¹ Inzho chifwumo fwumo mubuzuba butaaanzhi bwa nsunda, kakuchishiya shiya, Maliya Magadalena wakaya ku chuumbwe amane wakabona ibwe ndikunkulushe kuhwa ku chuumbwe. ² Wakalukanka kuya kwa Saimoni Pita alimwi uku bashichiiya bamwi babo mbaakaakufwini Jeso, amane wakabaambila ati, "Bamukusha Mwami kuhwa muchuumbwe, amana tatukwizhi koko nkubamooneka." ³ Bamane Pita alimwi u bashichiiya bakahwa, bamane bakaya ku chuumbwe. ⁴ Boonse bakalukanka antoomwi, bamane bashichiiya bakalukankisha bakamushiya Pita bakafwambaana kushika ku chuumbwe. ⁵ Naakakunkuluka kuya anshi, wakashibona shisani shilibikilwe awo ngaakaakulele, pele wiina naakanjila mukati. ⁶ Saimoni Pita wakashika aze munshi lyabo amane wakanjila mu chuumbwe. wakashibona shisani shilibikilwe awo ngaakaakulele ⁷ alimwi u shisani checho nchaakaakwaangilwe ku mutwi wakwe. Chalo kachitali antoomwi u shisani shimwi pele kachihwungilwe iche a busena bwanchicho chini. ⁸ Kumane shichiiya omwi, wezo wakataanguna kushika ku chuumbwe, aze wakanjila mukati, amane wakabona u kushoma. ⁹ Kushika u checho chiindi kabatezhi kwaamba malembe alaamba ati ulyeelele kubuka kuhwa kubafwu. ¹⁰ Bashichiiya bakaya kumunzhi alimwi. ¹¹ Pele Maliya wakaakuzhimine ansengwe a chuumbwe kalila. Awo naakaakulila, wakakunkulukila muchuumbwe. ¹² Wakabona baangelo bobile baakusamine shituba balishite, umwi kumutwi, alimwi umwi kumatende awo a kaakulele mubili waka Jeso. ¹³ Bakaamba kwakwe ati, "Mukaintu, kaambooyi ulalila?" Wakaamba kwabo ati, "Kaambo bamutola Mwami wangu, amana nshikwizhi koko nkubamubika." ¹⁴ Awo naakaamba chechi, wakachinduluka wakamubona Jeso ulizhimine, pele wiina naakazhiba ati ngu Jeso. ¹⁵ Jeso wakaamba kwakwe ati, "Mukaintu, kaambooyi ulalila? Nguni wezo nguukapula?" Wakatelaika kwaamba ati ngushimuunda, wakaamba kwakwe ati, "Mwami, naakuti ndiwe wamubweza, nshimwina koko nkuwamubika, amana Ume ndamubweza." ¹⁶ Jeso wakaamba kwakwe ati, "Maliya, wakachinduluka amane wakaamba kwakwe muchi Alamayiki ati, "Laboni" (chalo chaamba ati "Mwiiyi"). ¹⁷ Jeso wakaamba kwakwe ati, "Utabi nuunkwata, kaambo Ume nshina kuya kale kwa Taata, pele koya kubakwesu u kaambe kwabo ati Ume ndaya kwizeulu kwa Taata Ushenu, alimwi kwa Leza wangu amwe Leza wenu." ¹⁸ Maliya Magadalena wakashika amane wabashimwina bashichiiya, "Ume ndamubona Mwami," amane wang'ambila shintu sheshi. ¹⁹ Kumangolezha a buzuba bobo, buzuba butaanzhi bwa nsunda, shitendele kashili shiyale koko bashichiiya nkubakaakubele nibakaakutiya ba Juda, Jeso wakashika a kati kabo amane wakaamba ati, "Luumuno lube amwe." ²⁰ Naakamana kwaamba chechi, wakabatondezha matashi akwe alimwi u kunhwabuti. Bashichiiya bakabotelwa lelyo nibakamubona Mwami. ²¹ Jeso wakaamba kwabo alimwi ati, "Luumuno alube kwenu. Mbubona Taata mbwaakantuma, Ame ndamutuma." ²² Awo Jeso naakaamba chechi, wakabafwula moza amane wakaamba ati, "Amutambule moza usalala. ²³ Kufwumbwa wezo ngumukakalekelela shibi, ati shalekelelwa; kufwumbwa wezo ngumutakaalekelela shibi, ati shiina kulekelelwa." ²⁴ Tomasi, umwi wababo bali ikumi u bobile, waakutewa ati Didimasi, katali abo lelyo Jeso naakazhiza. ²⁵ Bashichiiya bamwi ashike bakaamba kwakwe ati, "Twamubona Mwami," Wakaamba kwabo ati, "Chita Ume ngabone matashi akwe u momo mwakayita inembe, ndamana mbike munwe wangu awo a kayita inembe, alimwi mbike itashi aluhwabuti lwakwe, Ume nshishomi." ²⁶ Nikwakayita mazuba ali lusele bashichiiya bakwe bakanjila mukati alimwi, aze Tomasi kali abo. Jeso wakanjila pele kumulyango kakuli kuyale, amane wakazhima akati kabo, wakaamba ati, "Luumuno alube kwenu." ²⁷ Amane wakaamba kwa Tomasi ati, "Swena kono leta munwe wako wamana ubone matashi angu. Swena kono itashi lyako ulibike kuluhwabuti lwangu. Utabi nuuzuluzha, pele shoma." ²⁸ Tomasi wakayingula wakaamba kwakwe ati, "Mwami wangu alimwi u Leza wangu." ²⁹ Jeso wakaamba kwakwe ati, "Kaambo wambona, inzho washoma. Mbalongezhe babo bayina kubona, pele balashoma." ³⁰ Inzho Jeso wakachita u shimwi shitondezho shinji shinji a bushu bwa bashichiiya, shitondezho shesho shalo shatakalembwa mwibuka leli, ³¹ pele sheshi shakalembwa kwaamba ati mushome ati Jeso Kilisito, Mwanakwe Leza, amana mukushoma mulakayana bumi kwiita mwizhina lyakwe.