¹ Inzho ku makani a mazuba alimwi u shiindi, nubakwesu, takuzandika kumulembela pe. ² Kaambo lwenu nubeni mulizhi kabotu kabotu kwaamba ati Mwami ulakazhiza u koya mutewu chiindi cha mashiku. ³ Lelyo bamwi nibaamba ati, "Kuli luumuno a tuliibe," ngoona u kuzonauka nikukakazhiza aali mbabo. Chilakaba u koya kuchisa kwa mukaintu u mishi. Kwiina mbubaya kuyana matiilo pe. ⁴ Pele umwe, nubakwesu, tamuli mu mushinze kwaamba ati buzuba bobu bukamuzooshe u koya mutewu. ⁵ Kaambo noonse muli bana ba mumuni alimwi muli bana ba muunza. Tamuli bana ba mashiku naa bana ba mushinze. ⁶ U bobo, tutabi nitoona u koya bamwi mbubachita. Pele, a tupakamane amana tube beni beni. ⁷ Kaambo bantu baloona mashiku tabezhi chichitika alimwi bantu mashiku nibakolwa. ⁸ Pele bobo mbutuli bantu ba muunza, tulyeelele kuba beni beni twamana tusame lushomo u lufwuno chibe chisamwa chaachamba, alimwi u bulindizhi bwa lufwutuko kuba chisamwa chaku mutwi. ⁹ Leza wiina naakatusala kuba bazhilwa bukali, pele kuya kuyana lufwutuko kwiita mu Mwami wesu Jeso Kilisito, ¹⁰ wezo wakatufwila kwaamba ati, nikukaba kuti tulalanga naa bafwile, tukapone aze antoomwi. ¹¹ U bobo a muumbulizhanye umwi u mweenzhiina alimwi u kulibumba antoomwi, mbubona bolya mbumuchita kale. ¹² Twamukumbila chini chini, nubakwesu, kamubazhibaluka babo balo basebeza akati kenu alimwi u babo bamulela mu Mwami u bamuyiisha, ¹³ mwamana mubalemeke chibaala mulufwuno u kaambo ka milimo yabo. Amube u luumuno akati kenu. ¹⁴ Tulamutembaula, nubakwesu: Amubachenjezhe babo bakata, a mubazumye zumye bazhokela munshi, a mubayohwe bayina insana, amana muba bombele myonzo boonse. ¹⁵ Amubone kwaamba ati kwiina naaba womwi uzhola chibi ku chibi ku mweenzhiina. Pele, atukapule checho chibotu kuli umwi u mweenzhiina alimwi u kuli boonse. ¹⁶ Amubotelwe lyoonse. ¹⁷ Amukombe chakutaleka. ¹⁸ Muli shoonse a mupe kulumba. Kaambo koku nkukuzanda kwa Leza umwa Kilisito Jeso. ¹⁹ Mutabi nimuuzhima Moza. ²⁰ Mutabukazha bushinshimi. ²¹ Amushisoleke shoonse shintu. Amukwatishe kuli checho chibotu. ²² Amukuhwe ku bubiyabi boonse buli buti u buti. ²³ Leza wa luumuno a musalazhe chakumaninina. Moza wenu woonse, u bumi, alimwi u mubili ube bwiina kampenda kuya ku kuzhoka kwa Mwami wesu Jeso Kilisito. ²⁴ Mushomeshi nguwezo u kubanda uwe, wezo aze walo u chichita. ²⁵ Nubakwesu, kamutukombela aswe. ²⁶ Amubaazhe boonse bakwesu u kushontana kusalala. ²⁷ Ume ndamushimwina kwiita mu Mwami kwaamba lukalata lolu lubalwe ku bakwesu boonse. ²⁸ Luse lwa Mwami wesu Jeso Kilisito lube amwe.