¹ Aza makani meni meni: Naakuti umwi ulazanda kuba mulangilizhi, wezo ati wasala mulimo mubotu. ² U bobo mulangilizhi ulyeelele kuba muntu wiina kampenda. Ulyeelele kutwala mukaintu womwi. Ulyeelele kuba u shitikile mu mizeezo, ulilemeka, alimwi mubonhu shichamba. Ulozha kuyiisha. ³ Teelele kuba chakolwa wa waini, shinkondo, pele mubonhu, shiluumuno. Teelele kuba shimufwuna mali. ⁴ Ulyeelele kubamba bang'anda yakwe kabotu, alimwi ulyeelele kubona kwaamba ati banakwe balamuteelela u kumulemeka mu shiyanza shoonse. ⁵ Naakuti mulombwana wezo tachizhi kubamba kabotu bang'anda yakwe mwini, mbubuti mbwaakalozha kubambilila chikombelo chaka Leza? ⁶ Teelele kuba mweenzu mu lushomo, kwaamba atabi naakalisumpula amana ulawa bwakawa shaatani. ⁷ Aze ulyeelele kuba wiina kampenda kuli babo balikunze, kwaamba ati atabi naaya kusampuka u kuwila mukonze kaka shaatani. ⁸ Mbubona bobo, bama dikoni balyeelele kuba bantu bakwete bulemu, kutali bashimukanwa. Tabeelele kunwa waini nikuba kuzandisha mali. ⁹ Balyeelele kubambilila lushomo u manjezheezha mabotu. ¹⁰ Balyeelele kusunkwa chakutaanguna, bamana kusunkwa basebeze bayanwa kwaamba bayina kampenda. ¹¹ Mbubona bobo, benabo balyeelele kuba beni beni, batali bahwizhi, pele babonhu alimwi bashomeka mushintu shoonse. ¹² Bama dikoni bakwate bulyo mukaintu womwi. Balyeelele kubamba kabotu banabo alimwi u bang'anda yabo. ¹³ Babo balo basebeza kabotu mulimo balalibambila lwabo beni bubotu alimwi u bushomeshi bukando mu lushomo lolo luli mwa Kilisito Jeso. ¹⁴ Bolya mbundamulembela shintu sheshi, Ume ndazandisha kwiza nkumubele chakufwambaana. ¹⁵ Pele naakuti ndachelwa kuzhiza, ndamulembela kwaamba ati muzhibe bwakulibamba lwenu nubeni mu bang'anda yaka Leza, chalo nchichikombelo chaka Leza upona, musemu u kwatilile lushinizho. ¹⁶ Toonse tulahuminana kwaamba ati maseseke a buna leza makandosha: "Wakalizubulula mu mubili, wakatondezhewa ati uliluleme u moza, wakabonwa u baangelo, wakakambaukwa mashi woonse, wakashomwa mu luundu loonse, alimwi wakatolwa kwizeulu mu bulemu."