¹ Paulu, mutumwa waka Kilisito Jeso kwiita mu malailile aka Leza mufwutuli wesu alimwi u Kilisito Jeso bulangizhi bwesu, ² kwa Timoti, mwana mwini mwini mu lushomo: Luse, bubonhu monzo, alimwi u luumuno kuhwa kwa Leza Ushesu alimwi Kilisito Jeso Mwami wesu. ³ Mbubona mbundakakushimwina kuchita lelya indakaakuya ku Masedoniya, kwaamba u kale mu Efeso kwaamba ati u kubashimwina bantu kwaamba ati batabi nibatalika kuyiisha injiisho shimwi. ⁴ Nikuba kwaamba babike mizeezo mutwaambo u twaano tumwi alimwi u mazhalane a teeli. Chechi chilaleta kukazhanya kubaala muzeezo waka Leza, wezo walo wa lushomo. ⁵ Inzho muzeezo wa malailile ndufwuno luhwa ku monzo usalala, kuhwa kumanjezheezha mabotu, alimwi u kuhwa ku lushomo lwini lwini. ⁶ Bantu bamwi bakamuhwa munzhila kuhwa ku shintu sheshi baya ku twaambo twiina mulimo. ⁷ Balazanda kuba bamaayi ba mulawo, pele tabateelelesha shesho nshibaamba nikuba checho nchibapandulula beni. ⁸ Pele tulizhi kwaamba ati mulawo mubotu naakuti umwi woosebezha bweelele. ⁹ Tulizhi, kwaamba ati mulawo wina niwakabikilwa bulyo muntu ululeme, pele ngwabalya basotoka mulawo u bantu bakazha, u bantu batashomi uba shishibi, u babo batasalali alimwi u basampaula, babo balo bayaya maushabo alimwi u manokwabo, u bayazhi, ¹⁰ u bantu bashimamambe, u babo boona u balombwana nokwabo, u babo beba bantu nokwabo kubatola mu buzhike, u babeshi, u bazhiminina twaambo twa bubeshi, alimwi kufwumbwa wezo u kazha injiisho sha bwini. ¹¹ Koku kulaililwa kwa bulemu bwa mulumbe waka Leza mulongezhe wezo walo Ume ngundakapewa. ¹² Ndalumba Kilisito Jeso Mwami wesu. Wakanzumya nzumya, wakambona kuba mushomi, alimwi wakansala kumusebezela mulimo. ¹³ Ndakaakuli musampauzhi, shikupenzha, alimwi muntu shinkondo, Pele ndakatambula luse kaambo ndakaakucita mukutazhiba u mukutashoma ¹⁴ Alimwi luse lwa Mwami wesu lwakahula mu lushomo u lufwuno luli mwa Kilisito Jeso. ¹⁵ Wezu mulumbe ngwa bwini alimwi uleelela u kutambulika, kwaamba ati Kilisito Jeso wakazhiza mu luundu kwiza kufwutula ba shishibi, amana ndime shishibi ubaala. ¹⁶ Pele u kaambo kachechi Ume ndakayana luse, kwaamba ati u mwangu, ndi shishibi, kwaamba Kilisito Jeso ansebezhe kuba chitondezho cha bu shichamba. Wakachita chechi kuba chitondezho kuli babo bati bakashome mwakwe ku bumi butamana. ¹⁷ Inzho ku mwami wa shikwense, u tafwi, u tabonwa, Leza womwi nana, a kube insana u bulemu shikwense u shikwense. Ameni. ¹⁸ Inzho ndakupa malailile aza, Timoti, mwanangu, kwiingayina u mashinshime ako a kale kale, a kuti ulyeelele kulwa inkondo imbotu, ¹⁹ kukwatisha ku lushomo alimwi u mizeezo mibotu. Mukukaka chechi, bamwi inshomo shabo shakaloba. ²⁰ Bali bolya mbuba Himeniyasi alimwi u Alekizanda, wezo Ume ngundakakusha kuhwa kwa Satani kwaamba ati bayiishiwe kuleka kusampaula.