Chaandano 4
1
Inzho lelyo Jeso naakazhiba kwaamba ati ba Falisi bakachizhiba checho nchaakaakuchita alimwi u kupapatiza bashichiiya kubaala Johani
2
(Nikuba bobo Jeso lwakwe mwini katapapatizi, bashichiiya bakwe mbubakaakupapatiza),
3
wakakuhwa ku Judeya amane wakapiluka alimwi ku Galili.
4
Pele kacheelela alimwi kwiita mu Samaliya.
5
U bobo wakaya mu munzhi wa Samaliya, utewa ati Sika, kufwaafwi kuchipanzha chanshi yezho Jokobo njaakapa Jozefu mwanakwe.
6
Mukalo waka Jakobo kooliwo. Jeso wakakatala kuhwa kumushinzo wakwe amane wakakala kufwaafwi u mukalo. Chiindi kachili ukoya kwi woola lya chisambomwi.
7
Umwi mukaintu mu Samaliya wakazhiza kwiza kuteka meenzhi, amane Jeso wakaamba kwakwe ati, "Mpa meenzhi a kunwa."
8
Bashichiiya bakwe kabayile kuya kuula chakulya mumunzhi.
9
Wezo mukaintu mu Samaliya wakaamba kwakwe ati, "Anu chili buti uwe, mbuuli mu Juda, ulankumbila, ume ndimu mukaintu mu Samaliya, kwaamba nkupe cha kunwa?" Kaambo ba Juda kwiina nchibakwatizhanya uba Samaliya.
10
Jeso wakamwiingula wakaamba kwakwe ati, "Kuti uwe nuwaakwizhi chipo chaka Leza, alimwi kuti nguni wezo u waamba kwako ati, 'Mpa chakunwa,' uwe nuwamukumbila, alimwi naakupa meenzhi a bumi."
11
Mukaintu wakaamba kwakwe ati, "Mwami, wiina chibbakete alimwi mukalo mulafwu. Kayi ninzho meenzhi a bumi alikwi?
12
Saa uwe uli mukandosha, aa, kubaala ushesu Jakobo, u wakatupa mukalo aze wakaakunwa mo lwakwe mwini, u banakwe alimwi ushifwiiwa shakwe?"
13
Jeso wakayingula wakaamba kwakwe ati, "Woonse wezo u kakanwa kumeenzhi aza ulakafwa alimwi inyota,
14
pele wezo woonse ukanwa kumeenzhi azo ngwinkamupa wiina naati a kafwe linji inyota alimwi. U bobo, meenzhi azo ngwimupa Ume kalakaba kasensa ka meenzhi mwakwe, kankunka kuya ku bumi butamana."
15
Mukaintu wakaamba kwakwe ati, Mwami, mpako meenzhi azo kwaamba intakafwi linji inyota alimwi ndeke kwiza linji kono kuteka meenzhi."
16
Jeso wakaamba kwakwe ati, "Koya, kamwite mulumyaako, wamana uzhoke kono."
17
Mukaintu wakamwiingula wakaamba kwakwe ati, "Ndiina mulumyaangu." Jeso wakayingula ati, "Waamba meni meni, 'Kwaamba ndiina mulumyaangu,'
18
U kuti wakaakukwete balumyaako bosanwe, pele nguukwete ninzho awa tali mulumyaako. Nchiwahwa kwaamba choonse nchabwini."
19
Mukaintu wakaamba kwakwe ati, "Mwami, Ume ndabona ninzho kwaamba ati uli mushinshimi.
20
Maushesu kabakomba awa alupili, pele ulaamba ati Jelusalemu mbubusena koko bantu nkubeezhi kuya kukombela."
21
Jeso wakaamba kwakwe ati, "Nshoma ume, mukaintu, kwaamba iwoola lilakashika lelyo nimukaka mukomba Taata mutali mumapili nimuba mu Jelusalemu.
22
Umwe mulakomba checho nchimutezhi. Uswe tulakomba checho nchitwizhi, kaambo lufwutuko lulahwila kuba Juda.
23
U bobo, iwoola lilakashika, alimwi indilyo leli ano, awo bakombi beni beni balakamukomba Taata mu moza alimwi u mu bwini, kaambo Taata ulakapula bantu bali bolya kwaamba babe bakombi bakwe.
24
Leza ngu moza, alimwi bantu babo bamukomba balyeelele kumukomba mu moza u mu bwini."
25
Mukaintu wakaamba kwakwe ati, "Ume ndizhi kwaamba Mesaya ulakashika (wezo utewa ati Kilisito). Walo a kashika, ulakatupandululila shoonse ."
26
Jeso wakaamba kwakwe ati, "Ndime Ume, wezo u bandika kwako."
