Chaandano 6
1
Kumane shintu sheshi, Jeso wakaya kumutala umwi walwaatele lwa Galili, kumwi lulatewa ati lwaatele lwa Tebeliyasi.
2
Ibunga lya bantu lyakamuchilila kaambo bakabona shitondezho shesho nshaakakuchita aali babo bakaakuli balwazhi.
3
Jeso wakaya ezeulu alupili amane wakakala u bashichiiya bakwe.
4
(Inzho ikubi lyakwiitilila, chisobano chaba Juda, kachili afwaafwi.)
5
Awo Jeso wakalanga mwizeulu amane wabona mabunga mabunga a bantu aleza kwakwe, wakaamba kwa Filipu ati, "Nkukwi nkutukonzha kuya kuula shinkwa kwaamba baba boonse balye?"
6
(Pele Jeso wakaamba bobo kwaamba a musunke Filipu, kaambo walo lwakwe mwini keezhi checho nchati naakachita.)
7
Filipu wakamwiingula ati, "Myaanda yobile yama denali ya shinkwa tabakonzha kuzulila umwi uumwi kwaamba alye nikacheya."
8
Umwi wabashichiiya, Andulu, munina Saimoni Pita, wakaamba kwa Jeso ati,
9
"Kuli mweembezhi kono ukwete shinkwa shosanwe alimwi utuswi tobile, pele nchiiyi chechi ku bantu banji banji?"
10
Jeso wakaamba ati, "Bantu a bakale anshi." Inzho kakuli bwizu bunji bunji awo a busena. Balombwana bakakala anshi, kabatandila kushuulu shosanwe kumweelwe.
11
Ngoonaawo Jeso wakabweza shinkwa wapa kulumba, wakashipa kuli babo bakaakushite. Wakachita mbubona u kutuswi, mbubona mbuli mbubakaakuzanda.
12
Awo bantu nibakakuta, wakaamba kuba shichiiya bakwe ati, "Amubwezelele toonse tupazha pazha twashaala, kwaamba kubule chizonauka."
13
Bakabungika bungika bamane bakazuzha shinzuma shili makumi obile sha bufwefwelenga kuhwa kushinkwa shosanwe kuli babo bakalya.
14
Awo lelyo bantu nibakabona chechi chitondezho nchaakachita, bakaamba ati, "Bobu mbwini mushinshimi wezo ukakezhiza muluundu."
15
Awo Jeso nakeezhiba ati balazanda kumukwata kwaamba bamushinikizhe kuba mwami wabo, wakakuhwa alimwi waya alupili kwaamba abe iche mwini.
16
Awo nikwakaba kumangolezha, bashichiiya bakwe bakaya kulwaatele.
17
Bakanjila mubwato, bakaya kumutala wa lwaatele ku Kapenaumu. Kwakashiya kuchecho chiindi, amana Jeso katana kuya nkubabele.
18
Muuwo mukando wakaunga, amana lwaatele lwakakanka kuungisha.
19
Awo nibakakwasula busena bukoya bamaile bashika ku makumi obile u osanwe naaba makumi otatwe a mubulafwu, bakamubona Jeso ulaya bweenda a lwaatele kuya nkubakaakubele kufwaafwi u bwato, bamane bakafwa bukandu.
20
Pele wakaamba kwabo ati, "Ndime Ume! Mutabi nimufwa bukandu."
21
Bamane kabazandisha kumutambula mubwato, ndilyona bwato bwakashika kumuuma koko nkubakaakuya.
22
Buzuba bwakachilila, imbunga yezho yakaakuzhimine kumutala umwi walwaatele bakabona ati kwiina bumwi bwato bwakaakusheele chita bulyo bomwi, pele Jeso wiina nakanjila mumo u bashichiiya bakwe pele bashichiiya bakwe kabayile kale beni.
23
Nikuba bobo, kakuli u mato amwi a kahwa ku Tebeliyasi kufwaafwi u busena bobo mbubakalila shinkwa amane Mwami kupa kulumba.
