¹ Pele zhibaluka chechi: ku mazuba a kumamanino kulakaba buzumu zumu. ² Kaambo bantu balakaba bashikalifwune lwabo beni, bafwini mali, bashikulyeenshensha, kulisumpula, bashimatushi, bayina bulemu ku bazhali, u batalumba, alimwi batasalali. ³ Balakwiina u nchibabona kubiya, bayina lulekelelo, bazonauzhi, tabalishamba kala, bashikakondo kondo, balo batazanda bubotu. ⁴ Balakaba bashilwaanu anu, bayina makani, bashikulisumpula, u kuzandisha misobano kuleka kufwuna Leza. ⁵ Balakalibonya ukoya bakombi, pele insana sha bukombi balashikazha. Amukuhwe ku bantu bali bolya. ⁶ Kaambo babo mbalombwana babo banjilila mu maanda u kukoongelezha bakaintu bapengele. Baba mbakaintu balo bazandisha kuchita shibi bamana baleendelezhewa u michito yandeene andeene. ⁷ Baba bakaintu balayiiya lyoonse, pele bayina nibazanda kukwata luzhibo lwa bwini. ⁸ Mbubona ba Janesi u Jabulesi mbubakamukazha Mosesi, baba bamaayi babeshi abo mbubakakazha lushinizho. Mbantu bakwete mizeezo mibiyabi, amana ku makani a lushomo bali bolya tabazandika. ⁹ Nikuba bobo bali bolya tabakonzha kuchilozha pe. Kaambo bantu boonse balakabubona bulimbushi bwabo, mbubona mbuli mbubakachita balya balombwana. ¹⁰ Pele umwe, mwakachilozha kuchilila kuyiisha kwangu, kulilemeka, kuzandisha, lushomo, kulizumya mu mapenzhi, lufwuno, bushichamba, ¹¹ u makatazho, alimwi u checho chakanchitikila ku Antiyoki, uku Ikoniyamu, alimwi uku Lisitila. Pele ndakalizumya zumya mu makatazho. Kuhwa kuli babo boonse, Mwami wakanhuna. ¹² Boonse babo bazanda kupona mwa Kilisito Jeso balakapezhewa. ¹³ Bantu bashishibi alimwi u bashimatunta balakamuhwa mububi balakaya mububiyabisha, kuya buchenga bamwi u kuya bulichenga lwabo beni. ¹⁴ Pele umwe, kamubukwete kushintu shesho nshimwakayiishiwa alimwi u shesho nshimwakashoma kale. Amana muli mwizhi wezo wakamuyiisha. ¹⁵ Mulazhibaluka kuhwa ku bwana bwenu mwakaakweezhi malembe asalala. Aza alalozha kumupa luzhibo lwalu lufwutuko kwiita mu kushoma Kilisito Jeso. ¹⁶ Woonse malembe a kazozelwa kuhwa kwa Leza. Alikwete mulimo wakuyiisha, lushinizho, kuchindululwa, alimwi u kuliyiisha mu bululami. ¹⁷ Koku nkwaamba ati muntu wezo u sebeza a yelele, alozhe kuchita mulimo wezo woonse mubotu.