¹ Buzuba bwa Pentekositi nibwakashika, bakuli antoomwi mubusena bomwi. ² Ngoona awo kwatelelwa ikali lya muuwo lyalo lyakazuzha in'ganda yoonse mubakushite. ³ Kwakalibonya shili ukya milaka ya mulilo yakalyabanya, yakala ali umwi uumwi. ⁴ Bakazuziwa boonse Moza Usalala amana bakatalika kwaamba mumilaka ishenye ishenye, kwingaina u Moza mbuwakabavumizha. ⁵ Inzho kakuli bama Juda bakakukala mu Jelusalema, bashomi,kuvwa mu kuvwa mushishi shoonse shili ano anshi. ⁶ Kuchiindi muzuzumo niwakatelelwa, inkamu yabantu boonse yakabungana antoomwi ulimwi kwakeza kuba kunyongana nkaambo woonse muntu wakatelela kabamba umwi mumushobo wakwe. ⁷ Chakabazoshsha ukubainina; Balamba, "Chini chini, sa tabali bana Galilaya boonse baba balyakwamba awa? ⁸ Nkaambo nzhi tulitelele, uumwi mumulaka wesu ngutwakakazhalwa awo? Baku ⁹ Patiya, ubaku Mede alimwi ubaku Elami, ubabo bakakukala ku Mesopotamiya, mu Judiya umu Kapadisiya, mu Pontusi alimw u Ashiya, ¹⁰ Fuligiya alimwi u Pamfilia, mu Ejipit alimwi umasena amwi amu Libiya kuluya lwa Sailini, ubeenzu bavwa ku Loma, ¹¹ Ba Juda uba Puloseli, ba Kilete alimwi ubama Alabu,tuli batelele balakanana mu mushobo wesu milimo mikando ya Leza." ¹² Chakabazosha ukubakankamika; bakaamba kuli umwi uumwi ati, Anu chechi chilamba nzhi?" ¹³ Pele bamwi bakabasalizha ukwaamba ati, "Balinwine waini mupiya." ¹⁴ Pele Pita wakazhima antoomwi ubali Ikumi uwomwi, wapozmoka iizwi lyakwe, wabambila, ''Nubalombwana bamu Judeya antoomwi amwe noonse nimukala mu Jelusalemu, aza azhibwe kwenu; amuteleleshe ku mazwi angu. ¹⁵ Baba bantu tabali bakole ukoya mbumutelaika, nkaambo cheno nchiindi cha chifumo fumo. ¹⁶ Pele chechi nchichakaambwa umushinshimi Jowelo: ' ¹⁷ Alakaba mazuba amamanino; Leza waamba ati Ndakatila Moza wangu kumuntu oonse. Banenu balombwana ubanenu bakaintu balakashinshima, bamalombwana bachili bashoonto balakabona shilengaano, alimwi bamadaala benu balakalota shiloto. ¹⁸ Chini chini aba sebezhi bangu uba sebezhi bangu bamakaintu kumazuba azo Ndakatila Moza wangu, alimwi balakashinshima. ¹⁹ Ndakatondezha shizoosha mwizeulu alimwi ushitondezho anshi, bulowa, mulilo, alimwi umoza wabushi. ²⁰ Izuba lilakasanduka kushiya u mwezhi ulaaba bulowa kabutana kushika buzuba bukando alimwi buzuba bulemu bwa Leza. ²¹ Chilakaba kwaamba ati kuli wezo woonse ukaabanda izhina lya leza ulakafutulwa.' ²² Nubalombwana bana Izilayeli, amutelele mazwi aza: Jeso waku Nazaleta kali mulombwana wakapewa kwenu u Leza nsakachita shikando shizoosha ushitondezho Leza nshakachita kwiita muli nguwe mu menso enu, alimwi umwe lwenu mulizhi. ²³ Wezu mulombwana wakapewa u Leza mububambe bwakwe umanu akwe; alimwi umwe, kwiita mumatashi abalombwana batachilili mulawo, bamuyaya ulufu lwaku