¹ Mupaizhi mukando wakaamba ati, ''Sa makani aza meni meni?'' ² Sitivini wakamba, ''Nubakwesu u matata, amutelele kwangu: Leza wabulemu wakalibonya kwa ushesu Abulahamu nakakuli mu Mesopotamiya, katana kukala mu Halani; ³ waamushimwina, 'Ishiye inshi ubasazhinoko, wamana uye munshi njinka kutondezha.' ⁴ "Ngoona awo wakeeshiya inshi ya bana Chalide ukuya kukala mu Halani; kuvwa awo, nakafwa ushi, Leza wakamuleta munshi yezhi, njimukala inzho. ⁵ Wiina nakaipa inshi ati nja kukona kwakwe, peepe, nikuba kulyata mo itende. Pele wakashomezha-nikuba kwamba Abulahamu katana kukwata mwana-ngwakonzha kuya kwiipa inshi ati ikabe yakwe uku luhubo lwakwe kunze lyakwe. ⁶ Leza kamushimwina ati, luhubo lwakwe lulakakala muchishi chabeni kwakaindi kashoonto, alimwi babo bakala momo muchishi balakabachita buzhike ukubapenzha kwa myaka ili myaanda yone. ⁷ 'Pele ndakachibeteka chishi checho ncibasebezela,' mbwakaamba Leza, 'kuvwa awo balakamuvwa ukwiza kumpaila mubusena bobu.' ⁸ Ngoona Leza wakamupa Abulahamu chivuminano cha kupalulwa, inzho Abulahamu wakaba ushi wa Isaki ngoona wakamupalula mubuzuba bwa lusele; Isaki wakaba ushi wa Jakobo, aze Jakobo ngu ushabo bashakale bali ikumi ubobile. ⁹ ''Nkaambo bashaakale bakamufwila munyono Josefa, bakamuuzha mu Ejipiti; pele Leza kali aze ¹⁰ alimwi wakamuvuna kumapenzhi akwe oonse. Wakamupa Josefa kufunwa u busongo ku bushu bwa Falao, mwami wa Ejipiti, wakamusala kuba mwendelezhi mukando mu Ejipiti alimwi u munganda yakwe yoonse. ¹¹ Inzho kwakanjila inzala u mapenzhi manji manji mu Ejipiti umu Kenani, alimwi bamatata kabatakonzha kuyana chakulya. ¹² Pele Jakobo nakatelela kwamba kuli maila ku Ejipiti, wakabatuma bamaushesu mu mushinzo wakutanguna. ¹³ Ku mushinzo wabili Josefa wakalipandulula ku banina, amane mukwashi wa Josefa wakalizhibya kwa Falao. ¹⁴ Josefa wakabatuma banina kwa Jakobo ushi kwaamba ashike ku Ejipiti, ubasazhiina boonse, bali makumi chiloba ubosanwe. ¹⁵ Inzho Jakobo wakaya ku Ejipiti, nkwakaya kufwila, walo alimwi ubamaushesu. ¹⁶ Bakatolwa ku Shekemu kuzhikwa mu chuumbwe checho ncha kaula Abulahamu ku muulo wa siliva ku banakwe Hamo mu Shekemu. ¹⁷ ''Chiindi cha chishomezho nichakaswena, chishomezho checho Leza nchakabamba kwa Abulahamu, bantu bakakomena ukuvula mu Ejipiti, ¹⁸ kushikila nikwa kaba mwami unji mu Ejipiti, mwami wata kumwizhi Josefa. ¹⁹ Wakabakusha munzhila bantu besu alimwi wakabapenzha bamaushesu, kubashinikizha kwamba batondezhe banabo bachili bateke kwaamba baku bayaya. ²⁰ Chiindi Mozesi nakazhalwa; kali mubotu kubushu bwa Leza alimwi wakasaninwa kwa myezhi yotatwe mun'ganda ya ushi. ²¹ Nakavwa ansengwe, mwanakwe Falao mukaintu wakamubweza kwamba