¹ Kumane shintu sheshi Jeso wakalitondezha alimwi ku bashichiiya ku lwaatele lwa Tebeliyasi. Mbubolya mbwaakalitondezha: ² Saimoni Pita kali antoomwi u Tomasi utewa ati Didimasi, Natanewo waku Kana mu Galili, mwanakwe Zebede, alimwi u bamwi bobile bashichiiya baka Jeso. ³ Saimoni Pita wakaamba kwabo ati, "Ume ndaya nkazele." Bakamwaambila ati, "Aswe, mbubona, tulaya aze." Bakaya bamane bakanjila mubwato, pele kwiina nchibakayaya mashiku woonse. ⁴ Inzho, awo kachili kale kuchifwumo fwumo, Jeso wakakala a mutala, pele bashichiiya kabatezhi kwaamba ati kali Jeso. ⁵ Jeso wakaamba kwabo ati, "Nubeenzuma, saa mulikwete chakulya?" Bakamwiingula ati, "Kwiina," ⁶ Wakaamba kwabo ati, "A mufwuse kanyandi kenu kululyo lya bwato, muyana shimwi." Bakakawaala kanyandi kabo bamane bakakakilwa kukakwelela mukati u kaambo kanswi kuhwula. ⁷ Ngoonaawo u shichiiya wezo ngwaakaakufwini Jeso wakaamba kwa Pita ati, "Ngu Mwami." Awo Saimoni Pita naakateelela ati ngu Mwami, wakalyaanga chikobelo cheezeulu (kaambo katasamine), amane wakaliwaala mu lwaatele. ⁸ Bashichiiya bamwi bakazhiza u bwato (kaambo kabatasakene kuhwa kumuuma, kaali u koya myaanda yobile yama kyubitis kuhwa kumuuma), bamana kabaya bukwela kanyandi kaakuzwile inswi. ⁹ Awo nibakahwa kumuuma, bakabona mulilo wa mashimbi inswi keebikilwe a mulilo, u chinkwa. ¹⁰ Jeso wakaamba kwabo ati, "Amulete shimwi inswi shesho nshimwakwasha." ¹¹ Saimoni Pita amane wakaya kukakwela kanyandi kumuuma, kakazwile inswi inkando, mwaanda u makumi osanwe u inswi shotatwe, pele nishihwula bobo, kanyandi kayina kukazapuka. ¹² Jeso wakaamba kwabo ati, "A muzhize mulye chakulya chachifwumo fwumo." Kwiina naaba womwi shichiiya wakasoleka kumubuzha ati, "Ndiweni?" Bakazhiba ati ngu Mwami. ¹³ Jeso wakazhiza, wakabweza chinkwa, amane wabapa, alimwi inswi mbubona. ¹⁴ Lolu kaluli lwatatu Jeso kulizubulula ku bashichiiya kuhwa naakabuka kubafwu. ¹⁵ Nibakamana kulya chachifwumo fwumo, Jeso wakaamba kwa Saimoni Pita ati, "Saimoni mwanakwe Johani, saa ulifwini kubaala baba bamwi?" Pita wakaamba kwakwe ati, "Ee ye Mwami, ulizhi ati Ume ndikufwini." Jeso wakaamba kwakwe ati, "Sanina twana twa mbelele twangu." ¹⁶ Wakaamba kwakwe alimwi lwabili, "Saimoni mwanakwe Johani, saa ulifwini?" Pita wakaamba kwakwe ati, "Ee ye Mwami, ulizhi ati Ume ndikufwini." Jeso wakaamba kwakwe ati, "Embela imbelele shangu." ¹⁷ Wakaamba kwakwe alimwi lwatatu, "Saimoni mwanakwe Johani, saa ulinfwini?" Pita wakachimwa kaambo Jeso wakamwaambila lwatatu, "Saa ulinfwini?" wakaamba kwakwe ati, "Mwami, ulizhi shintu shoonse, ulizhi ati Ume ndikufwini." Jeso wakaamba kwakwe ati, "Sanina imbelele shangu. ¹⁸ Chini, chini, Ume ndaamba kwako ati, lelyo niwakaakuli mwana, wakaakufwambaana kutelaika umwini alimwi u kweenda kuya kufwumbwa nkuuzanda, pele niwakaba mukando, ulahwungulula matashi ako, amana umwi ulakutelaikila amana wakubweza kuya koko nkutazanda kuya." ¹⁹ Inzho Jeso wakaamba chechi kwaamba ati chitondezhe buli lufwu lwaka Pita kwaamba alemeke Leza. Naakamana kwaamba sheshi, wakaamba kwa Pita ati, "Nchilila." ²⁰ Pita naakachinduluka wakamubona shichiiya wezo Jeso ngwaakaakufwini ulabachilila, wezo walo wakaakuzeeme kwa Jeso nibakaakulalila amana wakaamba ati, "Mwami, Nguni wezo walo u kakakwaaba?" ²¹ Pita wakamubona amane wakaamba kwa Jeso ati, "Mwami, No wezu muntu ulachita buti?" ²² Jeso wakaamba kwakwe ati, "Naakuti Ume ndazanda kwaamba ati a kale kushikila kazhoke, nchiiyi checho kwako? Nchilila." ²³ Koku kwaamba kwakamwaala kuli babunina, kwaamba kuti wezu shichiiya takafwi. Nikuba bobo Jeso wiina naakaamba kwa Pita ati umwi shichiiya takafwi pe, Pele, "Ati Ume ndaakuzanda kwaamba a kale mpaka nkazhoke, no nchiiyi checho kwako?" ²⁴ Wezu ngu shichiiya walo wakapa bumboni kushintu sheshi, alimwi u kulemba shintu sheshi, amana tulizhi ati bumboni bwakwe mbwabwini. ²⁵ Kuli alimwi shintu shimwi shesho Jeso nshaakachita. Naakuti u chimwi u chimwi nichakalembwa, ndatelaika kwaamba ati niluba luundu lwini nilwatakalozha kulibamba ibuka leli liti nilyakalembwa.