¹ Ku buzuba bobo Jeso wakamuhwa mung'anda waya kukala kumbali kulwaatele. ² Imbunga inkando yakabungana yamuzhinguluka, wakanjila mubwato wakala pele imbunga yoonse keeli amuuma. ³ Awo Jeso wakaamba shintu shinji shinji nkubabele mutwaambyo. Wakaamba ati, "Amubone, mulimi waya kushanga imbuto, ⁴ Lelyo naakushanga, imwi imbuto yakawila kumabali anzhila, pele bazuni bakazhiza kwiilya. ⁵ Imwi yakawila amabwe, awo a kakwiina bulongo bunji bunji. Shakahwa chakufwambaana kaambo bulongo kabutali bunji bunji. ⁶ Pele lelyo izuba nilyakabala, shakakusa kaambo kakwiina mizanda, shakakusila limwi. ⁷ Shimwi imbuto shakawila mumeya. Meya akakula a kashiyasa. ⁸ Shimwi imbuto shakawila mwihwu ibotu shakamena kabotu, shimwi shakamena shiindi shili mwaanda, shimwi makumi chisambomwi, alimwi shimwi makumi otatwe. ⁹ Wezo walo u kwete matwi, naateelele." ¹⁰ Bashichiiya bakazhiza baamba kwa Jeso ati, "Kaambooyi ulaamba kumabunga mutwaambyo?" ¹¹ Jeso wakayingula waamba kwabo ati, "Mwakapewa chiindi chakuteelelesha masoseke aku bwami bwakwizeulu, pele kuli balo baina kupewa. ¹² Woonse wezo uzandisha ulapewa shinji shinji, amana ulakwata shinji shinji. Pele woonse wezo wiina, choonse checho nchaakwete ulakanangwa acho kuhwa kwakwe. ¹³ Nkukaambo kako Ume ndaamba mutwaambyo: Nikuba kwaamba balabona, taba boni; alimwi nikuba kwaamba balateelela, tabateeleli, naaba kuteelelesha. ¹⁴ Nkubabele bushinshime bwaka Izaya bwazuzukizhiwa, chaamba ati, 'Kupupulala, ulakateelela, pele mwiina nimukakateelelsha; kubona, mulakabona, pele mwiina nimukakazhiba. ¹⁵ Kaambo myonzo ya bantu baba teeteelelesha, alimwi u matwi abo kwiina tabateeleli, bamane baayala menso abo, Nikuba bobo balakonzha kubona u menso abo, naa kuteelela u matwi abo, alimwi u kukonzha kuteelelesha u myonzo yabo u kulonzha kupiluluka alimwi, amana ndakabaponya." ¹⁶ Pele malongezhe menso enu, kaambo a labona; alimwi u matwi enu, a lateelela. ¹⁷ Chini chini Ume ndamwaambila kuti bashinshimi banji banji alimwi u balombwana baluleme balazanda kubona shintu shesho nshimubona amana tamushiboni. Balazandisha kuteelela shintu shesho nshimubona amana tabashiteeleli. ¹⁸ Amuteelele ninzho ku kaambyo ka mulimi wezo ushanga imbuto yakwe. ¹⁹ Naakuti umwi waliteelela izwi lya bwami amana taliteelelesha, u satani uleza kunanga checho chishange mumonzo wakwe. Yezhi njiimbuto yezho yakashangwa kumbali kunzhila. ²⁰ Checho chakashangwa munshi yamumabwe muntu wezo uteelela izwi ngoona walitambula mukubotelwa, ²¹ nikuba bobo wiina minzanda mukati kakwe amana ulakala kwakaindi kashoonto. Lelyo masunko u mapenzhi abako u kaambo kezwi, kufwambaana lilamuhwa mwakwe. ²² Shesho shakashangwa akati a meya, wezu muntu uteelela izwi, pele kuzandisha shaluundu alimwi ukuzandisha lubono chilakazhanya izwi, amana ulaba shikuteezha muchelo. ²³ Imbuto yezho yakashangwa a bulongo bubotu, wezu muntu uteelala izwi ukuliteelelesha. Uleezha muchelo u kuzhala shinji shinji, kutebula ambweni mwaanda, u mumwi makumi chisambomwi, alimwi mumwi shiindi makumi otatwe kwiingaina buli bwakashangwa." ²⁴ Jeso wakaleta alimwi kaambyo nkubabele, waamba ati, "Bwami bwakwizeulu buli ukoya mulombwana wezo ushanga imbuto imbotu mumuunda mwakwe. ²⁵ Pele bantu nibakaakoona, bashinkondonina bakashika abo bakashanga insaku akati ka wiiti bamane bakakuhwa. ²⁶ Lelyo imbuto niyakamena imane yakakusha shishango, ngoona awo insaku yakabulika ayo. ²⁷ Basebezhi bamukamwini muunda bakashika baamba kwakwe ati, 'Mwami, saa wiina niwakashanga imbuto imbotu mumuunda wako? No nkaambooyi ninzho kuli insaku?' ²⁸ "Wakaamba kwabo ati, 'U shinkondo nguwachichicta chechi,' "Basebezhi bakaamba kwakwe ati, 'Saa ulazanda kwaamba tuye tukashizhulaule?' ²⁹ "Mukamwini muunda wakaamba ati, 'Pe pe. Kaambo lelyo mwatalika kuzhulaula insaku, mulaba nimukazhula antoomwi u wiiti. ³⁰ Amushileke shikule antoomwi kushikila tukatebule. Kuchiindi