Chaandano 7
1
Nikwakayita shintu sheshi Jeso wakeenda kuzhinguluka mu Galili, kaambo katazanda kuya mu Judeya kaambo ba Juda bakaakupula kumuyaya.
2
Inzho ipobwe lya matente lyaba Juda lyakaba afwaafwi.
3
U bobo banina bakaamba kwakwe ati, "Bushiye bobu busena koya ku Judeya, kwaamba bashichiiya bako abo bakabone milimo yezhi njuuchita.
4
Kwiina naaba womwi u chita shintu kumabali naakuti walo ulakapula kuzhibwa atuba. Naakuti ulachita shintu seshi, litondezhe ku luumdu."
5
U kuti abo banina kabatashomi mwakwe.
6
Jeso u bobo wakaamba kwabo ati, "Chiindi changu tachina kale kushika, pele chiindi chenu chalo nkuchili lyoonse.
7
Luundu talukonzha kumusula umwe, pele lulinswile kaambo Ume ndakapa bumboni kuli ndulo kwaamba ati milimo yandulo njabubiyabi.
8
Umwe kamuya kwipobwe; Ume nshiyiko kwipobwe kaambo chiindi changu tachina kushika kale kukuzuzukizhiwa pe."
9
Awo naakamana kwaamba sheshi shintu kwabo, wakashaala mu Galili.
10
Pele ninzho banina nibakaakwiile kwipobwe, aze wakaya ko, wiina u kaya antangalala pele wakaya mukuzubayila.
11
Ba Juda kabamukapula koko kwipobwe bamane bakaamba ati, "Ngulikwi?"
12
Kwakaba kwaambila ambila kumabali kunji kunji akati kabo kutwaambo twakwe. Bamwi bakaamba ati, "Wezu muntu uli kabotu." Bamwi ati, "Pe pe, ulasowa bantu banji banji."
13
Nikuba bobo kwiina naaba womwi waakwaamba antangalala makani akwe kabatiya ba Juda.
14
Awo ipobwe kalishikile akati kati, Jeso wakaya muchikombelo amane wakatalika kuyiisha.
15
Inzho ba Juda bakazhingwa, baamba ati, "Anu wezu muntu ulizhi buti bolya? Uyina naakayiya."
16
Jeso wakabayingula wakaamba ati, "Koku kuyisha takuli kwangu, pele nkwa wezo wakantuma.
17
Naakuti umwi wazandisha kuchita luzando lwakwe, ulakakuzhiba koku kuyiisha, nakulahwa kwa Leza, naa bulyo ndaamba angu ndimwini.
18
Wezo woonse u waamba akwe mwini ulakapula bulemu bwakwe mwini, pele kufwumbwa ukapula bulemu bwaka wezo wakantuma, wezo muntu uli bwini, amana mwiina shabubiybi mwakwe
19
Saa Mozesi wiina naakamupa milawo? Amana kwiina wenu u bamba milawo. Kaambooyi umwe mulakapula kunjaya?"
20
U bankamu bakayingula, "Ulikwete musangushi. Nguni ukapula kukuyaya?"
21
Jeso wakabayingula amane wakaamba kwabo ati, "Ndachita mulimo womwi, mwamana noonse mulazhingwa u kaambo ka checho.
22
Mozesi wakamupa kupalulwa (takuli kuti chakahwa kwa Mozesi, pele kuhwa kumankambo shesu), amana muchibelu mwakaakupalula muntu.
23
Naakuti muntu wapalulwa mubuzuba bwachibelu kwaamba ati mulawo waka Mozesi utabi nuukononwa, kaambooyi ume mulandemanina kaambo kakuti ndaponya muntu muchibelu?
24
Mutabi nimubeteka kwiingayina umbwaaboneka, pele a mukosole bululeme."
25
Bamwi bakahwa ku Jelusalemu bakaamba ati, "Saa wezu ingwe ngubakapula kuzanda kuyaya?
26
Amubone, ulaamba antangalala, bamana kwiina nchibaamba kwakwe. Tachikonzha kwaamba ati baleli chini chini balizhi kwaamba wezu ngu Kilisito, saa imbo?
