¹ U bobo, chakutaanguna, ndakumbila chakulichesha, kwiita mu kukomba, kubakumbilila, alimwi u kupa kulumba kuchitwe ku bantu boonse, ² mukombele bami alimwi u babo bali mu bulelo, kwaamba tulozhe kupona mu luumuno alimwi u bumi bubotu mubuna leza alimwi u bulemu. ³ Chechi nchibotu alimwi chilamubotela Leza mufwutuli wesu. ⁴ Ulazanda kwaamba ati muntu woonse a kafwutulwe alimwi a kakwate luzhibo lwa bwini. ⁵ Kaambo kuli bulyo Leza womwi, alimwi kuli bulyo muzhiminizhi womwi wa Leza alimwi u bantu, muntu Kilisito Jeso. ⁶ Wakalyaaba lwakwe mwini kuli boonse, kuba bumboni a chiindi cheelele. ⁷ Kaambo ka chechi Ume ndakasalwa kuba mwiiyi alimwi u kuba mutumwa--ndamushimwina lushinizho, Ume nshimuchengi--alimwi mwiiyi wa bahwamashi mu lushomo alimwi u bwini. ⁸ Inzho, Ume ndazanda balombwana mu masena woonse bakombe alimwi batandabike matashi a salala chakubula bukali nikuba kukazhanya. ⁹ Muzhila yomwi njiyona, bakaintu balyeelele kusama shakusama shili kabotu, shabulemu alimwi u kulichindulula lwabo beni, kutali mususu mapese naaba a goludi naaba shisani shamuulo mukando, ¹⁰ pele chalo cheelela mukaintu wezo u kanana shabuna leza kwiita mu milimo mibotu. ¹¹ Mukaintu ulyeelele kwiiya buliinzile alimwi chakulibonzha. ¹² Ume nshihwumizha mukaintu kuyiisha naaba kukwata insana a mulombwana, pele apone mukuliinza ¹³ Kaambo Adamu nguwakataanguna kulengwa, kumane Eva. ¹⁴ Adamu wiina naakachengwa, pele mukaintu nguwakachengwa alimwi nguwakasotoka mulawo. ¹⁵ Nikuba bobo, ulakafwutulwa kwiita mukuzhala bana, naakuti bakalilila mu lushomo u lufwuno alimwi u kulisalazha chakulibonzha.