¹ Kaambo amwe lwenu nubeni mulizhi, nu bakwesu, kwaamba ati kuzhiza kwesu nkumubele ka kutali kwa bulyo. ² Pele, mbubona mbumwizhi, nikuba kuti lwakaita twakapenga alimwi twakaushiwa insoni ku Filipu, twakaakushankile mwa Leza wesu kumwaambila mulumbe waka Leza kwiita mukukazhiwa. ³ Kaambo kulumba kwesu kakutahwi mu bulubizhi, naaba kuhwa mububiyabi, nikuba mukuchenga. ⁴ Nikuba bobo, mbubona mbutwakahumininwa u Leza kwaamba tupewe mulumbe, u bobo tulakambauka, kutali kubotezha bantu pe, pele kubotezha Leza. Walo inguwe u lingula myonzo yesu. ⁵ U bobo twiina nitwakazhiza u mazwi a kuliboshezha, mbubona mbumwizhi, nikuba kwaamba mazwi a kusoseka naa kuhwumba bushaachihwule mwangu--Leza ngu kamboni wesu. ⁶ Nikuba kukapula bulemu kuhwa ku bantu, nikuba kuhwa kwenu nikuba kuhwa ku bantu banji. ⁷ Twiina nitwakazanda kupewa sheelelo shesu u koya batumwa baka Kilisito. Nikuba bobo, twakalibonzha a kati kenu u koya mutumbu u mbulizha mwanakwe mwini. ⁸ Muzhila yezhi twakaakumufwini chini chini. Twakaakubotelelwe kwaabana amwe kutali bulyo mulumbe waka Leza pele uku bumi bwesu bwini. Kaambo mwakatufwuna chibaala. ⁹ Saa mulatelaika, nu bakwesu, mbutwakasebeza alimwi u buzumu zumu. Masiku u muunza twakaakusebeza kwaamba ati tutabi mukuli kuli umwe lelyo twaakumukambaukila mulumbe waka Leza. ¹⁰ Umwe muli bakamboni, antoomwi u Leza, busalali, bululami, alimwi u bwiina kampenda bulibambe bwesu akati kenu umwe nubashomi. ¹¹ Muzhila njiyona yezho mulizhi mbuli mbutwakaakubele kuli umwi umwi wenu, u koya ushabo alimwi bana, ¹² twakamuzumya zumya u kumuumbulizha alimwi u kumusumpula kweenda u kupona buponi bubotezha Leza, wezo u moompolola mukati mu bwami alimwi u bulemu bwakwe. ¹³ Ku kaambo kaka aswe tulalumba Leza lyoonse, kwaamba ati lelyo nimwatambula mulumbe wa Leza wezo ngumwakateelela kuhwa kwesu, mwakauhwumina kutali ukoya izwi lihwa ku muntu, pele ukoya mbulibele mubwini, izwi lyaka Leza, lelyo lyalo lisebeza mukati kenu umwe numwakashoma. ¹⁴ Umwe, nubakwesu, mwakachita mbubona mbuli mushikombelo shaka Leza shesho shili mu Judeya mwa Kilisito Jeso. Kaambo amwe mwakapenga mbubona kushintu shikonzhene kuhwa ku bashichishi nokwenu, mbubona mbuba kachitwa kuhwa kuba ¹⁵ Juda babo bakayaya Mwami Jeso alimwi u bashinshimi, alimwi mbubona mbuba katutanda. Balo tababotezha Leza. Pele, balo bayina muntu ngubateelela. ¹⁶ Amana balatukasha kukambauka kubahwamashi kwaamba bakafwutulwe. Mbuchibele mbubolya lyoonse balalilundikila shibi shabo kubaala. Pele bukali bulakabawila kumamanino. ¹⁷ Pele uswe, nubakwesu, twakaakwaandeene kuhwa kwenu kwa kaindi bulyo kashoonto, ku mubili kutali ku monzo. Twakakuzandisha chini chini, chibaala, kubona mashu enu. ¹⁸ Twakaakuzandisha kwiza nkumubele---chini chini Ume, ndi Paulu, kushiindi shinji shinji---pele shatani wakaita akati. ¹⁹ Kaambo kushoma kwesu, naa lutangalo, naa mushini wakulisumpula a bushu bwa Mwami Jeso a kazhoka? Saa tamuli umwe? ²⁰ Kaambo umwe muli bulemu alimwi u lutangalo lwesu.