¹ Awo Jeso naakamaninzha kwaamba mazwi aza, wakaya u bashichiiya bakwe kumutala umwi wakazhiba ka Kiduloni, koko kwakaakuli muunda walo aze u bashichiiya bakwe mubakanjila. ² Inzho Judasi, wezo wakaakuya kumwaaba, aze kabwizhi busena bobo, kaambo Jeso kabaswaanganina koko lyoonse u bashichiiya bakwe. ³ Ngoonaawo Judasi, wakasololela imbunga yabashilikani u bamwi basololi kuhwa ku mupayizhi mukando alimwi u ba Falisi, bakaya koko u mizenge, u malaiti, alimwi u shilwisho. ⁴ Awo Jeso, walo wakaakwizhi shesho shoonse shintu shakaakuchitika kuli nguwe, wakaya ambele lyabo amana wakababuzha ati, "Nguni wezo ngumukapula?" ⁵ Bakamwiingula ati, "Jeso waku Nazaleta." Jeso wakaamba kwabo ati, "Ndime." Judasi, wezo wakamwaaba, aze kazhimine u bashilikani. ⁶ Lelyo naakaamba kwabo ati, "Ndime," bakazhoka munshi bamane bakawa anshi. ⁷ Alimwi wakababuzha ati, "Nguni ngumukapula?" Alimwi bakaamba ati, "Jeso waku Nazaleta." ⁸ Jeso wakabayingula ati, "Ume ndamushimwina ati Ndime. Naakuti mulakapula ume, a mubaleke baba baye." ⁹ Chechi chakaba bobo kwaamba ati kuzuzukizhiwe izwi lelyo ndyaakaamba ati: "Kuli babo balo mbuwakampa, kwiina naaba womwi wakazhimina." ¹⁰ Awo Saimoni Pita, wakaakukwete icheba, wakali kusha amane wakayasa musebezhi wa mupayizhi mukando wamukosola itwi lya kululyo. Inzho izhina lya wezo musebezhi kali Malikasi. ¹¹ Jeso wakaamba kwa Pita ati, "Libweezhe icheba mulikala. Saa Ume intanwini munkapu yezho Taata njakampa?" ¹² Inzho imbunga yabashilikani u musololi wabo, alimwi u bashilikani baba Juda, bakamukwata Jeso bamane bakamwaanga. ¹³ Bakamutola kutaanguna kwa Annasi, kaambo kali mukwaakwe Kefasi, walo wakaakuli mupayizhi mukando wezo mwaka. ¹⁴ Inzho Kefasi inguwe nguwakashimwina ba Juda kwaamba ati kachili kabotu kuti muntu womwi afwile bantu. ¹⁵ Saimoni Pita wakamuchilila Jeso, u shichiiya umwi wakamuchilila aze. Inzho wezo shichiiya kazhibilwe ku mupayizhi mukando, Amane wakanjila u Jeso mwibetekelo lya bapayizhi bakando; ¹⁶ pele Pita kazhimine a mulyango ansengwe. Inzho wezo shichiiya, wakaakuzhibilwe ku bapayizhi bakando, wakaya ansengwe wabandika u mulindizhi wa mulyango, amane wakamuleta Pita mukati. ¹⁷ Awo musebezhi mukaintu, mulindizhi wa mulyango, wakaamba kwa Pita ati, "Saa aze tuli wababo bashichiiya ba wezu muntu?" Wakaamba ati, "Ndiina ume pe." ¹⁸ Inzho basebezhi alimwi u bashilikani kabazhimine awo, amane bakabika mulilo wamashimbi, kaambo kakutontola, amana kabalikasaazha lwabo beni. Pita aze kali abo, kazhimine awo kalikasaazha lwakwe mwini. ¹⁹ Mupayizhi mukando wakamubuzha Jeso aa bashishiiya bakwe alimwi u buyiishe bwakwe. ²⁰ Jeso wakamwiingula ati, "Ume ndakabandika antangalala ku luundu. Lyoonse ndakaakuyiisha muma sinagogi alimwi u mushikombelo koko Juda nkubabungana antoomwi. Kwiina nchindakaamba chakuzubaila. ²¹ Kaambooyi uwe wambuzha? kababuzhe babo balo bakanteelela kuli shesho Ume nshindakaakwaamba. Bona, baba