¹ Inzho Agilipa wakamwambila Paulu ati, " Uwe ulyelele kulyambila," Amane Paulu waka tandabika itashi lyakwe walivuna, ² "Ndalibika ndimwini ukubotelwa, Mwami Agilipa, mulandu wangu waletwa kwako bwasunu utumwi twaambo tubanengelela bama Juda, ³ kwambisha ndiwe shabupampu kutunshiya nshiya twa ba Juda umibuzho. Ninzho ndalomba untelele mukabotu. ⁴ Chini chini boonse bama Juda balinzhi bukale bwangu kuvwa kubwana muchishi changu uku Jelusalema. ⁵ Balinzhi kuvwa kumatalikilo, nabalilibambile kuvumina, ati ndakukala ukya mu Falisi, inkamu yalo ibikila mano mu bukombi bwesu ⁶ Ninzho ndazhima ano mumbeteke nkaambo kabulangizhi muchi shomezho chakabambwa u Leza ku maushesu. ⁷ Nkaambo chechi nchipangano mishobo ili ikumi uyobile nkwilangila kutambula chiindi niba komba Leza mubwini munza umashiku, nkambo kabulangizhi bobu, mwami, ba juda nchibanengelezha. ⁸ Nkambonzhi umwi wenu nchachibetelela kwamba chilakatazha Leza ulabusha bafu?" ⁹ Inzho chini chini, ndakutelaika kwamba lwangu ndimwini ndyelele kuchita shintu shinji shinji ushitendelana izhina lya Jeso waku Nazaleta, ¹⁰ Ndakachita sheshi mu Jelusalema. Ndakabika banji banji muntolongo basalali ba Leza nkaambo kansana nshindakapewa ku bapaizhi bakando; alimwi nibakayayiwa, ndakasala kuyayiwa kwabo. ¹¹ Ndakabantonkaika shiindi shinji shinji muma sinagogu ukusola kubashinikizha kwamba basampaule. Ndaakutondezha bukali kwabo ukuya bubaanga nikuba kuminzhi mikando ya mashi abeni. ¹² Chiindi ninda kuchita sheshi, ndakaya ku Damasikasi munsana alimwi umalaile avwa ku bapaizhi bakando; ¹³ Inzho munzhila, chiindi cha muunza, mwami, ndakabona mumuni uvwa kwizeulu wakutuba buu kubaala izuba, wakamwekela ngundakubele u balombwana mbundakweenda abo. ¹⁴ Lelyo nitwakawa anshi, ndakatelela izwi lyaamba kwangu mumushobo wachi Hebulu, 'Saulu, saulu, nkambonzhi ulampenzha? Nchilakuzumina nkaambo ukalalichisa.' ¹⁵ Ngoona ndakaamba, 'Ndiweni, Mwami?' Mwami wakaingula, 'Ndime Jeso nguya bupenzha. ¹⁶ Inzho buka uzhimuke; nkaambo ka chechi ndalibonya kwako, kukusala kwamba ube musebezhi u kamboni wa shintu sheso nshuzhi shikwatilizha ume uninzho alimwi ukushintu nshinti kakutondezhe kumbele; ¹⁷ alimwi ndakuvuna ku bantu ukuli bakunze nkwinka kutuma, ¹⁸ kuyalula menso abo kwamba basanduke kuvwa ku mushinze kuya ku mumuni alimwi kuvwa kubwendelezhi bwa satani kuya kwa Leza, kwaamba batambule kuvwa kwa Leza kulekelelwa kwa shibi alimwi ulukono ndunkabapa babo basalazhiwa u lushomo muli ume.' ¹⁹ Ubobo, Mwami Agilipa, Ndiina nindataka chilila chibonwa cha kwizeulu; ²⁰ Pele kutanguna babo bali ku Damasikasi, amna ku Jelusalema uku chishi choonse cha Judeya, ukubantu bakunze, ndakabapa mulumbe kwamba balyelele kusanduka ukuya kwa Leza, kuchita shintu shendelana ukusanduka. ²¹ Chechi chakapa ba Juda kunkwatila muchikombelo alimwi kukakatila kunjaya. ²² Ubobo ndatambula buyovwe buvwa kwa Leza kushika ubono buzuba, alimwi ndazhima ukupa bumboni ku bashoonto ubakando kwaamba kwiina chibaala kuvwa ku bashinshimi u Mozesi wakamba chila chitika- ²³ ati Kilisito ulyelele kupenga, alimwi nkambo kakuba mutanzhi kubuka ku bafu ula kakambauka mumuni ku bantu besu alimwi uku bantu bakunze." ²⁴ Paulu naka manizha kulivuna mukwamba, Fesitasi wakamba iizwi ikando ati, "Paulu uli musondoshi; lwiiyo lwako lukando lulakupa kusondoka." ²⁵ Pele Paulu wakamba ati, "Nshili musondoshi, nulemekwa Fesitasi, pele ndakwamba mazwi a lushinizho alimwi ububeteshi bwelele. ²⁶ Ukuti mwami ulishizhi shoonse sheshi shintu; ubobo ndamba chakubula bukandu kwakwe, nkambo ndakulwaizhiwa kwamba kwina alibolya asosekelwe kwakwe; nkambo chechi chiina kukachitilwa kumabali. ²⁷ Sa ulabashoma bashinshimi, Mwami Agilipa? Ndizhi ati ulashoma." ²⁸ Agilipa wakamba kwa Paulu, "Muchiindi chishoonto sa ulalozha kumpembelezha alimwi kumpanga kwamba mbe muna Kilisito?" ²⁹ Paulu wakamba, "Ndakomba kwa Leza, kwaamba nichikafwiimpa nikuba kulampa chiindi, utali buyo uwe, pele ubabo boonse bantelela bwasunu balaba ukya ume, pele kakwiina sheshi inchetani sha muntolongo." ³⁰ Ndlyona mwami wakazhimuka, u muleli, kubikilizha u Benisi, ubabo mbubakushite abo; ³¹ nibakavwa mun'ganda ya kubetekela, bakatalika kubandika ukwamba ati, "Wezu mulombwana kwiina nchachita chikonzha kumuyazha nikuba kumwaanzha." ³² Agilipa wakambila Fesitasi ati, "Wezu mulombwana kayelele kulekwa kuti natakatola kambo kwa Kayisala."