¹ Saulo wakavumina lufu lwakwe. Ubobo baatalika buzuba bukando bwakupenzha chikombelo chakuli mu Jelusalema; ubashomi bakamwaala koonse ku Judeya uku Samaliya, chita buyo batumwa. ² Balombwana balyaabile bakamuzhika Sitivini alimwi bakamulila chansana. ³ Pele Saulo wakasoleka kuyaya chikombelo. Kanjila in'ganda in'ganda, kukusha balombwana ubakaintu, ukubabika muntolongo. ⁴ Pele bashomi bakamwaala kabaya bukambauka mulumbe. ⁵ Filipo wakaya ku munzhi mukando waku Samaliya ukubakambaukila Kilisito. ⁶ Bantu banji banji bakabikila maanu nshakwaamba Filipo; umuzeezo womwi bakamutelela, ukubona maleele ngakapanga. ⁷ Myoza mibiyabi yakavwa kubanji banji bakakunjililwe, kulila chakupozomoka, bazumine kumatende ubalema bapona. ⁸ Pele kwakaba kubotelwa mu munzhi wezo. ⁹ Pele kakuli mulombwana mu munzhi mukando wakutewa Saimoni wakakuchita shabulozhi kumatalikilo; kabazhinga bantu baku Samaliya nakakulyaamba ati muntu mulemu. ¹⁰ Boonse ba Samaliya, kuvwa ku mwana kushika ku mukando, kabamubikila maanu; kabaamba ati, "Wezu mulombwana ninsana sha Leza shitewa ati Inkando." ¹¹ Kaba mupupulala nkaambo wakabazhinga kwachiindi chilamfu ubulozhi bwakwe. ¹² Pele nibakamushoma Filipo nakakumbauka makani mabotu abwami bwa Leza alimwi iizhina lya Jeso Kilisito, bakapapatizwa, boonse balombwana u bakaintu. ¹³ Aze Saimoni lwakwe wakashoma, amane kupapatizwa wakakala u Filipo lyoonse. Nakabona shitondezho u maleele makando shilachitika, wakazhingwa. ¹⁴ Inzho batumwa mu Jelusalema nibakatelela kwaamba ba Samaliya balitambula izwi lya Leza, bakabatumina Pita u Johani. ¹⁵ Nibakashika, bakabakombela, kwaamba bakonzhe kutambula Moza Usalala. ¹⁶ Kushikila chiindi checho Moza Usalala kotana kushika a muntu naba womwi; kabapapatizilwe buyo mwizhina lya mwami Jeso. ¹⁷ Kumane Pita u Johani bakabaampa matashi, ngoona bakatambula Moza Usalala. ¹⁸ Inzho Saimoni nakabona kwaamba Moza Usalala kopewa u batumwa babampa matashi, wakazanda kubapa mali. ¹⁹ Wakaamba ati, "Amumpe sheshi insana, ame, kwaamba kufumbwa wezo ngundaampa matashi akukonzha kutambula Moza Usalala." ²⁰ Pele Pita wakamwambila ati, "Siliva wako mufwe aze, nkaambo ulazanda kukwata chipo cha Leza u mali. ²¹ Wiina busena na chaabilo mu makani aza nkaambo mozo wako tooli kabotu u Leza. ²² Ubobo sanduka kushibi shako sheshi, alimwi ukombe ku Mwami kwaamba ati ambweni ulakulekelela matelaishi ali mu mozo wako. ²³ Ndikubwene kwaamba ati uli munchefu ubukali bulula alimwi ulyangilwe muchibi." ²⁴ Saimoni wakaingula ukwaamba ati, "Amunkombele ku Mwami, kwaamba kubule chichitika shoonse nshimwaamba kwangu." ²⁵ Nibakamana kupa bumboni ukwaamba mazwi a Mwami, Pita u Johani bakabweela ku Jelusalema, kuya bukambauka makani mabotu. kuminzhi yabana Samaliya. ²⁶ Inzho mungelo wa Mwami wakaamba kwa Filipo ati, "Zhimuka uye kuchibizhi kunzhila iivwa ku Jelusalema kuya ku Gaza." (yezhi inzhila ili mulukula.) ²⁷ Wakazhimuka ukuya. Bona, kakuli mulombwana wakakuvwila ku Etiyopiya, muzhibe wakakukwete insana mubwami bwa Kandache, mwami mukaintu wabana Etiyopiya. Inguwe wakwendelezha buvubi bwakwe. Kezhile ku Jelusalema kukomba. ²⁸ Kabweela ulishite muchikochi, alimwi kaya bubala mushinshimi Isaya. ²⁹ Moza wakambila Filipo ati, "Koya ube kufwaafwi u chikochi." ³⁰ Filipo wakalukankila kwakwe, wakamutelela ulabala Isaya mushinshimi, amane wakaamba, "Sa ulichitelele checho nchubala?" ³¹ Amane wakaamba, "Ndakonzha buti, chita kwaba muntu untondezha?" wakamutamba Filipo kwaamba alize muchikochi akale aze. ³² Inzho bulembe bwa mazwi a Leza ngakakubala kali aza, "Wakatolwa ukoya imbelele iya kuyayiwa, alimwi ukya mwanambelele uli kumbele kwa wezo shikushiza uliliinzile, umbona mbwataka yalula mulomo wakwe. ³³ Mukupenga kwakwe wiina kukalanganyiwa. Nguni ukonzha kupandulula lunungu lwakwe? Ukuti bumi bwakwe bakamunangakuvwa ano anshi." ³⁴ Inzho muzhibe wakamubuzha Filipo, ulaamba ati, "Ndakulomba, nshimwina nguni mushinshimi ngwalakwaamba awa, ngumukamwini, na muntu unji?" ³⁵ Filipo wakatalika kwaamba, alimwi kutalikila kubulembe bobu wakakambauka makani mabotu a Jeso ukwakwe. ³⁶ Nibakakuya munzhila, bakashika akakuli meenzhi ngoona muzhibe wakaamba, "Langa ano ali meenzhi. Nchinzhi chinkasha kwaamba mpampatizwe?" ^{37 38} Ubobo muna Etiyopiya wakalailila kwamba chikochi chizhime. Bakaya mu meenzhi, boonse Filipo u muzhibe, amane Filipo wakamupapatiza. ³⁹ Nibakavwa mu meenzhi, Moza wa Mwami wakamutola Filipo, ngoona muzhibe wiina nakamubona linji Filipo, pele wakaya ambela umusinzo wakwe ulibotelelwe. ⁴⁰ Pele Filipo wakalibonya ku Azotusi amane wakabuzhinguluka busena boonse, kukambauka mazwi mabotu mu minzhi yoonse kushikila nakaya ku Kayisaliya.