¹ Udi katuluh yeru, naan pesta kaaraiyen ulun Yahudi,Yesus mamai ma Yerusalem. ² hang Yerusalem, riet Manawang Gerbang Domba naan ugang amun basa Iberani naantuh Betesda, nelang naan dime lalaya. ³ hang lalaya-lalaya yeru rama ulun mang kading nelang bapanyakit: ulun pehe, ulun kepa, andri ulun lum puh here ngan drei ranu ugang yeru miumak. ⁴ Daya naan katika ni malekat Tuhan minau ma wuang ugang palus ngagerek ranuni. Hie ulun sa bada hulu mitun ma wuang ugang tawuk ranu bagalumang, hanye sagar ware teka kawan penyakit sa naaretni. ⁵ Hang yeru, pada naan erang kaulun haut 38 taun ngaret panyakitni. ⁶ Dami Yesus kadi nung ulun yeru nelang karasa neu lawahni hanye ngaret panyakitni, Yesus balalu nunti ma hanye,"Inun hanyu sini nasamare pada?" ⁷ Balalu hanye nuing, "Tuan, tawuk ranu ugang bagalu mang pauweng ulun ngampinau aku, dami aku ikair ngunu minau haut naan ulun lain nahuluan aku." ⁸ Balalu Yesus kaeau ma hanye,"Mindri! Enat tilamnu palus takia." ⁹ Tawuk yeru jua, ulun yeru ware, hanye ngenat tilamni palus tulak. Kode andrau yeru pas andrau Sabat. ¹⁰ Daya yeru, kawan ulun Yahudi kaeau ma ulun sa haut nasamare yeru,"Taati andrau Sabat, hanyu paiyuh ngenat tilamnu." ¹¹ Bulu tuingni,"Ulun yeru sa haut nyamare aku, Hanye kaeau ma aku, Enat tilamnu nelang palus takia." ¹² Here nunti ma hanye, "Hie sa uluni kaeau ma hanyu, Enat tilamnu palus takialeh." ¹³ Kode ulun sa haut nasamare yeru puang kataru hie sa haut nyamare hanye, daya Yesus haut basampur ulun rama palus tulak nanan uneng yeru. ¹⁴ Udi yeru , Yesus panalu lagi andri ulun sa haut nasamare Ni hang Lewu Sumbayang nelang kaeau ma hanye, "Rengei eau Ku, hanyu haut ware. Kode ada ngulah kahalaen lagi ngampan puang timul sa bangat teka isa haut!" ¹⁵ Ulun yeru huni tulak naba kawan ulun Yahudi, hanye nyarita ma here neu Yesus sa haut nyamare hanye. ¹⁶ Daya yeru,kawan ulun Yahudi ngakasah Yesus, daya Hanye haut ngaraja katuluh yiru hang andrau Sabat. ¹⁷ Kode Yesus kaeau ma here,"Hampe taati AmahKu magun bagawi, daya yeru Aku pada tatap bagawi." ¹⁸ Daya tuingan yeru kawan ulun Yahudi bausaha tatuu ngunu munu Yesus, puang daya ekat malangar andrau Sabat, pidiwi daya Hanye ngantuh Alatalla nyalah AmahNi sa aratini Hanye nyansa meh tenga Ni andri Alatalla. Kuasa Alatalla baya Yesus ¹⁹ Tuing Yesus ma here, "Tarung tuu Aku kaeau ma naun, Anak puang tau ngaraja pagawian Amah teka tenga Ni raerai amun Hanye puang kadinung sa nagawi AmahNi,daya inun sa nagawi Amah yiru pada sa nagawi Anak Ni. ²⁰ Daya Amah ngalelu Anak nelang nantarang hampi Anak katuluh isa haut na gawi dayaNi, nelang Hanye sagar nantarang ma Anak Ni katuluh pagawian sa tuu bangat hante ngampan naun ngawauh. ²¹ Daya kala, Amah haut nyamelum ulun matei palus ngami pamelum ma here, kalahie pada Anak ngami pamelum ma here sa katujuenNi. ²² Amah puang ngampihala hie-hie, kode Hanye haut ngami kuasa ngampihala yeru ma AnakNi, ²³ ngampan katuluh ulun pada hurumat ma Anak, sameh kala here mahurumat Amah. Ulun isa puang mahurumat Anak, samehleh andri ulun isa puang mahurumat Amah sahaut ngutus Hanye. ²⁴ Sakapinuuni Aku iwara ma naun, hie sa haut karengei papaneranKu nelang parisaya ma Hanye sangutus Aku hanye haut naan hang wuang pawelum sakalalawah, nelang puang sagar masuk ma wuang penghakiman daya hanye haut miidar teka pampatei ma pamelum sakalalawah. ²⁵ Andri kapinuuni pada Aku kaeau ma hanyu, wayahni sagar hawi nelang taati haut hawi, die kawan ulun matei sagar karengei lengan Anak Alatalla, jari basing sakare ngei here sagar welum. ²⁶ Daya nyalah Amah sa kaampun welum hang wuang tengaNi, kalahie pada Hanye ngami ma Anakni ,welum hang wuang tengaNi raerai, ²⁷ Amah pada ngami kuasa ma Anakni umak malaksana neu penghakiman yeru daya Hanye anak Murunsia. ²⁸ Ada nakawauh neu ala yena daya wayahni kai hampe, tawuk yeru katuluh ulun sa hang wuang tane sagar karengei lenganNi. ²⁹ balalu here kaluar, welum mulek ma basing kawan here maeh ulah gawini. Basing sa puang maeh nasamelum pada kode nuju panghakiman. ³⁰ Aku puang tau inun- inun amun teka tenga Ku raerai, daya Aku jari hakim yeru mamutusni tuu-tuu adil daya kaputusan yeru puang teka kabahumenKu raeerai, kode teka Hanye sa marentah Aku." Piwaraan neu pihawian Yesus yeru teka Alatala. ³¹ "Amun Aku iwara neu tenga Ku raerai, yiru Aku tau ipusu. ³² Kode amun naan ulun lain iwara neu Aku yena, nelang aku karasa piwaraan Ni neu aku yeru tuuni. ³³ Naun haut nunyu ulun naba hi Yohanes, balalu hanye haut iwara andri katantuuni. ³⁴ Kode piwaraan sa haut natarime ku puang teka murunsia. Aku iwara neu hal yena ngampan naun kaiyuh kasalamaten. ³⁵ Hi Yohanes yeru nyalah sum'mu sa maraai, balalu naun sini irarami erang itus ai hang wuang sahayani. ³⁶ Kode, piwaraan sa naan hang Aku diwi hanteni teka piwaraan wat Yohanes. Daya pigawian sa nasarah Ammah ma Aku ngampan nasanuputKu, hanyeyeru kawan pigawian sa ganyah nakaraja ku taati, neu Aku sa nahuyu daya Alatalla AmahKu. ³⁷ Nelang hi Amah sa haut nunyu Aku ru haut ngami kasaksian neu Aku yena. Kode naun huan suah karengei lengan Ni atawa kadi nung wariangut- Ni. ³⁸ Andri kawan lengan-Ni puang muneng hang atei naun, daya naun puang parisaya ma Aku sa haut naparentah-Ni. Naun haut mambasa neu Surat Brasis, daya pina naun dami haut mambasa bulu naun kaiyuh pamemelum sa kalalawah; padahal hang wuang Surat Barasis jeru naan sarita neu Aku, ⁴⁰ kode naun puang hawi hampi Aku ngampan naun kataru bulu kaiyuh pamelum yeru. ⁴¹ Pihante Ku puang teka murunsia. ⁴² Kode Aku kataru naun, daya puang uweng sinta Alatalla muneng baya naun. ⁴³ Aku hawi hg wuang ngaran AmahKu, kode naun puang narime Aku.Kode mun ulun lain sa hawi nginsing ngaran here jua naun narime tatuu. ⁴⁴ Kala awe naun tau parisaya, daya naun narime tawat hurumat teka sasameh murunsia,kode puang ngantara teka Alatalla sa Bakuasa. ⁴⁵ Ada naun ngakira Aku hawi sagar ngampihala naun hang dahapan AmahKu; satau tau ngampihala naun hi Musa, daya hanye sakaharapen naun. ⁴⁶ Amun naun harap ma hi Musa, mustini naun harapa pada ma Aku, daya hanyu haut nyarita neu Aku. ⁴⁷ Kode amun naun puang harap sahaut natulis daya Musa, kala awe naun tau harap pada neu inun sa natahampeKu?"