¹ Nikwakayita mazuba aali chisambomwi Jeso wakabweza Pita,Jemusi, u Johani munina, wakabatola alupili lulafwu bakaba lwabo beni. ² Wakasanduka abushu bwabo. Bushu bwakwe bwakamweka ukoya izuba, asho nshaakusamine shakabeka ukoya mumuni. ³ Ngoonaawo, kwakababulikila Mozesi u Elija bakakanka kubandika aze. ⁴ Pita wakayingula u kwaamba kwa Jeso ati, "Mwami, chili kabotu kuli uswe kuba kono. Naa ulazanda, ndazaka shifwutu shotatwe--chomwi nchako, alimwi chomwi chaka Mozesi, alimwi chomwi chaka Elija." ⁵ Lelyo nakaakuchaamba, ndilyona lyona, ikumbi libeka lyakabahwumba, ngoonaawo, kwakaba izwi kuhwa mwikumbi, lyaamba ati, "wezu ngu Mwanangu nakufwunwa, umwakwe mwimbotelwa. Amumuteelele," ⁶ Awo bashichiiya nibakachiteelela chechi, bakafwulika mashu abo anshi alimwi bakatiya. ⁷ Ngoona Jeso wakaya wabakwata waamba ati, "Amuzhimuke ulimwi mutatiyi." ⁸ Bamane bakalyaalala pele kwiina ngubakabona unji chita bulyo Jeso iche. ⁹ Lelyo nibakaakunkuluka kuhwa alupili, Jeso wakabashimwina, waamba ati, "mutabi ngumushimwina naaba omwi kuli chechi nchimwabona chita lelyo Mwanaa Muntu naakakabushiwa kuhwa kubafwu." ¹⁰ Bashichiiya bakwe bakamubuzha, baamba ati,"Kaambooyi alimwi balembi balaambaati Elija ulyeelele kutaanguna kushika?" ¹¹ Jeso wakayingula waamba ati, "Elija nchobeni ulakeza kubambulula shoonse shintu. ¹² Pele Ume ndamushimwina, Elija wakashika kale, pele baina nibakamuzhiba pe. Nikuba bobo, bakachita buli mbubazanda nkwaabele. Muzhila njiyona iili bobo aze Mwanaa Muntu ulakapenga kwiita umatashi abo." ¹³ Ngoonaawo bashichiiya bakachiteelelesha kwaamba kaamba aka Johani mupapatizhi. ¹⁴ Lelyo nibakashika kunkamu, umwi mulombwana wakaya kwakwe, wamufwukamina, waamba ati, ¹⁵ "Mwami, mufwile luse mwanangu, ukuti ulawa chakumutwi ulimwi mulwazhisha chini chini. Kaambo lyoonse ulifwini kuwila mumulilo nimuba mumeenzhi. ¹⁶ Ndakamuleta kubashichiiya bako, pele baina nibakamuponya." ¹⁷ Jeso wakabayingula waamba ati, "Umwe numutashomi ulimwi numusela wabashichinguni, nchiindi chili buti nchinkaakala amwe? chiindi chili buti nchindaba amwe? Amumulete kono kwangu." ¹⁸ Jeso wakalemanina shikazwa, ngoona wakamuhwa mukati kakwe, wezu mweembezhi wakaponyewa achiindi checho nchichona. ¹⁹ Ngoona bashichiiya bakaya kwa Jeso kumabali u kwaamba ati,"Kaambooyi uswe twiina kulozha kuchikusha? ²⁰ Jeso wakaamba nkubabele ati,"Kaambo kalushomo lwenu lushoonto. Ulimwi ndamushimwina umwe, kuti mwakwata lushomo ukoya kaseke kashoonto kambuto ya masitaadi, mulakonzha kwaamba kulupili lolu, 'ahwe awa koya kolya,' lwamana lulaswena, kulaakwiina chizumu kwenu pe," ^{21 22} Lelyo nibakaakuchishite mu Galili, Jeso wakaamba kubashichiiya bakwe ati, "Mwanaa Muntu ulakapewa mumatashi aa bantu, ²³ amana balakamuyaya, alimwi mubuzuba bwatatu ulakabushiwa." Bashichiiya bakabiilwa chini chini. ²⁴ Awo nibakashika ku Kapenaumu, balombwana baakubwezelela mutelo bakaya kwa Pita kwaamba ati,"Sa mwiiyi wenu ulatela mutelo?" ²⁵ Wakaamba ati, "Eeye."Awo Pita wakenjila mug'anda, Jeso wakataanguna kubandika u Pita waamba ati, "Ulatelaika buti uwe, Saimoni? Nkukwi bami baanshi nkubabweza mutelo? Kuhwa kubanabo naa kubantu bamwi?" ²⁶ "Kuhwa kuli bamwi," Pita wakayingula. "Nkukuti bana tabatela," Jeso wakaamba. ²⁷ Pele kwaamba tutabachiti bashimutelo kwaamba balifwumpule, koya kuluwatele, kawale kalobo, kakushe munswi njuukaataanguna kukwasha. wakauyula mulomo wanjiyo, ulakayana ipeni. Kalibweze ukalipe bashimutelo uwako uwangu."