amulele ukumukomezha ati mwana wakulizhalila. ²² Mozesi wakayishiwa mubusongo boonse bwa bana Ejipiti, alimwi wakaba shinsana mu mazwi alimwi u mu milimo yakwe. ²³ ''Pele nakakwanya myaka ili makumi one, wakatweluka ati akaswaye banina, luhubo lwa bana ba Izilaeli. ²⁴ Abone muna Izilaeli mbwakupenzhiwa, Mozesi wakamuvuna wezo wakupenzhewa wauma ukuyaya muna Ejipiti: ²⁵ wakatelaika ati banina balazhiba kwamba Leza, mukusebezha itashi lyakwe, kabapa lufutuko, pele baina nibakezhiba. ²⁶ Buzuba bwachilila wakalibonya kwabo chiindi nibakulwa, amane wasoleka kubaletela lumuno akati kabo, ulamba, 'Balombwana, muli babunina; nkambonzhi nchimulwanina?' ²⁷ ''Pele wezo wakabishizha mwenzhiina wakamutonkela kumbali, amane waamba ati, Nguni wakakusala kuba muleli u mubeteshi akati kesu? ²⁸ Sa ulazanda unjaye ukoya mbuwa kayaya muna Ejipiti zona?' ²⁹ Mozesi wakalukanka amane kutelela mazwi aza; wakaya kuba mweenzu muchishi cha ba Midi, koko nkwakaba ushi wa bana bobile balombwana. ³⁰ "Nikwakaita myaka ili makumi one, Angelo wakalibonya kwakwe mu lukula lwa lupili lwa Sinai, mu mulilo wakuzaka muchisoko. ³¹ Mozesi nakabona mulilo, wakazoowa kuli nchakabona; wakaya afwaafwi kwaamba achilangishe, izwi lya Mwami lyakeza, lilaamba, ³² 'Ndime Leza wa bamaushenu, Leza wa Abulahamu, alimwi u wa Isaki, u Jakobo.' Mozesi wakazhangama alimwi wiina nakazanda linji kulanga ko. ³³ ''Mwami wakamwambila ati, 'Samununa impato shako ku matende nkaambo busena mbuzhimine bulaslala. ³⁴ Nchobeni ndabona kupenga kwa bantu bangu bali ku Ejipiti; ndakutelela kulila kwabo, ndaseluka anshi kwamba mbavune; inzho kweza, nkanda kutuma ku Ejipiti.' ³⁵ "Wezu Mozesi ngu baakaka, chiindi niba kaamba ati, 'Nguni waka kusala ati ube muleli u mubeteshi?'-inguwe ngwakatuma Leza kuba muleli u muvuni. Leza wakamutuma kwiita mwitashi lya angelo wezo wakalibonya kwa Mozesi muchisoko. ³⁶ Mozesi wakabasololela kuvwa mu Ejipiti, amane kuchita maleele u shitondezho mu Ejipiti alimwi uku Lwatele lwa mabu, u mulukula ku myaka lili makumi one. ³⁷ ''Wezu ngu Mozesi wakaamba ku bana ba Izilaeli, 'Leza ulakazhimuna mushinshimi kuvwa akati kenu uli ukoya ume.' ³⁸ wezu ngu mulombwana wakuli mu muswangano mu lukula u Angelo ukubandika aze a Lupili lwa Sinai, uwakuli umaushesu, alimwi ubakatambula mazwi a bumi ukutupa. ³⁹ "Pele bamatata baakaka kumutelela; bakamutantamuna kwabo, alimwi mu myozo yabo bakapiluka ku Ejipiti. ⁴⁰ Kuchiindi checho bakambila Aloni ati, Tupangile tu leza tukatusololela. Ukuli wezu Mozesi, walo wakatusololela kuvwa muchishi cha Ejipiti, tatuchizhi chamuchitikila.' ⁴¹ Bakapanga moombe ku mazuba azo ukuleta shipo kuchibumbwa, uku botelwa nkaambo