¹ Awo Jeso u bashichiiya bakwe nibakashika kufwaafwi ku Jelusalemu bakaya ku Betifegi, kulupili lwa Olivi, Jeso wakatuma bashichiiya bobile, ² waamba kwabo ati, "Kamuya mumunzhi uli ambele, amana chakufwambaana mulakayana imbongolo ilyaangilwe, ili u moombe wambongolo. Amukabaangulule mukabalete kono kwangu. ³ Naakuti kuli umwi uti a kaambe kwenu kuli chechi, mukaambe ati, 'Mwami ulashizanda,' amana wezo muntu chakufwambaana u lakamupa nshisho." ⁴ Inzho chechi chakachitika kuzuzukizha checho chakaambwa kwiita mushinshimi, kwaamba ati, ⁵ Ambila mwana mushimbi wa Ziyoni, 'Langa, Mwami wako ulazhiza kwako,mubonhwu monzo ulilizile ambongolo---a mwana wambongolo, muzhale kumbongolo.''' ⁶ Awo bashichiiya bakaya kuchita mbubona Jeso mbwaakabalayilila. ⁷ Bakayileta imbongolo u mwanayo bamane babika shikobelo shabo sheezeulu ali shisho, amane Jeso wakakala a shikobelo shesho. ⁸ Banji banji bambunga bakazala shikobelo shabo munzhila, alimwi bamwi bakakosaula mitabi ya shisamu bamane bashizala munzhila. ⁹ Awo mabunga mabunga a babo bakaakuli kumbele kwa Jeso amana u babo bakaakumuchilile kabaya busaba, ''Hosana ku mwanakwe Devidi! Mulonjezhe nguwezo walo uzhiza mwizhina lya Mwami! Hosana mwizeulusha!" ¹⁰ Lelyo Jeso naakanjila mu Jelusalemu, woonse munzhi mukando wakazungaana bamane baamba ati, "Nguni wezu?" ¹¹ Mabunga mabunga a kayingula baamba ati, "Wezu ngu Jeso mupolofita waku Nazaleta wamu Galili." ¹² Amane Jeso wakanjila muchikombelo. Wakatanda boonse babo baakuula u kuuzha muchikombelo, wakaapindamuna matebulu a bashikuchincha mali u shuuna shabo babo baakuuzha inkwilimba. ¹³ Wakaamba kwabo ati, "Kulilembelwe, 'Ing'anda yangu ilakatewa ati ning'anda yakukombela,' pele umwe mweechita kuba busena bwa batewu." ¹⁴ Inzho boofwu u balema bakazhiza kwakwe muchikombelo, amane wakabaponya. ¹⁵ Pele lelyo bapayizhi bakando u balembi nibakabona shintu shibotu shesho nshaakachita, alimwi lelyo nibakateelela bana balapozomoka muchikombelo balaamba ati, "Hosana ku mwanakwe Devidi," bakabaalisha kulemana. ¹⁶ Bakaamba kwakwe ati, "Saa wateelela shesho nshibaamba?" Jeso wakaamba kwabo ati, "Ee ee! Pele saa mwiina nimwakabala, 'Kuhwa mumilomo ya bana bashoonto u balela bana bakalibambila kutembaula'?" ¹⁷ Amane Jeso wakabashiya wamuhwa mumunzhi mukando waya ku Betani koko nkwaakaya koona. ¹⁸ Inzho chifwumo fwumo awo nakabweela mumunzhi mukando, kafwile inzala. ¹⁹ Naakabona isamu lya mukuzu kufwaafwi kunzhila, wakaya ko waya kuyana kwiina chilimo chita bulyo matuhwu. Wakaamba kwikuzu ati, "Kutakabi linji muchelo kuhwa kwako alimwi," Chakufwambaana ikuzu lyakakusa. ²⁰ Awo bashichiiya nibakachibona checho, bakazhingwa bamane baamba ati, "Anu leli isamu lya mukuzu lyazuma buti chakufwambaana?" ²¹ Jeso wakayingula wakaamba nkubale ati, "Chini chini ndaamba kwenu, kuti waakukwete lushomo alimwi tuzuluzha, tukozha kuchita bulyo chechi chachitika kwikuzu leli pe, pele ulakozha kwaamba kulupili lolu, 'Ahwe awa alimwi u kulufwusa mulwaatele,' chamana chilakachitika. ²² Kufwumbwa checho nchuukakakumbila kwiita mukukomba, u kushoma, ulakatambula." ²³ Awo Jeso naakanjila muchikombelo, bapayizhi bakando alimwi u bakando kando ba bantu bakazhiza kwakwe awo naakaakuyiisha bamane baamba ati, "Munsana shakani muuchitila shintu sheshi, alimwi nguni wakakupa insana sheshi?" ²⁴ Jeso wakayingula waamba nkubabele ati, "Ame