27
Ku chiindi checho bashichiiya bakwe bakazhoka. Inzho bakazhingwa kuyana kwaamba ati wakaakubandika u mukaintu, pele kwiina wakaamba ati, 'Nchiiyi nchuukapula?" nikuba
ati "Kaambooyi uwe ulabandika aze?"
28
Awo wezu mukaintu wakayishiya intesho yakwe ya meenzhi, wakapiluka mu munzhi, amane wakaamba ku bantu ati,
29
"Kamwiza, mubone muntu wanshimwina shintu shoonse shesho ume nshakanchitikila. Saa wezu takabi Kilisito, naa mbuti?"
30
Bakamuhwa mu munzhi bakaya nkwaakubele.
31
Ku chiindi checho, bashichiiya bakaakumushinikizha, kwaamba ati "Labi, lya."
32
Pele walo wakaamba kwabo ati, "Ume ndikwete chakulya checho umwe nchimutezhi."
33
Inzho bashichiiya bakaamba kuli umwi uumwi, "Ambweni kuli wezo wamuletela chakulya, alo kuli?"
34
Jeso wakaamba kwabo ati, "U chakula changu nkuchita luzando lwaka wezo walo wakantuma amana u kumaninzha mulimo wakwe.
35
Saa tamwaamba ati, 'Kwashaala bulyo myeezhi yone ati kutebula kushike'? Ume ndaamba kwenu ati, Amulange mubone mu myuunda, kaambo shilibizilwe kale kushika a kutebula!
36
Wezo woonse u tebula ulatambula bulumbu amana ulabungika michelo kushika kubumi butamana, kwaamba ati wezo ushanga alimwi u wezo u tebula bakabotelelwe limwi antoomwi.
37
Kaambo muli chechi kuli kaambyo kaamba ati, 'Umwi ulashanga, amana umwi ulatebula,' meni meni.
38
Ume ndakamutuma kuli checho nchimwatakasebezela. Bamwi bakachipengela, amana umwe mwakanjila bulyo momo mubakasebeza."
39
Banji banji ba Samaliya muchishi chelya bakashoma mwakwe u kaambo ka wezo mukaintu walo wakapa bumboni, "Ati wakanshimwina shesho shoonse nshindakachita."
40
Inzho ba Samaliya nibakashika kwakwe, bakamukumbila kwaamba a kale abo, amana bakakala koko kwa mazuba obile.
41
Banji banji u bamwi bakashoma u kaambo ka mazwi akwe.
42
Bakaamba kwakwe mukaintu ati, "Uswe tatuchishomi u kaambo nkuwa kaamba pe, kaambo twaliteelelela tubeni, amana twazhiba kwaamba wezu chini chini ngumufwutuli wa luundu."
43
Nikwakayita azo mazuba obile, wakakuhwa koko wakaya ku Galili.
44
Jeso lwakwe mwini wakachibika atuba kwaamba ati mushinshimi wiina bulemu muchishi chakwe.
45
Awo naakashika mu Galili, bantu bamu Galili bakamutambula. Bakashibona shoonse shintu shesho nshaakaakuchita mu Jelusalemu kuchisobano, kaambo abo kabayile ko kuchisobano.
46
Ngoonaawo wakaya alimwi ku Kana molya mu Galili, kolya nkwaakapanga meenzhi kuba waini. Kwakaakuli umwi wakaakusebeza mung'anda ya bwami mwanakwe mu Kapenaumu kali mulwazhi.
47
Lelyo naakateelela ati Jeso wahwa ku Judeya ulaya ku Galili, wakaya kwa Jeso amane wakamukumbila kwaamba aye kuya kuponya mwanakwe, walo wakaakuli afwaafwi u kufwa.
48
Jeso awo wakaamba kwakwe ati, "Umwe chita mwabona shitondezho u shizoosha, umwe tamuhwumina."
49
Wezo mulemu wamu bwami wakaamba kwakwe ati, "Mwami, zhiza kwangu mwanangu katana kufwa."
50
Jeso wakaamba kwakwe ati, "Koya. Mwanako wapona." Wezu mulombwana wakashoma izwi lelyo Jeso ndyaakaamba kwakwe, amane wakaya.
51
Awo kachiya buya, basebezhi bakwe bakamuswaanganya, bakaamba ati mwanakwe wakapona.
52
Awo wakababuzha iwoola lelyo nakatalika kuteelela kabotu. Bakamwingula ati, "Uzona lyayita kwi woola lya chiloba umbili niwakamuleka."
53
Ngoonaawo ushi wakazhiba kwaamba kalili iwoola lelya ndilyona Jeso naakaamba kwakwe ati, "Mwanako wapona." U bobo lwakwe mwini alimwi u bang'anda yakwe bakashoma.
54
Chechi nchichakaakuli chitondezho chabili checho Jeso nchaakachita lelyo naakahwa mu Judeya kuya ku Galili.