¹ Chakachitika bobo lelyo Jeso naakamanizha mazwi aza, wakakuhwa ku Galili wakaya kubusena bwaku Judeya bwalo buli kumutala wamulonga wa Jodani. ² Mabunga mabunga akamuchilila, wakabaponya koko. ³ Bafalisi bakashika kwakwe, kumusunka, baamba kwakwe ati,"Sa chili mumulawo mulombwana kuleka mwinakwe kufwumbwa chachitika?" ⁴ Jeso wakayingula waamba ati, "Sa mwiina nimwakabala kwaamba wezo wakababamba kuhwa kumakankilo wakabamba mulombwana u mukaintu? ⁵ Wezo wakababamba alimwi wakaamba ati, 'U kaambo kako mulombwana ulakashiya baushi u baina u kusangana mwinakwe, amana bobile ulakaba mubili womwi.' ⁶ Awo tabachili bobile, pele mubili womwi. Ubobo checho Leza nchaaswaanganya antoomwi, kutabi naaba womwi uchaandaanya." ⁷ Bakaamba kwakwe ati, "Nkaambooyi walo Mozesi wakatushimwina kupa chipepa chakulekana wamana wamutanda?" ⁸ Wakaamba kwabo ati, "Kaambo kakuzuma kwa myonzo yenu, Mozesi wakamuhwuminya kuleka benenu, pele kumatalikilo kachitali bobo. ⁹ Ndamwaambila umwe, woonse uleka mwinakwe, chita bulyo kwiitila mubumambe, atwala uumwi, ati wachita bumambe." ¹⁰ Bashichiiya bakaamba kwa Jeso ati, "Naakuti kako nkukaambo ka mulombwana u mwinakwe, ati tachili kabotu kutwala." ¹¹ Pele Jeso wakaamba kwabo ati, Tali uuli woonse ukonzha kuuhwumina mwaambo wezu, chita bulyo kuli babo bapelwe kuteelela. ¹² Ukuti nkubali batazhali bakazhalwa bobo kuhwa mwifwu lya manokwabo, alimwi nkubali batazhali bakachitwa kubantu kwaamba baleke kuzhala, alimwi kuli bamwi batazhali bakalipanga beni kuleka kuzhala ukaambo kabwami bwakwizeulu. wezo ukonzha kutambula kuyiishiwa koku, noomuleke akutambule." ¹³ Awo bamwi bana bashoonto bakaletwa kwakwe kwaamba akonzhe kubabika matashi u kubakombela, pele bashichiya bakwe bakabakasha. ¹⁴ Pele Jeso wakabaamba ati, "Amubaleke bana bashoonto, alimwi mutabi nibakasha kwaamba bazhize kwangu, kaambo bwami bwakwizeulu mbubwabo baba bali bolya." ¹⁵ Wakababika matashi bana, amane wakakuhwa koko. ¹⁶ Ngoonaawo, mulombwana wakashika kwa Jeso waamba ati, "Mwiiyi, chintuuyi chinjelele kuchita kwaamba nkwate bumi buteeli?" ¹⁷ Jeso wakamwaambila ati, "Nchiiyi nchuumbuzhizha a chintu chibotu? chita bulyo umwi a kuli kabotu, pele waakuzanda kunjila mubumi, bamba malayilile." ¹⁸ Wezu mulombwana wakaamba kwakwe ati, 'Malayilile aliye?" Jeso wakaamba ati, "utabi nukayaya, utabi nuchita bumambe, utabi nuwiba, utabi nuupa bumboni bwakubeya, ¹⁹ lemeka bauso u banoko,alimwi fwuna shimukobonoko mbubona mbuulifwini umwini." ²⁰ Wakaamba wezu mulombwana kwakwe ati, "Shoonse sheshi shintu ndashilemeka. Nchiiyi chimwi nchichizanda?" ²¹ Jeso wakamwaambila ati,"Naakuti ulazanda kwaamba ati ululame, koya, ukasambale shoonse nshuukwete, upe bapengele, ndilelyo nukakwata lubono kwizeulu; wamana uzhize, unchilile." ²² Awo wezo mulombwana nakateelela checho nchaakaamba Jeso, wakaya ulilemene, ukuti kakwete lubono lunji lunji. ²³ Jeso wakaamba kubashichiiya bakwe ati, "Chini chini ndamushimwina, nchinzumu kumuntu muhwubi kunjila mubwami bwakwizeulu. ²⁴ Alimwi ndamushimwina kuti, nchuubauba inkamela kwiita mulinso lya kasonde kutali muntu muhwubi kuya kunjila mubwami bwaka Leza. ²⁵ Bashichiiya nibakaatelela aza, bakazoowa bakaamba ati, "Nguni inzho uuya kufwutuka?" ²⁶ Jeso wakabalanga waamba ati, "Kubantu chechi nchizumu, pele kwa Leza shoonse shintu shilaba." ²⁷ Ngoonaawo Pita wakayingula waamba ati, "Bona, uswe twakashiya shoonse twakakuchilila. Nchiiyi ninzho nchitukazhokelwa?" ²⁸ Jeso wakaamba kwabo ati, "Chini chini ndamushimwina, mumusela wezu lelyo Mwanaa Muntu naakakakala achuuna chabulemu, umwe numwakanchilila amwe mulakakala ashuuna shili ikumi ushobile, kubeteka mishobo ili ikumi uyobile yaba Izilayeli. ²⁹ Wezo woonse wakashiya maanda, banina balombwana, banina bakaintu, baushi,baina na inshi ukaambo kezhina lyangu ulakatambula shiindi shili mwaanda mubunji amana u kukona bumi butamana. ³⁰ Pele banji banji baakuli bataanzhi balakaba kumamanino, u bamamanino balakaba bataanzhi.