24
Awo imbunga niyakazhiba kwaamba Jeso nibaba bashichiiya bakwe kwaamba ati kwiina wakakuliwo, lwabo beni bakanjila mumato bamane bakaya ku Kapenaumu kuya bukapula Jeso.
25
Nibakamana kumuyana kumutala wa lwaatele, bakaamba kwakwe ati, "Labi, wakazhiza liliye kono?"
26
Jeso wakabayingula, wakaamba ati, "Chini, chini, mulakapula ume, tachili kuti mwakabona shitondezho, pele kaambo mwakalya shimwi shinkwa amana mwakakuta.
27
Mutabi nimupenga ku chakulya checho chiya kufwa, pele mupengele chakulya checho chikalilila mubumi butakamana bobo Mwanaa Muntu mbwaapa, kaambo Leza Taata wakabika chikanto aali nguwe."
28
Bamane bakaamba kwakwe ati, "No uswe tulachita buti, kwaamba tuchite milimo yaka Leza?"
29
Jeso wakabayingula wakaamba ati, Wezu ngu mulimo waka Leza: Kwaamba mushome mwakwe wezo wakatumwa."
30
Bamane bakaamba kwakwe ati, "Nchitondezhooyi inzho nchuukachita, kwaamba ati uswe tubone twamana tukushome? Nchichiliye nchuukachita?
31
Maushesu bakalya manna mulukula, mbubona mbuchilembelwe, 'Wakabapa chinkwa chakahwa kwizeulu kwaamba balye.'''
32
Amane Jeso wakabayingula, "Chini, chini, katali Mozesi wakamupa chinkwa kuhwa kwizeulu, pele kali Taata walo upa chinkwa chini chini chihwa kwizeulu.
33
Kaambo chinkwa chaka Leza nchichecho chalo chihwa kwizeulu chipa bumi ku luundu."
34
Bamane bakaamba kwakwe ati, "Mwami, tupe chinkwa chechi lyoonse."
35
Jeso wakaamba kwabo ati, "Ume ndime chinkwa cha bumi; Wezo uzhiza kwangu wiina naati a kafwe inzala, alimwi u wezo ushoma mwangu kwiina naati akafwe inyota.
36
Pele Ume ndamwaambila kwaamba ati chini chini mwambona, mwamana tamushomi.
37
Woonse wezo Taata ngwaakampa ulakazhiza kwangu, alimwi wezo uzhiza kwangu Ume kwiina ngwinkaakatanda.
38
Ume ndakazhiza anshi ano kuhwa kwizeulu, kutali kuchita kuzanda kwangu, pele kuzanda kwa wezo walo wakantuma.
39
Koku nkukuzanda kwakwe wezo walo wakantuma, kwaamba Ume nshikaluza naaba womwi wababo boonse mbaakampa, pele ulakababusha boonse kubuzuba bwamamanino.
40
Kaambo koku nkukuzanda kwaka Taata, kwaamba kufwumbwa wezo wabona Mwana amana washoma mwakwe ulakaba u bumi butamana amana ndakamubusha mubuzuba bwamamanino."
41
Amane ba Juda bakapenga aaka Jeso kaambo wakaamba ati, "Ume ndime chinkwa checho chakahwa kwizeulu."
42
Bakaamba ati, "Saa wezu tali mwanakwe Jozefu, uuli baushi u baina mbutwizhi? Kaambooyi ninzho ulaamba ati, 'Ume ndakazhiza anshi ano kuhwa kwizeulu'?"
43
Jeso wakabayingula amane wakaamba kwabo ati, "Amuleke kupenga akati kenu nubeni.
44
Kwiina naaba womwi ukonzha kuzhiza kwangu chita Taata walo wezo wakantuma wamuleta kwangu, amana ndakamubusha kubuzuba bwamamanino.
45
Chechi chililembelwe mubashinshimi, 'Woonse ulakayiishiwa u Leza.' Woonse wezo wakateelela u kwiiya kuhwa kwa Taata uleza kwangu.
46
Takuli kuti kuli umwi wakamubona Taata, chita wezo wakahwa kwizeulu---nguwakamubona Ushi.