milimo ya matashi abo. ⁴² Pele Leza wakaba chindulula ukubapa kwamba batalike kupaila intongwezhi sha mwizeulu, ukoya mbuku lembelwe mwibuka lya bashinshimi, Sa mwakandetela shipo alimwi u shituuzho chiindi nimwakuli mu lukula kwa myaka ili makumi one, nun'ganda ya Izilaeli? ⁴³ Umwe mwakavumina in'ganda ya Moleki alimwi u intongwezhi ya leza Lefani, alimwi u shibumbwa nshimwakapanga kwamba mukushipaila: alimwi ndamutola kulaale kubaala Babiloni.' ⁴⁴ Bamaushesu kabakwete chikombelo cha bumboni mu lukula, mbubona Leza mbwakabalailila chiindi nakambila Mozesi, ati ulyelele kuchipanga ukoya bwebeshi mbwakabona. ⁴⁵ Nikwaita chiindi, bamatata, bakusololelwa u Joshua, bakachitambula chikombelo ukuchitolelezha chiindi nibakebweza inshi kuba yabo.Leza wakabweza inshi kuvwa ku mashi amwi ukubakusha mo ku menso a bamaushesu. Chikombelo chakashaala munshiyezho kushikila chiindi cha Davida, ⁴⁶ walo wakazandwa kubushu bwa Leza, alimwi wakalomba kwamba kube in'ganda ya Jakobo. ⁴⁷ Pele kali Solomoni wakezaka in'ganda ya Leza. ⁴⁸ "Nikuba bobo, Leza Usumpukile takala mu maanda mazake kumatashi, mbubona bwaamba mushinshimi, ⁴⁹ 'Izeulu nchichuuna cha bwami changu ayo inshi ngundyatile matende.Nin'ganda nzhi njimukonzha kunzakila ume? mbwa amba Mwami, naba mbusena buli mbwikapumunina? ⁵⁰ Sa matashi angu aina nakashibamba shintu sheshi?' ⁵¹ ''Umwe nubantu bazumu inshigo, nimutali bapalule mu myozo u matwi, lyoonse mula kazha Moza Usalala; mulachita mbubona mbuba kakuchita baushenu. ⁵² Mbubaliye bashinshimi maushenu mbubata kapenzha? Bakayaya bashinshimi bakatanguna kulibonya kumbele lya Wezo Ululeme; alimwi inzho mwaba bantu bashikumwaaba ubayazhi bakwe, ⁵³ umwe nubantu numwakatambula mulawo ngubakabika baangelo, pele mwiina nimwaka usunga." ⁵⁴ Inzho babeteshi nibakakatelela twambo totu, bakalemana mu myozo yabo ukuluma inkwino kwa Sitivini. ⁵⁵ Pele walo, mbwakuzwile Moza Usalala, wakalangisha kwizeulu amane wabona bulemu bwa Leza; alimwi wakamubona Jeso ulizhimine kwitashi lya lulyo lya Leza. ⁵⁶ Sitivini wakaamba ati, ''Amubone, ndabona mazeulu ayaluka, alimwi Mwana a Muntu ulizhimine kwitashi lya lulyo lya Leza." ⁵⁷ Kuli chechi babeteshi bakashinka matwi abo, ukupozomoka izwi ikando, bakasebezha insana kwakwe mu mukukwata muzeezo womwi. ⁵⁸ Baakulumuka bamukwata kumukusha mu munzhi mukando ukutalika kumuyasa mabwe. Bakamboni bakazala shakusama nshibakuli humbile ku matende a mwana mulombwana utewa Saulu. ^{59 60} Lelyo niba kumuyasa mabwe Sitivini, kompolola ku Mwami ulaamba, ''Mwami Jeso, tambula moza wangu.'' Wakasuntama anshi amane walila izwi ikando, ''Mwami, utabapi chisubulo kuchibi chechi." Amane kwaamba bobo wakafwa.