¹ Ba Falisi u ba Saduki bakazhiza kumunsunka bamubuzha kwaamba abatondezhe shitondezho kuhwa mwizeulu. ² Pele wakabataba waamba ati, "Aba mangolezha, mulaamba ati, 'Kulaba muuwo mubotu, kaambo mwizeulu mulasubila.' ³ Chaakuli chifwumo fwumo, mulaamba ati, kaambo kakuti mwizeulu mulasubila alimwi kwaba makumbi.' Mulichizhi kupandulula mbuli mbukuboneka mwizeulu, pele tamulozha kupandulula shitondezho sha chiindi u chiindi. ⁴ Mubiyabi alimwi musela wabumambe kaambo ulazandisha shitondezho, pele kwiina chitondezho chikakapewa chita bulyo chitondezho chaka Jona." Ngoonaawo Jeso wakabashiya wakaya. ⁵ Lelyo bashichiiya nibakashika mumutala umwi, bakaluba kubwezelezha shinkwa. ⁶ Jeso wakaamba kwabo ati, "Amulangishe alimwi amuchenjele kubumena bwaba Falisi alimwi uba Saduki." ⁷ Bashichiiya bakalitelaisha lwabo beni bakaamba ati, "Kaambo kakuti twiina kubweza shinkwa." ⁸ Jeso kaabwene aza wakaamba ati,"Umwe nuba shilushomo lushoonto, kaambooyi mulalyaambauzha nubeni beni kwaamba ati kaambo kakuti twiina kubweza shinkwa? ⁹ Saa umwe tamuteelelesha? Saa umwe tamutelaiki shinkwa shosanwe sha bantu bali shuulu shosanwe, alimwi ushinzuma shongaye nshimwakabwezelela? ¹⁰ Naaba shinkwa shili chiloba sha bantu bali shuulu shone, alimwi shili shongaye shinzuma nshimwakabwezelela? ¹¹ Kaambooyi umwe chili bobo kwaamba ati tamulozha kuteelelesha kwaamba Ume nchintaamba kwenu makani aa shinkwa? Amulangishe alimwi muchenjele kubumena bwaba Falisi uba Saduki." ¹² Ngoonaawo bakachiteelelesha kwaamba kataamba kuchenjela kwabumena buli muchinkwa, pele kwaamba bachenjele kukuyiisha kwaba Falisi uba Saduki. ¹³ Inzho lelyo Jeso naakashika kumasena aali kufwaafwi u Kayisaleya Filipi, wakababuzha bashichiiya bakwe, waamba ati, "No bantu balaamba Mwanaa Muntu ati nguni?" ¹⁴ Bakaamba ati, Bamwi balaamba ati Johani mupapatizhi; bamwi, Elija; alimwi bamwi, Jelemiya, naa umwi wabashinshimi." ¹⁵ Wakaamba kwabo ati, "No umwe mulaamba ati Ume ndimeni?" ¹⁶ Kutaba, Saimoni Pita wakaamba ati, "Ndiwe Kilisito, mwanakwe Leza upona." ¹⁷ Jeso wakayingula waamba kwakwe ati, "Ulimulongezhe, Simoni mwanakwe Jona, kaambo mubili u bulowa bwiina kuzubulula sheshi kwako, Pele ngu Taata wezo uuli kwizeulu. ¹⁸ Ame ndaamba kwako ati ndiwe Pita, Alimwi ebwe leli ndazakawo chikombelo changu. Milyango yababo bafwile teekachilozha chechi. ¹⁹ Ume ndakakupa maki aku bwami bwakwizeulu. Kufwumbwa checho nchuukakaanga ano anshi ati chaangwa u kwizeulu, alimwi kufwumbwa nchuwaangulula ano anshi ati chaangululwa u kwizeulu." ²⁰ Ngoonaawo Jeso wakabashimwina bashichiiya kwaamba batashimwini naaba womwi kwaamba ngu Kilisito. ²¹ Kuhwa chiindi checho Jeso wakatalika kubashimwina bashichiiya bakwe kwaamba ati ulyeelele kuya ku Jelusalemu, kuya kupenga mushintu shinji shnji u matashi aaba bakando kando u bapayizhi bakando u balembi, a kayayiwe, alimwi ulakabushiwa kuzhoka kubumi mubuzuba bwatatu. ²² Amane Pita wakamutola kumabali wamulemanina, waamba ati, "Chechi nachibe kulaale kuhwa kwako, Mwami! Chechi chitabi nichichitika kwako!" ²³ Pele Jeso wakachinduluka waamba kwa Pita ati, "Bakumanuma kwangu, Satani! waba chilifwumpuzho changu, kaambo tutelaiki shintu shaka Leza, pele kushintu shabantu." ²⁴ Ngoonaawo Jeso wakaamba kubashichiiya bakwe ati, "Naakuti kuli uzanda kunchilila ume, ulyeelele kulitakata lwakwe mwini, abweze chichinkano chakwe mwini, amana anchilile. ²⁵ Woonse wezo uzanda kunununa bumi bwakwe mwini ulakabuluza, alimwi kufwumbwa wezo uuluza bumi bwakwe kaambo kangu ulakabuyana. ²⁶ No mbulumbuuyi mbwayana muntu kuti wafwuwa luundu loonse pele amana wanangwa bumi bwakwe? Nchiiyi muntu nchaakozha kuchinchanya u bumi bwakwe? ²⁷ U kuti Mwanaa Muntu ulakazhiza mubulemu bwaka Ushi antoomwi u bangelo bakwe. Ngoonaawo ulakapa bulumbu kumuntu woonse kwiingayina u michito yakwe. ²⁸ Chini chini ndamwaambila umwe, kuli bamwi benu bazhimine awa babo bati batakalusoli lufwu mpaka bakamubone Mwanaa Muntu ulazhiza mubwami bwakwe."