¹ "Ume ndakaamba shintu sheshi kwenu kwaamba ati umwe mutabi nimuleka kushoma. ² Balakamutanda kuhwa mu masinagogi. Pele iwoola lilakashika lelyo woonse uti a kamuyaye ulakaakutelaika ati ulatuula kumulimo waka Leza. ³ Balakachita shintu sheshi kaambo bayina nibakamuzhiba Taata na ume. ⁴ Ume ndakashaamba shintu sheshi kwenu kwaamba ati awo iwoola lyabo lyakashika, mulakatelaika kwaamba ati Ume ndakamushimwina aali mbabo. Ume ndiina indakamushimwina ku shintu sheshi kumatalikilo, kaambo Ume ndakaakuli amwe. ⁵ Pele ninzho Ume ndabweela kwa wezo walo wakantuma, amana kwiina wenu u mbunzha ati, 'Saa ulaya kwi?' ⁶ Pele kaambo Ume ndakashaamba shintu sheshi kwenu, kuusa kwezula mu myonzo yenu. ⁷ Pele mubwini Ume ndaamba kwenu, chilabota kwenu kwaamba ati ume ndukuya, kaambo kuti Ume ndiina kuya, muyohwi takazhiza nkumubele, pele kuti ndaya, Ume ndakamutuma kwenu. ⁸ Awo a kazhiza, muyohwi ulakazanga luundu kuti lulibishizhe ku shibi, kubululami, alimwi u kulubeta-- ⁹ uku chibi, kaambo bayina nibakashoma mwangu; ¹⁰ kubululami, kaambo Ume ndakaya kwa Taata, amana tamukamboni linji; ¹¹ amana ku lubeta, kaambo muleli wamuluundu wakabetekwa. ¹² Ume ndikwete shintu shinji shinji shakwaamba kwenu, pele tamukonzha kushilozha ninzho. ¹³ Pele lelyo walo, moza wabwini, a kazhiza, ulakamusololela mubwini boonse, kaambo takaamba lwakwe mwini. Pele ulakakwamba kuli shoonse nshaakateelela, alimwi ulakamushimwina shintu shesho shiyakuzhiza. ¹⁴ Ulakandemeka, kaambo ulakabweza shesho shihwa kwangu amana ulakamushimwina nshisho. ¹⁵ Shoonse shesho Taata nshaakwete shishangu. U bobo, Ume ndakaamba ati moza ulakabweza kuhwa kuli checho changu amana ulakamushimwina. ¹⁶ Mukaindi bulyo kashoonto tamukamboni linji, alimwi kwakaita kaindi bulyo kashoonto mulakambona." ¹⁷ Bamwi bashichiiya bakwe bakaamba kuli umwi umwi ati, "Anu nchiiyi chechi chalo nchaamba kwesu, 'Kwakaindi bulyo kashoonto mwiina nimuti mukambone linji amana alimwi kwakaindi kashoonto mulakambona,' ukuti, 'kaambo Ume ndaya kwa Taata'?" ¹⁸ Ngoonaawo bakaamba ati, "Anu nchiiyi chechi chalo nchaamba, 'Kwakaindi bulyo kashoonto'? Tatuchizhi checho nchaasoleka kwaamba." ¹⁹ Jeso wakabona kwaamba ati kabazanda kumubuzha, amane wakaamba kwabo ati, "Saa inchicho chechi nchimuya bubuzhanya buzhanya nubeni, checho nchichaamba checho Ume nchindakaamba ati, 'Mukaindi bulyo kashoonto tamukamboni linji, alimwi mukaindi bulyo kashoonto alimwi mulakambona'? ²⁰ Chini, chini, Ume ndaamba kwenu ati, mulakalila alimwi u koomoka, pele luundu lulakabotelwa. Mulakausa, pele kuusa kwenu kulakasanduka kuba kusekelela. ²¹ Awo mukaintu a kuzhala ulaba mukuusa kaambo iwoola lyakwe ati lyashika, pele a maninzha kuzhala mwana, tachaatelaiki linji mapenzhi akwe u kaambo kakusekelela kuti muntu wazhalwa mukati ka luundu. ²² Unizho muli mukuusa, pele Ume ndakamubona alimwi, amana myonzo yenu ilakabotelwa, amana kwiina naaba womwi uya kulozha kumunanga koku kubotelwa kuhwa kwenu. ²³ Kubuzuba bobo kwiina nchimuti mukambuzhe chili choonse. Chini, chini, Ume ndaamba kwenu ati, lelyo mwakakumbila kufwumbwa chintu kwa Taata kwiita mwizhina lyangu, ulakamupa. ²⁴ Kushika u cheno chiindi tamuna kukumbila nichiba chomwi mwizhina lyangu. Amukumbile amana mulakatambula, kwaamba ati kubotelwa kwenu kukazuzukizhiwe. ²⁵ "Ume ndakamwaambila shintu sheshi kwaambila mutwaambyo, pele iwoola likashika lelyo niinti intakaamba linji kwenu mutwaambyo, pele ndakamushimwina antangalala kutwaambo twaka Taata. ²⁶ Kubuzuba bobo mbumukakakumbila mwizhina lyangu amana Ume nshaamba kwenu ati Ume ndakakomba kwa Taata kaambo kenu, ²⁷ kaambo Taata lwakwe mwini uli mufwini kaambo umwe mwakafwuna amana kaambo mwakashoma kuti Ume ndakahwa kwa Leza. ²⁸ Ume ndakahwa kwa Taata, amana ndakazhiza mono muluundu. Alimwi, Ume ndakalushiya luundu ndakabweela kwa Taata." ²⁹ Bashichiiya bakwe bakaamba ati, "Wabona, ninzho ulaamba antangalala amana waleka kusebezha twaambyo mukwaamba. ³⁰ Inzho twazhiba kwaamba ati ulizhi shoonse, amana tuzandika umwi kukubuzha mibuzho. Kaambo kachechi, twashoma ninzho kwaamba ati wakahwa kwa Leza." ³¹ Jeso wakabayingula ati, "Saa mwashoma ninzho? ³² A mubone, iwoola lilakashika, ee ye, amana indilyo lyashika, lelyo umwe nimukakamwaala, umwi umwi ku munzhi wakwe, amana mulakanshiya iche. Nikuba bobo nshili iche kaambo Taata uli ame. ³³ Ume ndakashaamba shintu sheshi kwenu kwaamba mukwate luumuno mwangu. Mono muluundu mulikwete mapenzhi makando, pele a mukwatishe, Ume ndaluzunda luundu."