¹ Inzho Pita u Johani kabaya muchikombelo chiindi cha kukomba, iwoola lya ifuka. ² Inzho mulombwana wakuli mulema kuvwa mwifu lya baina kabamuzemwine kutola ku manjililo amulyango wansengwe wachikombelo wakutewa ati Bubotu. Kabamutula awo abuzuba kwamba akulomba kuli babo banjila muchikombelo shipo. ³ Nakababona ba Pita u Johani balanda kunjila muchikombelo, wakabalomba shipo. ⁴ Pita, wakafwambana kusowa menso kwakwe, u Johani, wakamba, "Langa kuli uswe." ⁵ Mulema wakabalangilila, kalangila kutambula chipo kuvwa kwabo. ⁶ Pele Pita wakamba, Siliva u golide nshkwete, pele nchinkwete, ndakupa. Mwizhina lya Jeso Kilisito waku Nazaleta, yenda." ⁷ Wakamubweza kwitashi lya lulyo, Pita wamubusha, amane ndilyona matende umanungo a mulombwana mulema akazuma. ⁸ Mukusunkuta, mulema wakazhimuka ukutalika kweenda; alimwi wakanjila antomwi u Pita u Johani muchikombelo, wakeenda, wasunkuta, ukutembaula Leza. ⁹ Boonse bantu bakamubona wenda ukulumbaizha Leza. ¹⁰ Bakamuzhiba ati inguwe mulombwana wakakulomba kubantu shipo ku mulyango wa Chibotu wa chikombelo; amane bakazhingwa kuli chakachitika ku mulombwana. ¹¹ Mbwakakuchikwatilile kwa Pita u Johani, boonse bantu bakalukankila nkubakubele kubusena bwakutewa bwa Solomoni, mukuzhingwa. ¹² Pita nakachibona chechi, wakabaingula bantu, "Umwe nubalombwana ba Izilayeli, nchinzhi nchimuzhingwa? Nkambonzhi mulatulangilila, ukoya ndiswe twapa kwamba ayende munsana shesu na mubululami bwesu? ¹³ Leza wa Abulahamu, uwa Isaki, alimwi u jakobo, Leza wamaushesu, wapa bulemu muzhike wakwe Jeso. Inguwe ngumwakaba ukumukaka kubushu bwa Pilato, nakakuzanda kumwangulula. ¹⁴ Mwakamukaka Usalala alimwi ululeme amane mwakalomba muyazhi kwamba mupewe. ¹⁵ Mwakayaya matalikilo abumi, wezo Leza ngwakabusha kubafwu-alimwi uswe tuli bakamboni kuli aza. ¹⁶ Nkambo ka lushomo mwizhina lyakwe, izhinz lyakwe lyapa wezu mulombwana ngumubwene alimwi ngumwizhi, kwamba azume. Lushomo luli mwa Jeso lwamupa kupona kubotu mumenso enu noonse. ¹⁷ Uninzho, nubakwesu, ndizhi ati mwakakuchita mukutazhiba, mbubona u baleli benu mbubakachita. ¹⁸ Pele shintu Leza nshakamba kumilomo ya bashinshimi boonse, ati Kilisito wakwe ulyelele kupenga, uninzho wazuzukizha. ¹⁹ Namusanduke, ubobo ukuchinduluka, kwamba shibi shenu shimwaiwe, ²⁰ kwamba chilakashika chiindi chakulyokezha kubushu bwa Mwami; kwamba akatume Kilisito walo ngumwakatondekelwa, Jeso. ²¹ Inguwe Omwi izeulu ngulyelele kutambula mpaka kububukulshe bwa shintu shoonse, umbuli Leza mbwakamba kuvwa chiindi chakale ku milomo yaba shinshimi bakwe basalala. ²² Mozesi nchobeni wakamba, 'Mwami Leza ulakabusha mushinshimi uli ukoya ume kuvwa kubanyokwenu balombwana. Mulyelele mukatelele shoonse nshati akaambe kwenu. ²³ chilakaba ati oonse muntu utateleli kumushinshimi wezu ulakazonaunwa chakumaninina akati kabantu.' ²⁴ Eeye, alimwi boonse bashinshimi kuvwa kwa Samuwele ubabo bakeza munshi lyakwe, bakaamba alimwi ukwambilizha mazuba aza. ²⁵ Muli bana babashinshimi kuchipangano Leza nchakapanga uba kale kale, ukoya mbwakambila Abulahamu, 'Mulunungu lwako mikowa yoonse ya anshi ilakalongezhewa.' ²⁶ Nakamana Leza kubusha muzhike wakwe, wakatanguna kumutuma kwenu, kwamba mulongezhewe kuchindulula boonse benu kuvwa kububiyabi."