¹ Inzho bobo, mwanangu, zuma zuma mu luse lolo luli mwa Kilisito Jeso. ² Shintu nshimwakateelela kuhwa kwangu a kati kaba tumboni banji banji, bakapewa bantu bashomi babo bati bakaakuyiisha bamwi. ³ U penge ame u koya shikalumamba mwini mwini waka Kilisito Jeso. ⁴ Kwiina shikalumamba u sebeza kumwi kali mu bumi bwakwe bwaku mubili, kwaamba ati a botezhe shikalumamba u swelele. ⁵ Alimwi naakuti umwi waya kuzundana ku muzundano, tapewa bulumbu chita wazundana kwiingayina u mulawo u bikilwe. ⁶ Chililuleme ku mulimi u sebeza chansana kutambula mwaabanino wakwe kuhwa ku butebuzhi butaanzhi. ⁷ Amutelaike kuli shesho nshing'amba, Mwami u lakamupa kuteelelesha mushintu shoonse. ⁸ A muzhibaluke Jeso Kilisito, wa luhubo lwaka Devidi, wezo wakabushiwa kuhwa ku bafwu. Chechi chilayingayina u koya mulumbe wangu, ⁹ mbubona ume mbwimpenga kushika ku kwaangwa ma cheni u koya mutewu. Pele izwi lyaka Leza talyaangilwe pe. ¹⁰ U bobo ndakwatisha shintu u kaambo ka babo basale, kwaamba ati abo bakayane lufwutuko lolo luli mwa Kilisito Jeso, u bulemu butakamana. ¹¹ Koku kwaamba kulishinizhe: "Naakuti twakafwa aze, tulakapona aze alimwi. ¹² Naakuti twatatanana, tulakalela aze. Naakuti twamukaka, aze ulakatukaka. ¹³ Naakuti tatushomeki, walo ulashomeka, kaambo takonzha kulikaka lwakwe mwini." ¹⁴ Kubazhibalusha shintu sheshi. U bashimwinine a bushu bwa Leza batazwangani ku mazwi; chiina impindu alimwi chilazonauna bulyo bapupulala. ¹⁵ Amusoleke kulizeeka kwa Leza u koya musale, musebezhi wiina kaambo kamuyazha insoni, wezo uyiisha chakushinizha izwi lya lushinizho. ¹⁶ Tantamuka ku bantu babo batuka Leza baamba sha bulyo, checho chitantamuna bantu kuhwa kwa Leza. ¹⁷ Kwaamba kwabo kulazandaala u koya bulwazhi buzambukila. A kati kabo mbuba Himenayasi u Filetasi, ¹⁸ babo bakamuhwa munzhila ya bululami. Bakaamba ati bubuke bwa bafwu bwakachitika kale, amana bakanyonganya lushomo lwa bamwi. ¹⁹ Nikuba bobo, intalisho njaakabika Leza teekonzha kuzungaana pe. Kulilembelwe bolya: "Mwami ulibezhi babo bakwe" alimwi "babo babanda inzhina lya Mwami balyeelele kuchileka kuchita shitali sha bululami." ²⁰ Mung'anda ya muntu muhubi tashili bulyo shintu sha ngoludi u siliva shilimo pe. Muli u shintu sha chisamu alimwi u sha bulongo. Aali sheshi shimwi tashisebezhewa sebezhewa bulyo, alimwi shimwi nsha chisebezhe sebezhe kufwumbwa bulyo. ²¹ Naakuti muntu walisalazha lwakwe mwini kuhwa shintu sha bulyo, ati waba chintu chikwete bulemu. Ati weelela, kuba chisebezho ku shimatwanga akwe, kuba chisebezho ku milimo yoonse mibotu. ²² Sosoloka ku michito ya bukubushi ya shibi. Kapula sha bululami, lushomo, lufwuno, alimwi u luumuno kuli babo bawompolola ezhina lya Mwami kuhwa ku monzo usalala. ²³ Pele bukake bulimbushi alimwi u mibuzho ina mbwiibele. Ulizhi kwaamba ati shilazhala kuzwangaana. ²⁴ Mbuuli musebezhi wa Mwami tweelele kuzwangaana. Pele ulyeelele kuba mubonhu kuli boonse, kulozha kuyiisha, alimwi shichamba, ²⁵ kuchindulula bamwi mu bubonhu monzo. Kaambo Leza ulakakonzha kubapa chiindi chakuleka kuchita shibiyabi kwaamba bakazhibe lushinizho lwa bwini. ²⁶ Kwaamba bakalozhe kuzhokoloka alimwi u ku kuhwa kukooze ka shaatani, naakamana kubakwasha u kubachita ati bachilile luzando lwakwe.