¹ Mukumaninzha, nubakwesu, tulamukumbila alimwi u kumusumpula mu Mwami Jeso. Mbubona mbumwakashimwinwa mbuli mbumweelele kupona alimwi u kubotezha Leza, mbubona munzhila yezhi mulyeelele kupona, kwaamba ati muchite bobo chakubaazha. ² Kaambo mulyeezhi malailile ngutwakamupa kwiita mu Mwami Jeso. ³ Kaambo koku nkukuzanda kwa Leza, kulisalazha kwenu, kwaamba mukuhwe ku bumambe, ⁴ umwi umwi wenu ulizhi mbwaayelele kweendelezha mubili wakwe mukulisalazha alimwi u bulemu, ⁵ kutali kwiita mukulikumbuzha (u koya bahwamashi babo balo batamwizhi Leza). ⁶ Kutabi muntu u bishizha munina mu kaambo kaka.Mwami ulazhololola chibezyo mushintu sheshi shoonse, mbuli mbutwakamuchenjezhezha limwi alimwi u kumupa bumboni. ⁷ Leza wiina naakatoompolwela kubusofwaazhi, pele kubusalazhi. ⁸ U bobo, wezo walo u kaka chechi takakili bantu pe, ulakakila Leza, wezo upa Moza Usalala kwenu. ⁹ Inzho ku makani a lufwuno, takuzandika naabani kumulembela umwe, kaambo umwe lwenu nubeni mwakayiishiwa kwa Leza mbumulyelele kufwunana umwi umwi. ¹⁰ Chini chini, mulachita bobo kuli boonse ba bunina babo bali mu Masedoniya. Pele tulamuzumya zumya, nubakwesu, kwaamba mutolelele kuchita bobo chakubaazha. ¹¹ Aswe tulamuzumya zumya kwaamba muzandishe kupona mu luumuno, a mukwatishe kuli shesho nshimweelele kuchita, a musebeze u matashi enu nubeni, mbubona mbutwakamushimwina, ¹² kwaamba mweende bululeme akati ka bantu bakunze alimwi kwaamba mutabi batwanga ku muntu naabani. ¹³ Inzho tulazanda ati mwaanzhibe aza, nubakwenu, a babo bakafwa, kwaamba mutabi nimukaausa u koya bamwi, babo bayina bulangizhi. ¹⁴ Naakuti uswe tulashoma kwaamba ati Jeso wakafwa alimwi wakabuka, aze mbubona Leza ulakabaleta antoomwi u Jeso babo bakafwila mwakwe. ¹⁵ Kuli chechi tulaamba kwenu kwiita mwizwi lya Mwami, kwaamba ati uswe nituchilanga, uswe nitwakashaala ku kuzhiza kwa Mwami, twiina nitukakababeelela babo bakataanguna kufwa. ¹⁶ Kaambo Mwami lwakwe mwini u lakaseluka kuhwa kwizeulu. Ulakazhiza bupozomoka, iizwi lya angelo mukando, alimwi iimpeta yaka Leza, amana bakafwila mwa Kilisito balakataanguna kubuka. ¹⁷ Kwamana uswe nituchilanga, nitusheele nituchipona, tulakasangana abo mu makumbi kuswaanganya Mwami mu mulenga lenga. Munzhila yezhi tulakakala u Mwami kwa lyoonse. ¹⁸ U bobo a muumbulizhanye umwi u mweenzhiina ku mazwi aza.