47
Chini, chini, woonse wezo ushoma ulikwete bumi butamana.
48
Ume ndime chinkwa chabumi.
49
Maushenu bakalya manna mulukula, bamane bakafwa.
50
Chechi nchichinkwa checho chakahwa kwizeulu, kwaamba ati muntu alye chimwi amana a takafwi.
51
Ume ndime chinkwa chabumi checho chakahwa kwizeulu. Naakuti umwi wachilya chimwi chechi chinkwa, ulakapona kwa lyoonse. Chinkwa checho Ume nchinkapa mubili wangu kubumi bwa luundu."
52
Ba Juda bakalemana akati kabo beni bamane bakatalika kukazhanya beni u beni, bakaamba ati, "Anu mbubuti wezu muntu mbwaakonzha kutupa mubili wakwe kwaamba tulye?"
53
Amane Jeso wakaamba kwabo ati, "Chini, chini, chita bulyo mukalye mubili wa Mwanaa Muntu alimwi u kunwa bulowa bwakwe, tamukakwati bumi mukati kenu.
54
Woonse wezo ulya mubili wangu alimwi u kunwa bulowa bwangu ulakakwata bumi butamana, amana Ume ndakamubusha kubuzuba bwamamanino.
55
Kaambo mubili wangu nchakulya chini chini, alimwi bulowa bwangu nchakunwa chini chini.
56
Wezo woonse ulya mubili wangu u kunwa bulowa bwangu ulakalilila muli ume, amana ame muli nguwe.
57
Bobo Taata upona mbwaakantuma, mbubona Ame mbwimpona kaambo kaka Taata, u bobo woonse ulya ume, aze ulakapona kaambo kangu.
58
Chechi nchichinkwa checho chakahwa kwizeulu, kutali maushesu nshibakalya bane bakafwa. Woonse wezo ulya chinkwa chechi ulakapona kwa lyoonse."
59
Pele Jeso wakaamba shintu sheshi mu Sinagogi lelyo naakaakuyiisha mu Kapenaumu.
60
Awo bashichiiya bakwe banji banji babo bakachiteelela chechi bakaamba ati, "Koku kwaamba kulakatazha; nguni ukonzha kuchiteelela chechi?"
61
Jeso, kaambo kezhi mukati kakwe mwini kwaamba ati bashichiiya bakwe bakapengana kuli chechi, wakaamba kwabo ati, "Saa chechi chamubishizha?
62
Inzho chili buti lelyo mwakamubona Mwanaa Muntu ulaya mwizeulu momo mwaakaakubele?
63
Moza nguupa kupona; mubili wiina bulumbu mbuukwete. Mazwi azo Ume ngwindahwa kwaamba kwenu nga moza, alimwi nga bumi.
64
Amana nkubali bamwi benu babo batashomi." Kaambo Jeso kezhi kuhwa kumatalikilo babo bakaakulozha kutashoma alimwi u wezo shikumwaaba.
65
Wakaamba ati, "U bobo nchichecho chechi nchindaamba kwenu ati kwiina naaba womwi ukonzha kuzhiza kwangu chita kuti chapewa kwakwe kuhwa kwa Taata."
66
Kaambo kachechi, banji banji bashichiiya bakwe bakakuhwa kwakwe bakaleka kweenda aze.
67
Amane Jeso wakaamba kuli bali ikumi u bobile ati, "Saa tamuzanda kuya amwe, naa mbuti?"
68
Simoni Pita wakamwingula ati, "Mwami, nkwani koko nkutukaya? Ulikwete mazwi a bumi butamana,
69
twamana twakakushoma u kukuzhiba kwaamba ndiwe Wezo Usalala waka Leza."
70
Jeso wakaamba kwabo ati, "Saa Ume ndiina indakamusala, nubali ikumi u bobile, umwi wenu mubiyabi?"
71
Inzho kaamba aka Judasi mwanakwe Simoni Sikaliyoti, kali nguwe, wababo bali ikumi u bobile, wezo u kakamwaaba Jeso.