27
Amana tulizhi wezu nkwaahwa. Pele lelyo Kilisito a kazhiza, kwiina uya kuzhiba nkwaaya kuhwila pe."
28
Awo Jeso wakapozomoka muchikombelo, kuyiisha u kwaamba ati, "Noonse mulinzhi alimwi mulikwizhi Ume nkundakahwa. Ume ndiina kuhwa kwangu ndimwini, pele wezo walo wakantuma ngwabwini, pele umwe tamumwizhi.
29
Ume ndimwizhi kaambo ndakahwa kwakwe alimwi nguwakantuma."
30
Kabakanza kumukwata, pele kwiina womwi wabo wakabika itashi aali nguwe kaambo chiindi chakwe kachitana kale kushika.
31
Pele banji banji munkamu bakashoma mwakwe, bakaamba ati, "Lelyo Kilisito a kazhiza, saa ulakachita shitondezho kubaala sheshi wezu nshaachita?"
32
Ba Falisi bakabateelela bambunga balahwiya hwiya sheshi shintu shaka Jeso, amane bapayizhi bakando alimwi uba Falisi bakatuma bashilikani kwaamba bamukwate.
33
Jeso awo wakaamba ati, "Ume nchili amwe kwakaindi bulyo kashoonto, ndamana Ume ndaya kuli wezo wakantuma.
34
Umwe mulakankapula pele tamukanjani pe; koko nkwinja, umwe tamukalozha kuyako."
35
Ba Juda bobo bakalyaambauzha beni u beni akati kabo, "No wezu muntu ulazanda kuyakwi koko nkututakaalozha kumuyana? Saa ukalaya kuba Giliki bamweele kuya kuyiisha ba Giliki?
36
Anu mazwiiyi aza alo ngaamba ati, 'Mulakankapula pele tamukanjani; koko nkwinja, umwe tamukalozha kuyako'?"
37
Inzho kumamanino, a buzuba bukando bwepobwe, Jeso wakazhima amane wakapozomoka, wakaamba ati, "Naakuti umwi ulifwile inyota, naazhize kwangu anwe.
38
Wezo walo u shoma mwangu, mbubona malembe mbwaamba ati, milonga ya meenzhi a bumi ilakakunka kuhwa a mubili wakwe."
39
Pele wakaamba chechi kumakani a moza, wezo walo babo bashoma mwakwe bakatambule; moza toona kale kupewa kaambo Jeso katana kale kupewa mulemu.
40
Bamwi bambunga, lelyo nibakateelela mazwi aza, bakaamba ati, "Wezu chini chini mushinshimi."
41
Bamwi bakaamba ati, "Wezu ngu Kilisito." Pele bamwi bakaamba ati, "Saa Kilisito inga wahwa ku Galili?
42
Saa malembe ayina kwaamba ati Kilisito ulakahwila kumukowa waka Devidi alimwi ulakahwa ku Betelehemu, mumunzhi momo Devidi nkwakaakubele?"
43
U bobo kwakaba kwaandaana akati kabo u kaambo kakwe.
44
Bamwi nibakamukwata, pele kwiina naaba womwi wakabika matashi aali nguwe.
45
Awo bashilikani bakabweela kubapayizhi bakando alimwi uba Falisi, balo bakaamba nkubabele ati, "Nkaambooyi mwiina kumuleta?"
46
Bashilikani bakayingula ati, "Kwiina naaba womwi u kalyaambile bolya."
47
Awo ba Falisi bakabayingula ati, "Saa amwe mbubona mwachengwa?
48
Saa kuli baleli bamwi bashoma mwakwe, naa ba Falisi bamwi?
49
Pele imbunga yezho itoozhi mulawo, ati mboombwezhe."
50
Nekodemasi (umwi waba Falisi, wezo wakazhiza kwakwe lutaanzhi) wakaamba kwabo ati,
51
"Saa mulawo wesu ulabeteka muntu kamutana kuteelela kuhwa kwakwe alimwi kamutana kuzhiba u checho nchaachita?"
52
Bakamwiingula bakaamba kwakwe ati, "Saa aze mbubona wakahwa ku Galili? Kapula wamana u bone kwaamba ati kwiina mushinshimi uhwila ku Galili."
53
Bamane umwi umwi wakaya kung'anda yakwe mwini.