¹ Inzho ndamushimwina shimulya izhina, chiindi choonse mwana tabandeene umuzhike, nikuba ati ngukamwini lubono. ² Pele ulakuchili mumatashi aba mulela ubendelzhi kushikila kuchiindi baushi nchiindi baushi nchiba mubambilile. ³ Mbubona aswe nitwakuchili bana, twakuli mubuzhike bwa myoza mibiyabi ya muluundu. ⁴ Pele chiindi chelele nichakashika, Leza wakatuma Mwanakwe, muzhale ku mukaintu, muzhale kwita mu mulawo ⁵ kwamba afutule bachangilwe umulawo, kwamba tube banakwe. ⁶ Alimwi nkambo muli banakwe, Leza wakatuma Moza wamwanakwe mumyozo yesu, ulila, "Abba, Taata." ⁷ Ubobo tamuchili mubuzhike, pele muli bana, alimwi nakuti mwana, ati muli bashimulyeezhina kwiita mwa Leza. ⁸ Pele kuchecho chiindi, nimwatakakuna kumuzhiba Leza, mwakapangwa kuba bazhike kuli babo, kwita munsana shakulipangila, tutali tu leza. ⁹ Pele ninzho mwamuzhiba Leza, na kuzhibwa kwa Leza, mbubuti alimwi nchimuzhokela kumilawo yashintu shiina insana? Sa muchizanda kupangwa buzhike alimwi? ¹⁰ Mulalemeka mazuba ulimwi umyezhi ushiindi sha myaka! ¹¹ Ndanjilwa bukandu nkaambo kenu kwaamba ambweni milimo njindakasebeza yaba yabulyo. ¹² Ndamulomba, umwe nubakwesu, amube ukoya ume, ukuti ame ndaba ukoya umwe. Kwiina chibyabi nchimwa kanchitila. ¹³ Pele umwe mulizhi ati nkaambo kabulwazhi bwa mubili ku lweendo lutaanzhi nchindaka mukambaukila makani mabotu, ¹⁴ nikuba kuti mubili wangu wakamusukusha, mwiina nimwakansampaula nikuba kunkaka. Mwakantambula ukoya ndimwangelo wa Leza, alimwi ukoya ndime Jeso Kilisito. ¹⁵ Kulikwi inzho kulongezhewa kwenu? Ukuti ndapa bumboni ukwenu kwaamba ati, kuti nichakuli chuuba, nimwakakusha menso enu amana mwampa ume. ¹⁶ Inzho, sa ndaba shinkondonokwenu nkaambo ndamwaambila meni meni? ¹⁷ Balazandisha kumuzunda, pele umulimo mubotu. Balazanda kumushiya ansengwe kwaamba umwe mubazandishe. ¹⁸ Nchibotu lyoonse kuzandisha chintu chibotu chikwete mulimo, alimwi kutali buyo chiindi nindi amwe. ¹⁹ Nubanangu, alimwi inchipengana kuchisa kwabuzhali nkaambo kenu kushikila Jeso akabe mwenu. ²⁰ Ndakuzandisha kwaamba ndukuli amwe alimwi nchinche in'gambilo, nkaambo ndizhingilwe ukaambo kenu. ²¹ Amunshimwine umwe, nimuzanda kuba ku mulawo, sa tamuuteleli mulawo? ²² Ukuti kuli lembelwe ati Abulahamu kakwete bana bobile, mwana umwi kali wamukaintu muzhike umwi kali wa mukaintu watakuli muzhike. ²³ Womwi wakazhalwa kumuzhike wakazhalwa kwingaina ubunyama, pele umwi wakazhalwa kumukaitntu utali muzhike wakazhalwa kwiita muchishomezho. ²⁴ Sheshi shintu shilakonzha kupandululwa mumankumbilizha, ukuti bamakaintu baba balazhiminina shihuminano shobile. Chomwi nchaku Lupili lwa Sinai alimwi ulazhala bana umbuzhike. Wezu ngu Haga. ²⁵ Inzho Haga ulazhiminina Lupili lwa Sinai mu Alabiya; alimwi ulazhiminia Jelusalema uliko, ukuti uli mubuzhike ubanakwe. ²⁶ Pele Jelusalemu wakwizeulu ulyangulukile, alimwi ngunokwesu. ²⁷ Ukuti kulilembelwe ati, "Botelwla, uwe nutazhali nuina kukazhala; ompolola chakupozomoka mukubotelwa, umwe nimwina nimutelela kuchisa kwabuzhali; nkaambo bana bamukaintu uli iche mbanji kubazha bamukaintu uli mulumi." ²⁸ Plele umwe, nubakwesu, ukoya Isaki, muli bana bachishomezho. ²⁹ Kuchiindi checho wezo wakazhalwa kwingaina ubunyama wakapenzha wakazhalwa kwingaina u Moza.Chilikozhene bwasunu. ³⁰ Pele anu malembe alamba buti? "Mutande mushimbi muzhike umwanakwe. Ukuti mwana wa mushimbi muzhike takaabana lubono umwana wamukaintu utali muzhike." ³¹ Ubobo, nubakwesu, tatuli bana ba mushimbi muzhike, pele bana bamukaintu utali muzhike.