¹ Ume, ndimwaange wa Mwami, ndamulomba kuti mweende mubulemu bwakoompololwa kuli wezo wakamwita. ² Ume ndamulomba kuti mupone mukulibonzha kukando u kulifwiinsha alimwi u kulindila, mulekelelane umwi u mweenzhiina mulufwuno. ³ Amusoleke kubamba mu bumwi bwa Moza mulukamantano lwa luumuno. ⁴ Kuli mubili womwi alimwi u Moza womwi, mbubona bulyo amwe mbumwakoompololwa mululangilo lomwi momo mumwakatilwa. ⁵ Alimwi kuli bulyo Mwami womwi, lushomo lomwi, lupapatizo lomwi, ⁶ alimwi u Leza womwi Tatesu wesu toonse, walo uli aali shoonse alimwi muli shoonse u muli shesho shoonse. ⁷ Kuli umwi u mwi wesu luse lwakapewa kwiingayina u bupime bwa chipo chaka Kilisito. ⁸ Chili u koya malembe mbwaamba ati, "Lelyo naakaliza mwizeulu, wakatola baakwaangilwe kuba mubuzhike, amana wakapa shipo ku bantu." ⁹ Saa chilaambaayi kwaamba ati "wakaliza," chita bulyo kuti aze wakaseluka kwizhiza kumasena anshi? ¹⁰ Wezo walo wakaseluka inguwe nguwena muntu walo alimwi wakaliza kuya kulaale aali shoonse mumazeulu, kwaamba ati azuzukizhe shintu shoonse. ¹¹ Kilisito wakabapa bamwi kuba baapositolo, bamwi kuba bashinshimi, bamwi kuba bahwangeli, alimwi bamwi kuba beembezhi uba maayi ¹² kwaamba a bambile bantu ba Leza basalala kukumana mulimo, kukuzaka kwa mubili waka Kilisito, ¹³ chita toonse tukashike kulukamantano lwa lushomo alimwi u luzhibo lwa Mwanaa Muntu, kwaamba ati tukule kutewa tushike antaamo yakuzulila mwa Kilisito. ¹⁴ Kilisito ulatuzaka uswe kwaamba ati tutabi linji bana u bafwuswa koku u koku ku mankwishita, kutolwa kufwumbwa muuwo waluyiisho alimwi u kuchenga kwa bantu buli mbuba chibosha bosha. ¹⁵ Pele, bulyo kwaamba shabwini mulufwuno, tulyeelele kukula munzhila ili yoonse mwakwe wezo walo ngu mutwi, wezu ngu, Kilisito. ¹⁶ Kilisito ulabamba mubili woonse, amana ulaswaanganyiwa u kukwatana antoomwi kufwumbwa chiyohwelezha shizo, alimwi awo kuti chipanzha chimwi u chimwi chasebezela antoomwi, checho chilachita mubili kukomena kutewa chilibumbe chini mulufwuno. ¹⁷ U bobo, Ume ndakakatila ali chechi mu Mwami, kwaamba ati tamweelele linji kweenda u koya mbu beenda bahwamashi, balachita bulyo muya mizeezo yabo. ¹⁸ Matelaishi abo ali mu mushinze, mbazhimini kuhwa ku bumi bwaka Leza u kaambo kakutazhiba kuli muli mbabo, u kaambo kakuzuma kwa myonzo yabo. ¹⁹ Bakaleka kufwa insoni bakalibika lwabo beni kuchita shisofweele, alimwi bakazhibila kuchita kufwumbwa mushobo wabubi wezo ngu bazanda. ²⁰ Pele bobo imbo mbumwakayiya makani aka Kilisito. ²¹ Ume ndizhi kwaamba ati mwakaateelela makani akwe, alimwi umwe mwakayiishiwa kumakani akwe, u kuti bwini buli mwa Jeso. ²² Umwe mwakayiishiwa kukusha checho chakaakuli mubuponi bwenu bwa bumi bwakale kale, kukusha muntu wakale kale. Muntu wakale kale wezo shiluchengo u kaambo kakuzandisha shisofweele. ²³ Umwe mwakayiishiwa kuti mubukulushiwe mu moza wa mizeezo yenu, ²⁴ mwamana mubike muntu mupiya wezo wakalengwa mu chinkozha chaka Leza---mubwini bwa bululami busalala. ²⁵ U bobo, amuchileke kuchenga, amuchite kuti umwi umwi aambe meni meni kushimikobonina, kaambo tuli bantu bomwi kuli umwi umwi. ²⁶ Mwalemana pele mutabi nimuchita chibi. Mutabi nimuleka izuba kuya ambo mubukali bwenu. ²⁷ Mutabi nimupa busena shatani. ²⁸ Babo bakaakwiba bachileke kwiba. Pele, mulyeelele kusebeza, kusebeza checho chibotu u matashi enu, kwaamba ati akwate chimwi chakwaabana u babo bayina nchibakwete. ²⁹ Mutabi nimuleka kwaamba mwaambo mubiyabi uhwe ku mulomo wenu. Amusebezhe mazwi azo mabotu akonzha kuyohwa babo bazandika kuyohwa, kwaamba ati mazwi eenu abe a luse kuli bamuteelela. ³⁰ Alimwi mutabi nimubishizha Moza Usalala waka Leza, kaambo kwiita muli nguwo mwakabikwa chinkanto kubuzuba bwa lwaanguluko. ³¹ Amuleke infwundi nfwundi, kulemana, bukali, kuzwangana, alimwi u matushi, alimwi u bubiyabi boonse. ³² Amube bashinkumbu kuli umwi umwi, babonhwu myonzo, amulekelelane umwi u mweenzhiina, mbubona Leza mwa Kilisito mbwaakamulekelela.