bantu balichizhi checho nchindakaakwaamba." ²² Awo Jeso naakaamba bobo, umwi wa bashilikani wakaakuzhimine awo wakamuuma Jeso amane wakaamba ati, "Saa bobo mbukonzha kwiingula mupayizhi mukando?" ²³ Jeso wakamwiingula ati, "Naakuti ndabisha mukwaamba, pa bumboni kuli chindabisha, pele naakuti kwiina nchindabisha, kaambooyi wanguma?" ²⁴ Ngoonaawo Annasi wakamutuma mwaange kwa Kefasi mupayizhi mukando. ²⁵ Inzho Saimoni Pita kazhimine ulalikasaazha kumulilo. Bantu bakaamba kwakwe ati, "Saa aze tuli wababo wa bashichiiya bakwe?" Wakachikaka amane wakaamba ati, "Indime." ²⁶ Umwi wa basebezhi wa mupayizhi mukando, wezo wakaakuli musanzhiina wezo muntu Pita ngwaakakosola kutwi, wakaamba ati, "Saa ndiina indakakubona mumuunda nimwakaakuli aze?" ²⁷ Amane Pita wakachikaka alimwi; u chakufwambaana mukombwe wakakokoloka. ²⁸ Bamane bakamutola Jeso kuhwa kwa Kefasi kuya kwibetekelo lyaka Pilato. Kachili chifwumo fwumo, bamane bayina nibakanjila mwibetekelo kwaamba ati batabi nibabisha pele balonzhe kulya ikubi lyakwiitilila. ²⁹ Pilato wakahwa ansengwe wakaya nkubakaakubele amane wakaamba ati, "No nkaambooyi wezu muntu nkumumupa?" ³⁰ Bakamwiingula bamane bakaamba kwakwe ati, "Naakuti wezu muntu tali muchita chibi, nitwatamuleta kono kwako." ³¹ Ngoonaawo Pilato wakaamba kwabo ati, "Amumutole nubeni, amana mumubeteke kwiingaina u mulawo wenu." Ba Juda bakaamba kwakwe ati, "Tachili mumulawo kuli uswe kubika muntu ku lufwu." ³² Bakaamba bobo kwaamba ati mazwi aka Jeso a zuzukizhiwe azo ngaakaamba kutondezha mushobo walufwu mbulubele mbuli mbwaataakafwe. ³³ Amane Pilato wakanjila mwibetekelo alimwi amane wakamoompolola Jeso amane wakaamba kwakwe ati, "Saa uli Mwami waba Juda?" ³⁴ Jeso wakamwiingula ati, "Saa ulaamba lwako u mwini, naa kuli bamwi bakwaambila makani angu?" ³⁵ Pilato wakayingula ati, "Ume nshili mu Juda, naa mbuti? Bantu bako alimwi u bapayizhi bakando mbubakuleta kono kwangu. No nchiiyi nchiwakachita?" ³⁶ Jeso wakayingula ati, "Bwami bwangu tabuli bwa mono mu luundu. Naakuti bwami bwangu nibwaakuli bwa mono mu luundu, basebezhi bangu nibalwa kwaamba ati Ume indatapewa kuba Juda. Pele ninzho bwami bwangu tabuli bwa ano." ³⁷ Pilato amane wakaamba kwakwe ati, "Saa nkukuti uli mwami?" Jeso wakayingula ati, "Waamba ati Ume ndimwami. Kaambo kachechi Ume ndakazhalwa, alimwi kuchechi Ume ndakazhiza mono mu luundu, kupa bumboni ku bwini. Woonse wezo uli mu bwini ulapupulala kwizwi lyangu." ³⁸ Pilato wakaamba kwakwe ati, "Anu bwini nchiiyi?" Lelyo naakaamba bobo, wakaya ansengwe alimwi kuba Juda amane wakaamba ati, "Ume ndiina bubiyabi mbundabona muli wezu muntu. ³⁹ Pele mulikwete kanshiya nshiya kako Ume nkwimwaangululila muntu womwi kwenu ekubi lyakwiitilila. Saa mulazanda kwaamba ati mwaangululile Mwami waba Juda kwenu?" ⁴⁰ Bamane bakapozomokesha alimwi bakaamba ati, "Utali wezu muntu, pele Balabasi. " Inzho Balabasi kali shikuzangila infulumende.