¹ Awo Jeso naakamana kwaamba shintu sheshi, wakalyaalala mwizeulu wakaamba ati, "Taata, iwoola lyashika, mulemye Mwanako kwaamba ati aze Mwana a kulemye--- ² mbubona mbuwakamupa insana a bantu boonse kwaamba ati a kape bumi butamana kuli woonse wezo nguwakamupa. ³ Bobu mbumi butamana: kaambo uwe balikwizhi, u Leza walo wabwini, alimwi u wezo walo nguwakatuma, Jeso Kilisito. ⁴ Ume ndakakulemya ano anshi. Ume ndamanizha mulimo wezo nguwakampa kwaamba nchite. ⁵ Inzho, Taata, ndemya antoomwi aze umwini u bulemu bobo Ume mbundakaakukwete aze luundu kalutana kubambwa. ⁶ Ume ndakalizubulula izhina lyako ku bantu babo mbuwakampa kuhwa mu luundu. Kabali bako, amana wakabapa kwangu, amana bakalibamba izwi lyako. ⁷ Inzho bakazhiba shoonse ati shesho nshiwakampa shakahwa kwako, ⁸ Ume ndakabapa mazwi woonse azo nguwakampa. Bakaatambula amana bakazhiba mubwini kwaamba ati Ume ndakahwa kwako, amana bakashoma kwaamba ati wakantuma. ⁹ Ume ndabakombela. Nshikombeli luundu pele kuli babo balo mbuwakampa, kaambo mbubako. ¹⁰ Shesho shoonse shitewa ati nshishangu aze nshishako, asho shako nshishangu, amana Ume ndasumpulwa kwiita muli mbabo. ¹¹ Ume nshichili mono mu luundu, pele baba bantu bachili mono muluundu, amana Ume ndezhiza kwako. Taata Usalala, babambe mwizhina lyako kwaambo wakampa kwaamba ati babe womwi, mbubona aswe mbutuli womwi. ¹² Lelyo Ume indakaakuli abo, Ume ndakababamba kabotu mwizhina lyako, lelyo ndiwakampa. Ndakabakwabilila, kwiina naaba womwi wakazonauka, chita bulyo mwana shikuzonauna, kwaamba malembe azuzuzkizhiwe. ¹³ Inzho Ume ndazhiza kwako, pele Ume ndaamba sheshi shintu mono mu luundu kwaamba bakwate kubotelwa kwangu kuzulile muli mbabo. ¹⁴ Ume ndakabapa izwi lyako, amana luundu lwakabasula kaambo tabali bamono muluundu, mbubona Ame mbwintali wamono muluundu. ¹⁵ Ume nshikombi kwaamba ati u bakushe mono mu luundu pe, pele nkwaamba ati u babambe kabotu kuhwa kuli wezo mubiyabi. ¹⁶ Tabali bamono muluundu, mbubona Ame mbwintali wamono mu luundu. ¹⁷ Basalazhe kwiita mubwini. Izwi lyako ndyabwini. ¹⁸ Mbubona mbuwakantuma mono mu luundu, Ame ndabatuma mono mu luundu. ¹⁹ Kaambo kabo Ume ndalipa ndimwini kwako, kwaamba ati balo beni balipe lwabo beni mubwini. ²⁰ Ume nshikombeli bulyo baba, pele u babo bati bakashome mwangu kwiita mu mazwi abo ²¹ kwaamba ati boonse bakabe womwi, umbona aze, Taata, mbuuli mwangu, alimwi Ame muli uwe. A babe abo muli uswe kwaamba ati luundu lukashome ati wakantuma. ²² Bulemu bobo mbuwakampa, Ame ndakabapa, kwaamba ati abo babe womwi, mbubona aswe mbutuli womwi: ²³ Ume mubabele, aze mwangu--kwaamba bashike kukuzulila komwi, kwaamba ati luundu luzhibe ati wakantuma, alimwi ati wakabafwuna mbubona mbuwakafwuna ame. ²⁴ Taata, Ume ndazanda babo mbuwakampa bakabe ame koko nkwimbele, amana bakabone bulemu bwangu, bulemu mbuwakampa kaambo wakakunfwini kalutana kubambwa luundu. ²⁵ Taata u luleme, luundu lwiina nilwakakuzhiba pe, pele Ume ndikwizhi; alimwi baba balizhi ati wakantuma. ²⁶ Ume ndakalichita izhina lyako kuzhibwa nkubabele, amana Ume ndalichita kuti lizhibwe kutewa ati luzando lolo nduwakanfwuna lube mubabele, amana Ame ndaakuli mubabele."