¹ Inzho kakuli mu Falisi waakukwete izhina lya Nekodemasi, kali musololi waba Juda. ² Wezu mulombwana wakazhiza kwa Jeso mashiku wakaamba ati, "Labi, tulizhi kwaamba ati uli mwiiyi wezo wakahwa kwa Leza, kaambo kwiina naaba womwi ukonzha kuchita shitondezho sheshi shesho nshuuchita chita bulyo Leza kali aze." ³ Jeso wakamwiingula wakaamba ati, "Chini, chini, chita umwi wazhalwa alimwi, takalozha kubona bwami bwaka Leza." ⁴ Nekodemasi wakaamba kwakwe ati, 'No muntu ulazhalwa buti a kuli mukando kale? Talozha kunjila lwabili mwifwu lyaka baina amana azhalwe, saa chilaba?' ⁵ Jeso wakamwiingula ati, "Chini, chini, chita umwi wazhalwa ku meenzhi alimwi uku moza, takalozha kunjila mubwami bwaka Leza. ⁶ Checho chalo chizhalwa kumubili ati mubili, alimwi chechi chalo chizhalwa ku moza ati moza. ⁷ Utabi nuuzhingwa kuli checho Ume nchindahwa kwaamba kwako, 'Ulyeelele kuzhalwa lwabili.' ⁸ Muuwo ulaunga kufwumbwa nkuuzanda; ulateelela muhuumo, pele tukonzha kuzhiba nkuuhwa nikuba koko nkuuya. Umbona bobo umwi uumwi wezo muzhale ku moza." ⁹ Nekodemasi wakayingula amane wakaamba kwakwe ati, "No sheshi shintu shilakaba buti?" ¹⁰ Jeso wakamwiingula amane wakaamba kwakwe ati, "Inta uli mwiiyi wamu Izillaili, amana pele tushiteelelesha shintu sheshi? ¹¹ Chini, chini. Ume ndakushimwina, tulaamba nchitwizhi, alimwi tulapa bumboni kuli nchitwakabona. Nikuba bobo tamuhwumina kubumboni bwesu. ¹² Naakuti Ume ndakushimwina shaanshi ano wamana tushomi, no ulashoma buti ndakushimwina shintu shakwizeulu? ¹³ Kwiina naaba womwi wakaya kwizeulu chita bulyo wezo wakaseluka kuhwa kwizeulu--- Mwanaa Muntu. ¹⁴ Inzho mbubona aze Mozesi mbwaakazhimika muzoka mulukula, aze Mwanaa Muntu ulyeelele kusumpulwa, ¹⁵ kwaamba boonse bashoma mwakwe bayane bumi buteeli. ¹⁶ Kaambo Leza wakazandisha luundu, kwaamba ape bulyo Mwanakwe womwi nana, kufwunbwa wezo u shoma mwakwe takafwililili pele ulakaba u bumi buteeli. ¹⁷ Leza wiina naakatuma Mwana muluundu kwaamba a bishe bishe luundu pe, pele kwaamba afwutule luundu kwiita mwakwe. ¹⁸ Woonse wezo u shoma mwakwe takabishiwa pe, pele wezo utashomi walo wabishiwa kale kaambo wiina naakashoma mwizhina lya Mwanakwe Leza walo. ¹⁹ Kaka nkukaambo keni kalubeta: Mumuni washika muluundu, amana bantu balazandisha mushinze kubaala mumuni kaambo michito yabo keeli yabubi. ²⁰ Kaambo woonse wezo uchita bubi ulasula mumuni, amana tazhiza kumumuni, kwaamba michito yakwe italibonya. ²¹ Nikuba bobo, wezo uchita bwini ulazhiza kumumuni kwaamba ati chilozhe kulibonya atuba kuti michito yachitwa mubu Leza." ²² Nikwakaita chechi, Jeso bakaya mukati muchishi cha Judeya. Kolya wakatola kaindi kabali abo alimwi u kupapatiza. ²³ Inzho aze Johani wakaakupapatiza mu Anoni kufwaafwi ku Salimu kaambo kakuli meenzhi manji manji koko. Bantu bakazhiza kwakwe bamane bakaakupapatizwa, ²⁴ U kuti Johani katana kusowelwa muntolongo. ²⁵ Ngoonaawo kwakabuka kutateelezhanya akati kabamwi bashichiiya baka Johani alimwi uba Juda kukanshiya nshiya kakusamba. ²⁶ Bakaya kwa Johani bakaamba kwakwe ati, "Labi, wezo walo ngumwakaakuli aze kumutala welya wa mulonga Jodani, wezo walo nguwakapela bumboni, bona, ulapapatiza, alimwi banji banji balaya kwakwe." ²⁷ Johani wakayingula ati, "Muntu takonzha kutambula chita kuti chapewa kwakwe kuhwa kwizeulu. ²⁸ Umwe lwenu nubeni mulakonzha kupa bumboni kuli checho nchindakaamba ati, 'Ume indime Kilisito,' pele bulyo, 'Ume ndakatumwa bulyo kumbele lyakwe.' ²⁹ Nabwiinga ngwakwe shibwiinga. Inzho mweenzhiina shibwiinga, wezo uzhimine alimwi u kumuteelela, ulabotelwa chini chini kaambo kezwi lya shibwiinga. Chechi, ninzho, kubotelwa kwazulila. ³⁰ Ulyeelele kuzungila, pele Ume ndyeelele kuzhoka munshi. ³¹ Wezo woonse uhwa kwizeulu uli ezeulu aali shoonse. Wezo walo wakahwa ano anshi ngwa anshi alimwi ulaamba shintu shaanshi. Wezo woonse uhwa kwizeulu ulabaala ali shoonse. ³² Ulapa bumboni kuli nshaakabona u kuteelela, pele kwiina naaba womwi u hwumina bumboni bwakwe. ³³ Wezo woonse watambula bumboni bwakwe wahwumina kwaamba ati Leza ngwabwini. ³⁴ Kaambo wezo walo Leza ngwaakatuma ulaamba mazwi aka Leza. Kaambo tapi moza kwiita mukupima. ³⁵ Baushi balamuzanda Mwana amana wabika shoonse shintu mumatashi akwe. ³⁶ Wezo woonse u shoma Mwana ulikwete bumi buteeli, pele woonse wezo u talemeka Mwana takabuboni bumi, pele bukali bwaka Leza bulakakalilila aze."