mubambula achichinkano. ²⁴ Pele Leza wamubusha kumwangulula mumapenzhi a lufu, nkaambo kachili chizumu kwaamba lufu lumukakatile. ²⁵ Nkaambo Davida wakaamba ati, 'ndamubona lyoonse Mwami kubushu bwangu, ukuti uli kwitashi lya lulyo lyangu kwaamba intazunganyiwa. ²⁶ Ubobo mozo wangu wakabotelwa alimwi mulaka wangu wakasapwa. Alimwi umubili wangu ulakala ubulangizhi. ²⁷ Ukuti tukoshiyi moza wangu muchuumbwe, nikuba kuleka basalali bako kwaamba bakabole. ²⁸ Wampa kwamba njizhibe inzhila yabumi; ulampa kwamba ndubotelelwe nkaambo kabushu bwako.' ²⁹ Nubakwesu, chililuleme kwangu kwaamba mwambile mulushinizho makani abu sololi bwa Davida, kwaamba wakafwa ulimwi wakazhikwa, u chuumbwe chakwe nkuchili ubwasunu. ³⁰ Ubobo, kali mushinshimi uwakwizhi kwamba Leza washomezha kwamba umwi wa muchelo wakwe ulamubika achuuna chakwe. ³¹ Wakachibona chiya kuchitika alimwi wakamba abubuke bwa Kilisito, kwaamba wina nakashiiwa muchuumbwe nuba mubili wakwe kubola. ³² Wezu Jeso-Leza wakamubusha, bwasunu toonse toonse tuli bakamboni. ³³ Ubobo mbutwakasumpulwa kwitashi lyalulyo lya Leza ulimwi ukutambula chishomezho cha Moza Usalala kuvwa kwa ushi, wakatila nchimubona ukutelela. ³⁴ Ukuti Davida wina nakauluka kuya kwizeulu, pele ulamba, 'Mwami wakaamba ku Mwami wangu, "kala kwitashi lyangu lyalulyo ³⁵ kushikila nkabike bashinkondonoko kunshi ku matende ako.''' ³⁶ Ubobo, amuleke in'ganda yoonse ya Izilayeli izhibe kwaamba Leza wamubika kuba Mwami u Kilisito, wezu Jeso ngumwakabambula." ³⁷ Inzho nibakaatelela aza. bakayaswa mu myozo yabo, amane bamwambila Pita ubatumwa bamwi, "Nubakwesu, anu tuchite buti?" ³⁸ Amane Pita wakabambila ati, "Amusanduke mwamana mupapatizwe, umwi uumwi wenu mwizhina lya Jeso Kilisito kwaamba mulekelelwe shibi shenu, mwamana mulakatambula chipo cha Moza Usalala. ³⁹ Ukuti chishomezho chili kwenu ubanenu alimwi ubabo bali kulaale, banji banji kwingaina u Leza mbati akoompolole." ⁴⁰ Mumazwi amwi wakapa bumboni alimwi ukubasumpula, ulamba, "Mufutulwe kuvwa kumafunze amusela wezu." ⁴¹ Bamane bakalitambula izwi lyakwe amane bakapapatizwa, amane kubuzuba bobo kwakazungilwa kumweelwe wa shuulu shotatwe shabantu. ⁴² Bakalyaaba kukuyiisha kwa batumwa ukumungano, mukukomona chinkwa umukukomba. ⁴³ Kutiya kwakashika amuntu woonse, alimwi maleele ushitondezho shakachitwa u batumwa. ⁴⁴ Boonse bakahumina ukuchita shintu antoomwi, ⁴⁵ alimwi bakauzha shintu shabo alimwi imbono shabo ukwabana kwingaina uumwi ipenzhi lyakwe. ⁴⁶ Inzho mazuba oonse kabalyaaba kuchita chintu chomwi muchikombelo. Alimwi kabakomauna shinkwa mu maanda abo, alimwi kababana shakulya mukubotelwa mu myozo, ⁴⁷ kulumbaizha Leza ukfunwa kubantu boonse, alimwi abuzuba Mwami kazungila ku mweelwe wabo bantu bafutulwa.