¹ Chakachitika ati mu Ikoniyamu ba Paulu u Banabasi bakanjila antoomwi mu sinagogi yaba Juda ukwamba munzhila imwi chakuti makamu makamu aba Juda uba Giliki bakashoma. ² Pele ba Juda batakashoma bakakanka kunyonganya bakunze kwaamba babasule babunina. ³ Bakakala koko kwa chiindi chilamfu, kukambauka chakubula bukandu munsana sha Mwami, ulimwi kabatondezha bumboni bwa luse lwakwe. Wakachita chechi kutondezha shitondezho umaleele ati akachitwe umatashi a Paulu u Banabasi. ⁴ Pele bantu ba mumunzhi mukando wezo bakandaana; bamwi bakachilila ba Juda, bamwi bakachilila batumwa. ⁵ Inzho bakunze uba Juda(antoomwi ubasololi babo) bakasoleka kubapenzha ukubauma mabwe, ⁶ pele mbubakaatelelela aza, bakalukankila ku minzhi mikando ya Likaoni Listila alimwi u Debe alimwi umasena azhingulukile, ⁷ kwalo nkubakaitilizha kukambauka makani mabotu. ⁸ Mu Lisitila umwi mulombwana kashite, kakwiina insana kumatende akwe, kali mulema kuvwa mwifu lya baina, u wina nakeenda. ⁹ Wezu mulombwana wakatelela chiindi Paulu nakukambauka. Paulu wakamulangisha ukumubona ati ulikwete lushomo kwamba apone. ¹⁰ Ubobo wakapozomoka wamwambila ati, "Zhimuka," Ngoona awo mulombwana wezo wakasotoka ukutalika kweendenda. ¹¹ Chiindi inkamu niyakabona Paulu nchakachita, bakambisha, balamba mumushobo wabo wachi Likaoniya, tu leza twaba ukoya balombwana amana baseluka beza kwesu." ¹² Bakamulika Banabasi ati ngu Zeyasi," amana Paulu ati "Hemesi," nkaambo nguwakakuli mwambilizhi mukando. ¹³ Mupaizhi waku Zeyasi, walo chikombelo chakwe kachili buyo afwaafwi umunzhi mukando wakaleta basune umaluba ku manjililo; walo alimwi inkamu yabantu kabazanda kupa shipo. ¹⁴ Pele batumwa, Banabasi u Paulu, nibakatelela azo, bakazapaula shisani shabo ukulukankila munkamu ya bantu, balakwiila ati, ¹⁵ "Balombwana, nchinzhi nchimuchitila sheshi shintu? Uswe tuli bantu aswe, mbubona mbumubele. Tulakumwambila makani mabotu kwamba mukuvwe kushintu shiina mulimo ukuya kwa Leza upona, wakalenga izeulu, inshi, milonga ushoonse shilimo. ¹⁶ Kale kale wakakulekela shishi kwendela munzhila shabo beni. ¹⁷ Pele uninzho, wiina nakaya kutashiya kamboni, muli sheshi wakachita chibotu ukumupa imvula kuvwa kwizeulu u shiindi shibotusha, kuzuzha myozo yenu ushilyo ukubotelwa." ¹⁸ Nikuba u mazwi aza, Paulu u Banabasi bakabakasha bantu kutuula shipo ukwabo. ¹⁹ Pele bamwi ba Juda baku Antiyoku uku Ikoniyamu bakeza ukubalengaulila bantu. Bakamuwaala mabwe Paulu ukumukwelela ansengwe a munzhi mukando kutelaika ati wafwa. ²⁰ Inzho bashichiiya kabazhimine bali muzhingulukile, wakazhimuka ukunjila mumunzhi. Buzuba bwakachilila, wakaya ku Debe u Banabasi. ²¹ Nibakamana kwamba mulumbe mubotu mu munzhi mukando ukupanga bashichiiya banji, bakabweela ku Lisitila, Ikoniyamu, alimwi uku Antiyoku. ²² Bakaitilizha kuzumya myoza yabashichiiya ukubakulwizha kwaamba bazume mu lushomo, kwamba, "Tulyelele kunjila mubwami bwa Leza kwitila mukupenzhiwa kunji kunji." ²³ Nibaka basalila basololi mu shikombelo shoonse, baka komba ukuliimya, bakabatambika ku Mwami, mwalo muba kushoma. ²⁴ Lelyo bakaita mu Pisidiya ukuya ku Pamfiliya. ²⁵ Nibakaamba izwi mu Pega, bakaya ku Ataliya. ²⁶ Kuvwa koko bakaya ku Antiyoki, koko nkubakakulyaabile ku luse lwa Leza ku mulimo walo inzho ngubakamanizha. ²⁷ Nibakashika ku Antiyoki ukubunganya shikombelo antoomwi, bakaamba shintu shoonse nshibakachita antoomwi u Leza, umbwaka yalula mulyango walushomo ku bamuvwa mashi. ²⁸ Bakakala chiindi chilamfu ubashichiiya.