¹ Kuchiindi checho, Helodi muleli wakauteelela mulumbe waka Jeso. ² Wakaamba kubasebezhi bakwe ati, "Wezu ngu Johani mupapatizhi; wabuka kuhwa kubafwu. Ubobo sheshi insana shilasebeza muli nguwe." ³ U kuti Helodi kamwaangile Johani, wamwaanga intambo, amane wamubika muntolongo u kaambo ka Helodiyasi, mwinakwe Filipu. ⁴ Kaambo Johani wakaamba kwakwe ati, "Tachili mumulawo kwako kwaamba u mubweze kwaamba abe mwinakwe." ⁵ Helodi naakamuyaya, pele wakaakutiya bantu, kaambo kabamukile kwaamba ati mushinshimi. ⁶ Lelyo buzuba bwakuzhalwa bwaka Helodi nibwakashika, mushimbi mwanakwe Helodiyasi wakazhana akati kabo wakazhana chakumubotezha Helodi. ⁷ Mukuchita bobo, wakamushomezha chakulipinga kwaamba kufwumbwa checho nchaakalomba ulamupa. ⁸ Nakamana kumulayilila bayina, wakaamba ati, "Mpa kono, a mutuba, mutwi waka Johani mupapatizhi." ⁹ Mwami wakapenga mbuli kuli checho nchaakuzanda mushimbi, pele kaambo kakulipinga kwakwe alimwi u kaambo kababo mbubakaakuli abo boonse kusekelela, wakabeta kwaamba chibe mbubona mbwaakaamba. ¹⁰ Wakatuma wamukosola mutwi Johani muntolongo. ¹¹ Amane mutwi wakwe wakaletwa a mutiba u mushimbi wakootola kwa bayina. ¹² Ngoonaawo bashichiiya bakwe bakazhiza, bakaubweza mubili, boozhika. Kumane bobo, bakaya kwa Jeso bamushimwina. ¹³ Ngoonaawo Jeso naakateelela aza, wakakuhwa koko mubwato wakaya kubusena bwiina chiliko. Awo mabunga mabunga naakateelela chechi, bakamuchilila u matende kuhwa muminzhi mikando. ¹⁴ Jeso wakashika balo kabatana kushika amane wakabona mabunga mabunga. Wakabafwila inkumbu wakabaponya balwazhi babo. ¹⁵ Lelyo mangolezha naakashika, bashichiiya bakazhiza kwakwe baamba ati, "Bobu mbusena bwiina bahwawo, amana iwoola kaliitile kale. Wakaamwaazha mabunga mabunga, kwaamba baye mumunzhi balyuulile beni shakulya." ¹⁶ Pele Jeso wakaamba kwabo ati, "Takuzandika kwaamba baye. Amubape chakulya." ¹⁷ Bakaamba kwakwe ati, "Tulikwete bulyo shinkwa shosanwe u tuswi tobile." ¹⁸ Jeso wakaamba ati, "Amushilete kono kwangu." ¹⁹ Ngoonaawo Jeso wakashimwina baakubungene kwaamba bakale anshi a bwizu. Wakabweza shinkwa shosanwe u tuswi tobile. Wakalyaalala mwizeulu, wakalongezha washikomauna shinkwa amane wabapa bashichiiya, abo bashichiiya bakaabanya mabunga mabunga. ²⁰ Boonse bakalya alimwi boonse bakakuta. Bamane bakabwezelela bufwefwelenga bwakashaala bwachakulya---shinzuma shili ikumi u shobile shakazula. ²¹ Babo bakalya kabatandila ku shuulu shosanwe balombwana, kutali bakaintu u bana. ²² Chakufwambaana wakachita bashichiiya kwaamba banjile mubwato amana a bachilile kumutala umwi, awo kachimwaazha mabunga mabunga. ²³ Naakamana kumwaazha mabunga mabunga, wakaya ezeulu a lupili mwini kuya kukomba. Naakaba mangolezha, kachili koko iche mwini. ²⁴ Pele bwato kabuli kale alale u muuma, bwakaumwa u mankwishita, u kuti muuwo koounga kuhwa nkubaakuya. ²⁵ Kabutana kucha bushiku Jeso wakaya nkubabele, kaya bweenda a lwaatele. ²⁶ Lelyo bashichiiya nibakamubona uleza bweenda a lwaatele, bakazhingwa baamba ati, "Wezu musangushi," bamane bakakwiila chakutiya. ²⁷ Pele Jeso wakaamba kwabo ngoona ngoona waamba ati, "Amuzume! Ndime! Mutabi nimutiya pe." ²⁸ Pita wakamwiingula waamba ati, "Mwami, naakuti ndiwe, nshimwina kwaamba nzhize kwako a meenzhi." ²⁹ Jeso wakaamba ati, "Kweza." Ngoonaawo Pita wakamuhwa mubwato wakeenda a meenzhi waya kwa Jeso. ³⁰ Pele awo Pita naakabona muuwo wakomena, wakafwa bukandu. Naakatalika kubila, wakakwiila waamba ati, "Mwami, nfwutula!" ³¹ Jeso chakufwambaana wakatandabika itashi lyakwe, wakamukwata Pita, waamba kwakwe ati, "Uwe u shilushomo lushoonto, kaambooyi wazuluzha?" ³² Awo lelyo Jeso u Pita nibakanjila mubwato, muuwo wakaleka kuunga. ³³ Ngoona bashichiiya baakuli mubwato bakamukomba Jeso baamba ati, "Chini chini uli Mwanaa Leza." ³⁴ Awo nibakalanduka, bakaya a muuma waku Genesaleti. ³⁵ Awo balombwana bamolya mubusena bakamuzhiba Jeso, bakatuma milumbe kumasena woonse a zhingulukile, bakaleta kwakwe woonse wezo wakaakuli mulwazhi. ³⁶ Bakamukumbila kwaamba bakwate bulyo kweela chisani chakwe, boonse banji banji bakachikwata bakaponyiwa.