ndamubuzha mbubona mubuzho womwi. Kuti munshimwine, Ame ndamushimwina muhwa insana shesho nshichisha shintu sheshi. ²⁵ Lupapatizo lwaka Johani---lwakahwilakwi? Lakahwila kwizeulu naa ku bantu?" Bakahwiya hwiya lwabo beni, baamba ati, "Kuti twaambe ati, 'Lwakahwa kwizeulu,' ulaamba kwesu ati, 'Kaambooyi tamushomi mwakwe?' ²⁶ Pele alimwi twaamba ati, 'Kuhwa ku bantu,' tulatiya mabunga mabunga, kaambo boonse balimubwene Johani kwaamba mupolofita." ²⁷ Ngoonaawo bakamwiingula Jeso baamba ati, "Tatuchizhi." Aze wakaamba nkubabele ati, "Ame mbubona nshimushimwini kuhwila insana nshinchisha shintu sheshi. ²⁸ Inzho mutelaika buti? Mulombwana kakwete bana bobile. wakaya kumutaanzhi waamba ati, 'Mwanangu, koya bwasunu u sebeze mumuunda.' ²⁹ "Mwana wakayingula waamba ati, 'Ume ndiina,' pele kwiite kaindi wakachincha muzeezo wakaya. ³⁰ "Amane awo mulombwana wakaya ku mwanakwe wabili waamba chintu chikozhene nchichona. Wakayingula waamba ati, 'Ndaya, Mwami,' pele wiina naakaya. ³¹ Nguuliye a bana baba bobile wakachita chizanda baushi?" Bakaamba ati, "Wezo mutaanzhi." Jeso wakaamba kwabo ati, "Chini chini Ume ndamushimwina, bashimutelo alimwi u bahwuule balakanjila mubwami bwaka Leza kutali umwe. ³² Johani wakazhiza kwenu munzhila ya bululami, pele mwiina nimwakamushoma. Pele bashimutelo alimwi u bahwuule bakamushoma. Pele umwe, nikuba kuti mwakabona chechi, mwiina nimwakasanduka nikuba kumushoma. ³³ "Amupupulale alimwi ku kaambyo kamwi. Kakuli mulombwana, waakukwete inshi, Wakashanga muunda, wakazhingulusha lwiingo, wakasha chilindi chakushinina waini, wakazaka busanza bulafwu, amane wakaupa kubashikulima balipila mali bamana kulima. Amane wakaya muchishi chimwi. ³⁴ Lelyo chiindi nichakashika chakutebula michelo, wakatuma bamwi basebezhi kubalimi ba vaini kuya kubweza michelo yakwe. ³⁵ Pele baba balimi ba vaini bakamubweza umwi musebezhi, bamuuma umwi,umwi bakamuyaya, alimwi umwi bakamuyasa mabwe. ³⁶ Alimwi, mukamwini wakatuma basebezhi bamwi, kubaala bataanzhi, pele alimwi balimi ba vaini bakabachita mbubona munzhila yomwi njiyona. ³⁷ Kumane awo, mukamwini wakatuma mwanakwe mwini nkubabele, waamba ati, 'balakamulemeka mwanangu.' ³⁸ "Awo balimi ba vaini nibakamubona mwana, bakaamba akati kabo beni, 'Wezu nguushimulyazhina. Kamwiza, atumuyaye twamana tushibweze shoonse shalukono.' ³⁹ Ngoona bakamubweza, bakamusowela kunze kumuunda bamane bakamuyaya. ⁴⁰ Inzho lelyo mukamwini muunda akazhiza, ulakabachita buti babo balimi ba vaini?" ⁴¹ Bakaamba kwabo ati, "Ulakabazonauna chibiyabi babo bantu batali kabotu, amana ulakapa muunda ku balimi ba vaini banji, ulakapa bamwi balombwana babo mbubaya kwaabana abo shishango kuchiindi chakutebula." ⁴² Jeso wakaamba kwabo ati, "Saa mwiina nimwakabala mumalembe, 'Ibwe lelyo ndibakasowa bazashi lyakaba ndiibwe lya chooko chang'anda. Chechi chakahwa ku Mwami,alimwi nchibotusha mumenso esu'? ⁴³ U bobo Ume ndaamba kwenu ati, bwami bwaka Leza bulakakushiwa nkumubele bwamana bulakapewa kuchishi checho chikusha michelo yacho. ⁴⁴ Kufwumbwa wezo uuya kuwila ebwe leli ulakakombauka mushipanzha panzha. Pele kuli wezo nguchikakawila ulakashanauka." ⁴⁵ Awo bapayizhi bakando alimwi u ba falisi nibakateelela twaambyo twakwe, bakateelelesha kwaamba kaamba mbabo. ⁴⁶ Kukapula kwaamba bamukwate, bakafwa bukandu kuli bambunga, kaambo bantu kabamubikile walo kwaamba kali mushinshimi