguni uuli chifwanikisho alimwi u mazhina aza?" ²¹ Bakaamba kwakwe ati, "Ndyaka Kayisala." Amane Jeso wakaamba kwabo ati, "Amupe Kayisala shintu shaka Kayisala, alimwi mupe Leza shintu shaka Leza." ²² Nibakateelela chechi, bakazhingwa. Bamane bakamushiya bakaya. ²³ Mubuzuba bobo mbubona bamwi ba Saduki, babo baakwaamba ati kwiina bubuke, bakaya kwakwe. Bakamubuzha, ²⁴ baamba ati, "Mwiiyi, Mozesi wakaamba ati, 'Nakuti muntu wafwa, bwiina bana, munina ulyeelele kumutwala mwinakwe kwaamba azhalile bana munina.' ²⁵ Kabali balombwana chiloba babunina. Mwana mukando katwele amane wakafwa. Kutakwata mwana, wakashiya mwinakwe kumunina. ²⁶ Aze munina wabili wakachita chintu nchichona, kumane u watatu, mpaka boonse kushika kuli wachiloba munina. ²⁷ Nibakamana boonse, aze mukaintu wakafwa. ²⁸ Inzho kububuke, Ulakaba mukaintu wakani kubalombwana baba babunina bali chiloba? Kaambo boonse kabamutwele." ²⁹ Pele Jeso wakayingula amane waamba kwabo ati, "Muli lubizhizhe kaambo tamweezhi malembe naaba insana shaka Leza. ³⁰ Kaambo kububuke kwiina batwala nikuba kutwazha. U bobo bali ukoya baangelo kwizeulu. ³¹ Pele kuli shabubuke kuli bakafwa, saa mwiina nimwakabala checho chakaambwa kuli umwe kuhwa kwa Leza, kwaamba ati, ³² Ume ndime Leza waka Abulahamu, Leza waka Iyizeki, alimwi Leza waka Jakobo'? Leza tali Leza wabafwu, pele wababo bakwete bumi." ³³ Lelyo mabunga mabunga naakateelela chechi, bakazhingwa maningi kubuyiishe bwakwe. ³⁴ Pele lelyo ba Falisi nibakateelela kwaamba Jeso wabapa kubula chakwaamba ba Saduki, bakabungana lwabo beni antoomwi. ³⁵ Umwi wabo, wakaakuubwene kabotu kabotu mulawo, wakamubuzha mubuzho, kuzanda kumusunka--- ³⁶ "Mwiiyi, Nguuliye mulawo mukando mumilwawo?" ³⁷ Jeso wakaamba kwabo ati, '''Fwuna Mwami Leza wako u monzo wako woonse, u moza wako woonse, alimwi u muzeezo wako woonse.' ³⁸ Wezu ngumukandosha alimwi ngu mulawo mutaanzhi. ³⁹ Alimwi mulawo wabili uli ukoya wezu---'Fwuna shimukobonoko umbona mbuulifwini umwini.' ⁴⁰ A milawo yezhi yobile ngaazhimine yoonse milawo alimwi u bashinshimi." ⁴¹ Awo lelyo ba Falisi nibakaakuchili antoomwi, Jeso wakabuzha mubuzho. ⁴² Wakaamba ati, "Mulatelaika buti aaka Kilisito? Anu mwanakwe ni?" Bakaamba kwakwe ati, "Mwanakwe Devidi." ⁴³ Jeso wakaamba kwabo ati, "Nombuti alimwi Devidi mumoza kamwita ati Mwami, kaamba ati, ⁴⁴ Mwami wakaamba ku Mwami wangu ati, "Kala kululyo lyangu, mpaka mbabike bashinkondonoko kumatende ako'''? ⁴⁵ Naakuti Devidi ulamwita Kilisito 'Mwami,' No ulaba buti mwanakwe Devidi?" ⁴⁶ Kwakabula naaba womwi u mwiingula niliba izwi, alimwi kwiina mulombwana wakalozha kumubuzha nikuba mubuzho kuhwa kubuzuba bobo.