chakutebula Ume ndakaamba kuli batebula, "Amutaangune mukushe insaku mushaange antoomwi kwaamba shitentwe, pele amubike antoomwi wiiti mumubike mumatala angu.''''' ³¹ Alimwi Jeso wakabapa kaambyo u kamwi. Waamba ati, "Bwami bwakwizeulu buli ukoya kaseke ka masitaadi kako muntu nkaabweza amana wakashanga mumuunda wakwe. ³² Kaka kaseke chini chini nkashoontosha kutuseke toonse. Pele lelyo kuti kakomena, nkakandosha kubaala shisamu shili mumuunda. Lilaba isamu, kwamana bazuni bamwizeulu balazhiza kubika shitaanto mumitabi." ³³ Jeso wakabaambila alimwi kaambyo kamwi, "Bwami bwakwizeulu buli ukoya bumena bobo mukaintu mbwaabweza wabusanganye shiindi shotatwe bwa fwulawa kushika mpaka chikande choonse chafwutumuka." ³⁴ Shoonse sheshi shintu Jeso kaamba kumabunga mutwaambyo; amana kwiina nchaakwaamba nkubabele chitali mutwaambyo. ³⁵ Chechi kachili bobo kwaamba checho chakaambwa kwiita mumushinshimi chizuzukizhiwe, Lelyo naakaamba ati, "Ume ndakayalula mulomo wangu mutwaambyo. Ndakaamba shintu shesho shisosekelwe kuhwa kuchiindi nilwakabambwa luundu." ³⁶ Amane Jeso wakaashiya mabunga mabunga waya kunjila mung'anda. Bashichiiya bakwe bakaya kwakwe baamba ati, "Tupandululile kaambyo kansaku yamu muunda." ³⁷ Jeso wakayingula waamba ati, "Wezo ushanga imbuto imbotu ngu Mwanaa Muntu. ³⁸ Muunda mumono muluundu; alimwi imbuto imbotu, baba mbana ba bwami. Insaku baba mbana baba shishibi, ³⁹ amana shinkondo nguwezo wakabashanga ngu shatani. Butebuzhi nkumana kwa musela, alimwi batebuzhi mbuba angelo. ⁴⁰ Ngoonaawo, mbuli insaku mbwiiya kubikwa antoomwi u kutentwa mumulilo, mbubona bobo mbuchiya kuba kumamanino a musela. ⁴¹ Mwanaa Muntu ulakatuma baangelo bakwe, amana balakabungika mubwami bwakwe boonse bashinkilizha alimwi ubabo bachita shitali mumulawo. ⁴² Balakaba sowela munhondo ya mulilo, momo muti mukaakuli kulila u kulumanya meno. ⁴³ Kwamana lelyo bantu baluleme balakamweka u koya izuba mubwami bwaka ushabo. Wezo ukwete matwi , naateelele. ⁴⁴ "Bwami bwakwizeulu buli u koya chintu chibotu chisoseke mu muunda. Checho mulombwana a chiyana amana wachisoseka. Mukubotelwa kwakwe amana waya, waya kuuzha shoonse nshaakwete, amana waula muunda wezo. ⁴⁵ Alimwi, bwami bwakwizeulu buli u koya mulombwana usambala ukapula shintu shikwete muulo mubotu. ⁴⁶ Awo ayana chomwi chintu chili muulo uli kabotu, ulaya kusambala shintu shakwe amana waya kuchuula. ⁴⁷ "Alimwi, bwami bwakwizeulu buli u koya kanyandi kawalwa mulwaatele, kamana kakwasha mishobo yoonse ya nswi. ⁴⁸ Lelyo nikakezula , bazezhi bakakakwela kuya kumuuma. Bakakala anshi bamane bakabungika imbotu botu mushingomo, pele shataakuli kabotu bakashisowa. ⁴⁹ Chilakaba bolya mbubona kumamanino a musela. Baangelo balakazhiza kwiza kwaandaanya babiyabi kuhwa akati kabalulami. ⁵⁰ Balakabasowela mwibibi lya mulilo. momo mukakaba kulila u kulumanya meno. ⁵¹ "Saa mwateelelesha shintu sheshi shoonse?" Bashichiiya bakaamba kwakwe ati, "Eeye." ⁵² Amane Jeso wakaamba kwabo ati, "Ubobo balembi boonse baba bashichiiya kubwami bwakuzeulu buli u koya muntu mukamwini ing'anda, u kusha shintu shakale kale u shipiya kuhwa a shintu shibotu." ⁵³ Amane chakaba bobo lelyo Jeso nakaamana twaambyo, wakakuhwa koko kubusena. ⁵⁴ Ngoonaawo Jeso wakanjila mubusena bwakabo wakayiisha bantu muma sinagogi abo. U chakayanwa nchakwaamba kuti boonse bakazoowa bamane baamba ati, "Nkukwi anu wezu muntu nkwayana bobu busongo bwakwe alimwi usheshi insana shamalele? ⁵⁵ Saa wezu muntu tali mwanakwe shikubeza? saa baina tali Maliya? Saa banina tabali ba Jemusi, Jozefu, Simoni, alimwi u Juda? ⁵⁶ Taali u banina bashimbi tuli abo? Wakashibweza kwi shoonse shintu sheshi?" ⁵⁷ Bakabiilwa kwiita mwakwe. Pele Jeso wakaamba kwabo ati, "Mushinshimi wiina bulemu chita muchishi chakwabo alimwi u kumukowa wakwe mwini." ⁵⁸ Wiina nakachita maleele manji manji koko kaambo kakutahwumina kwabo.