¹ Inzho mulombwana umwi uwezhina lya Ananiyasi, u Safila mwinakwe, bakauzha chipanzha chimwi nchibaka kukwete, ² ukushaazha mali amwi (mwinakwe aze makani kaabwene) amana amwi mali ngubakatola ukwabika ku matende a batumwa. ³ Pele Pita wakamba ati, Ananiyasi, nkambonzhi satani nchauzuzha mozo wako kwamba uchenge ku Moza Usalala alimwi kwamba ushazhe mali amwi a muunda? ⁴ Nuwatakakuna kuzhiwa, sa kotali wako, alimwi u chiindi nuwaka uzhiwa, sa kotali mumatashi ako? Nkambonzhi wakachivumizha chechi kuba mu mozo wako kwamba uchite chechi? Wina niwa chenga bantu, pele wachenga Leza." ⁵ Kutelela mazwi aza, Ananiyasi wakawila anshi ukuzoza moza wamamanino, alimwi boonse bakatelela bakafwa bukandu. ⁶ Balombwana bakuchili bashoonto bakazhimuka ukumuputaila, amane bamuzemuna ukuya kumuzhika. ⁷ Nikwakaita ma woola otatwe, mwinakwe wakanjila, katezhi chakachitika. ⁸ Pita wakamwambila mukaintu, "Nshimwina na aza ngu mali ngu mwakauzha muunda." Wakamba ati, Ingawo, aza mali." ⁹ Amane Pita wakamwambila ati, "Mbubuti mbumwakavumizhanya ati musunke Moza wa Mwami? Langa, matende abalombwana bakuzhika mulumyako ali amulyango, aze balakubweza." ¹⁰ Ndilyona wakawila ku matende akwe ngona wazoza moza wamamanino. Chiindi balombwana bashoonto nibakanjila, bakamuyana ulifwile, bamane bakamubweza ukuya kumuzhika kufwafwi umulumi. ¹¹ Bukandu bunji bwakanjila mu chikombelo alimwi ukuli babo boonse bakatelela shintu sheshi. ¹² Shitondezho u malele manji manji akakuchitika akati ka bantu kwiia mumatashi a batumwa. Kabali boonse mu busena bwa Solomoni. ¹³ Pele kwina unji watakwina bukandu bwa kubasangana; ubobo kabapelwe bulemu bukando kubantu. ¹⁴ Kuli chechi bashomi banji kabasangana ku Mwami, makamu makamu a balombwana ubamakaintu ¹⁵ chakuti kababweza bamalwazhi kubatola mu mazhila ukuboneka a malo alimwi a minseme, kwamba kufumbwa lelyo Alimwi ¹⁶ kwakeza inkamu inkando yabantu kuvwa mu minzhi izhingulukile Jelusalema, kuleta balwazhi alimwi ubabo bakunjililwe myoza mibiyabi, amana bakapona. ¹⁷ Pele mupaizhi mukando wakabuka, ubabo boonse mbakakuli abo(yezho kaili inkamu yaba Saduki); alimwi bakazula munyono ¹⁸ ukubakwata batumwa, kubaanga ukubabika muntolongo yabantu boonse. ¹⁹ Chiindi cha mashiku angelo wa Mwami wakayalula milyango ya ntolongo uku bakusha ansengwe, amane wamba, ²⁰ "Kamuya mukazhime muchikombelo ukubambila mazwi a bumi bobu." ²¹ Nibakatelela aza, bakaya kunjila mu chikombelo machifumo ukuyiisha. Pele mupaizhi mukando wakashika, ubabo mbakakuli abo, baketa muswangano, boonse basololi ba bantu ba Izilayeli, amane batuma ku ntolongo kwamba batumwa baletwe. ²² Pele bashilikani baktumwa bayina nibakabayanamo muntolongo, amane bakazhoka kwiza kubambila ati, ²³ "Twayana kuntolongo kuliyalilwe ubashilikani balindilila nkubali balizhimine amulyango, pele chiindi nitwayalula, twayana kwiina ulimo mukati." ²⁴ Inzho chiindi mukando wabashilikani ba chikombelo ubapaizhi bakando nibakatelela mazwi aza, bakazhingwa ukulibilika kuli chikatobela kumakani abo. ²⁵ Kwakeza umwi wabaambila ati, "Balombwana balya mbumwakabika muntolongo balizhimine mu chikombelo balakuyiisha bantu." ²⁶ Inzho mukando wa bashilikani wakaya ubashilikani bamwi kubazhola, pele baina kukasebezha bukali nkambo bakatiya bantu kwaamba balakonzha kubafusa mabwe. ²⁷ Chiindi nibakabaleta, bakabazhimika kumbele ya babeteshi. Mupaizhi mukando wakababuzha, ²⁸ ulaamba, "Twakamwambila ukumulailila ati mutakabi linji nimuya kuyiisha mwizhina leli, u bobo mwezuzha munzhi wa Jelusalema ubuyiishe bwenu alimwi mulazandisha kwamba bulowa bwa mulombwana wezu bube a mitwi yesu." ²⁹ Pele Pita u batumwa bakaingula ati, "Tulyelele kutobela Leza kubazha kutobela bantu. ³⁰ Leza wabaushesu wakamubusha Jeso, walo ngumwakayaya kumwanzhika achisamu. ³¹ Leza wakamusumpula kumubika kwitashi lyakwe lya lulyo kuba mwana a mwami u mufutuli, kupa kusanduka kwa ba Izilayeli, ukukwatilwa kwa shibi. ³² Tuli bakamboni kushintu sheshi, alimwi u Moza Usalala, walo Leza ngwakapa kuli babo bamutobela." ³³ Chiindi inkamu ya babeteshi nibakatelela, bakalemana ukznda kubayaya batumwa. ³⁴ Pele mu falisi umwi wakutewa ati Gamaliye, mwiiyi wa mulawo wakakulemekwa ku bantu boonse, nakazhima munkuta ukwamba balombwana babo batolwe ansengwe kwa chiindi chishoonto. ³⁵ Ngoona wakabambila ati, "Nubalombwana ba Izilayeli, amuteleleshe kuli checho nchimwatelaika kuchita ubaba bantu. ³⁶ Ukuti katana kushika mazuba aza, Teudasi wakabuka ukutalika kwamba ati walo uli mbwabele, alimwi mweelwe wa balombwana, batakakulela ku myaanda yone, bakamusangana. Wakayayiwa, alimwi boonse bakakumutobela bakaandana kwiina linji nibakaba antoomwi. ³⁷ Kuvwa mulombwana wezu, Judasi waku Galilaya wakabuka mumazuba akubalwa bantu Aze wakafwa, abo bakakumuchilila bakaandana. ³⁸ Inzho ndamwambila ati, amutantumuke ku balombwana baba alimwi amubashiye beni, ukuti na makanze aza na milimo yezhi njabantu, ilakazundwa. ³⁹ Pele nakuti nja Leza, mwina nimukonzha kubazunda; mulakayana kwamba mulakulwisha Leza." Inzho bakakwelwa. ⁴⁰ Bamane bakabeta batumwa mukati ukubauma ukubalailila kwamba batakabi linji nibaya kwamba mwizhina ulya Jeso ngoona bakabaleka baya. ⁴¹ Bakavwa kubushu bwa babeteshi balibotelelwe kwamba babalilwa kupenga kusampulwa nkambo ka Izhina. ⁴² Kuvwa awo mazuba oonse, muchikombelo alimwi kuvwa in'ganda iin'ganda, kabatolelela kuyiisha uku kambauka makani mabotu kwamba ati Kilisito ngu Jeso.