¹ Tawuk Tuhan Yesus karasa kawan ulun Farisi haut karengei Hanye haut bahasil mambaptis nelang rama muridNi teka hi Yohanes. ² Sabujurni samambaptis ru kawan muridNi puang sa Yesus, ³ Hanye tulak nanan Yudea mulek lagi ma Galilea. ⁴ Wanguni hanye paiyuh ang mitah Samaria. ⁵ Balalu Yesus hampe tumpuk bangaran Sikhar, riet tane Yakup sa haut lawah na amini ma anakni, ngarani hi Yusuf. ⁶ Hang yaru naan ugang Yakup, daya pakiaan lawit Yesus kauyuhan, hanye bulu tarie maharung hang iring sumur. Tawuk yeru kakira pukul enem. ⁷ Bulu hawi erang kaulun wawei Samaria kai nyauk ranu. Yesus kaeau ma hamye, "Awat ami Aku ranu." ⁸ Daya kawan muridni haut tulak ma tumpuk lepuh midi panguta. ⁹ Wawei Samaria kaeau ma Yesus,"Kala awe Hanyu, ulun Yahudi, laku ranu uut ma aku wawei Samaria? " Daya ulun Yahudi puang paman tane andri ulun Samaria. ¹⁰ Yesus nuing palus kaeau ma hanye" Amun hanyu karasa neu karunia Alatalla nelang kataru hie isa kaeau ma hanyu, 'Ami Aku ranu uut', hanyu pasti ngunu laku ma Hanye, pasti Hanye sagar ngami ma hanyu ranu welum." ¹¹ Eau wawei yeru ma Hanye,''Tuan, Hanyu ri puang uweng gayung daya ugang yena tuu lalem, teka awe Hanyu sagar kiyuh ranu welum yeru? ¹² Inun sa Hanyu na tamam teka datu kami hi Yakup, daya hanye sa haut ngami sumur yena ma kami, nelang hanye haut nguut ranu teka ugang yena andri kawan anak tukui baya kawan satua samelumanni?" ¹³ Balalu tuing Yesus palus kaeau ma hanye, "Katuluh ulun sa nguut ranu teka yena sagar malah lagi, ¹⁴ Kode mun hanye nggut ranu sa amian Ku hanye puang sagar malah lagi: Daya ranu sa naamiKu yeru sagar jari ranu welum hang wuang tenga ni nelang palus kaluar hampe welum sakalalawah." ¹⁵ Balalu wawei yeru kaeau Yesus, "Amun kalahie Tuan, ami ma aku ranu yeru namapan aku puang sagar malah lagi, nelang aku puang mayena lepuh nyauk ranu." ¹⁶ Eau Yesus ma hanye, "Hulu hanyu mudi herau matueh upunu enei hanye maina." ¹⁷ Balalu tuing wawei yeru, "Aku puang uweng darangan." Eau Yesus ma hanye,"Hanyu bujur tawuk kaeau,'Aku puang badarangan'. ¹⁸ Daya hanyu suah naan dime darangan, nelang upu sa muneng baya hanya taati ru lain darangan nu. Hang wuang yena hanyu haut mangaku tarung tuu." ¹⁹ Eau wawei yeru ma Hanye kamulek,"Tuan,taati aku haut karasa, Hanyu na erang kauklun Nabi. ²⁰ Here datu kami nawat Alatalla hang gunung yena, kode bubuhan Nu kaeau hang Yerusalem uneng ulun nyammah Alatalla." ²¹ Yesus kaeau ma wawei yeru,"Parisayaleh anyu ma Aku, daya amun hampe katikani ulun nawat Alatalla puang hang gunung yena atawa hang Yerusalem . ²² Hanyu nyammah isa hanyu puang kataru, kode kami nyamah ma isa haut kami kataru, daya kasalamaten yeru hawi teka turunan ulun Yahudi. ²³ Taati kai hampe wayahni, kawan ulun sa nawat Alatalla Ammah hang wuang roh andri kapinuu atei; Daya yeru sa nalaku Ni amun nawat Hanye. ²⁴ Alatalla yeru Roh, hie sa nawat Hanye, takam nawat andri roh pada nelang andri kapinuu atei." ²⁵ Wawei yeru kaeau ma Hanye,"Aku karasa neu Mesias sagar hawi (Hanye sa naantuh Kristus). Tawuk Hanye hawi, ala katuluh yeru sagar wara ni ma kami." ²⁶ Tuing Yesus ma hanye," Ulun sa ganyah bapaner andri hanyu yena yeru Uluni."Hanyeru Aku." ²⁷ Tawuk Hanye ganyah bapaner anri wawei yeru kawan murid Ni hawi, here ngawauh daya kadinung Yesus anri wawei yeru. Kode puang sunah erang kaulun sa nunti ma Hanye, "Inun sa nantara Nu? atawa kaeau, "Wuah inun Hanyu bapaner anri hanye?" ²⁸ Udi hie wawei yeru nanan ember ranuni balalu tulak ma tumpuk here nelang kaeau ma ulun hang yaru. ²⁹ "Ayu! naun ninung naan Erangkaulun sahaut iwara ma aku neu katuluh ulah gawiku," Tau sa Hanye Mesias yiru?" ³⁰ Balalu ulun kaluar tumpuk tulak lepuh manalu Yesus. ³¹ Tawuk yiru kawan murid Ni nunyu Yesus nelang kaeau,"Rabi, ware Hanyu kuman." ³² Kode, Yesus kaeau ma here," Aku naan panguta sa puang naun kataru." ³³ Kawan murid Ni isa kapu isa bulu pakakeneh,"Tau sa naan ulun sa nginsing panguta ma Hanye na?" ³⁴ Yesus kaeau,"Panguta-Ku hanye yeru ngaraja inun sa jari kabahumen Ni sa marentah Aku ngampan nyanuput pigawian Ni. ³⁵ Naun haut kaeau,'Epat wulan lagi masa masi hampe? "Aku kaeau ma naun, uka mate nelang dinung kawan ume taun sa haut madintang ngunu nawasi. ³⁶ taati hanye haut masi marime upani nelang ngumpul wua parei balalu kawan sa masi anri sa muau tau sameh-sameh arai mihewu. ³⁷ Nyalah paribasa, Erang kaulu muau kawan lainni masi. ³⁸ Aku nunyu hanyu umak masi isa huan suah nagawi nu; here lain haut ngarajani bulu hanyu haut mira anri pagawian here." ³⁹ Tuu rama ulun teka tumpuk Samaria parisaya ma Yesus daya papaneran wawei yiru,sa haut ngami kesaksian ma here,"Hanye iwara katuluh inun sa haut nakarajaku." ⁴⁰ Dami kawan ulun Samaria haut hampe uneng Yesus, here balalu ilaku ma Hanye ngampan muneng baya here, balalu Yesus muneng hang yaru rueh andrau. ⁴¹ Batamah rama ulun lain lagi haut parisaya daya karengei papaneran teka Yesus. ⁴² Eau here ma wawei yeru ,"Puang daya panerannu kami jari parisaya, kode daya kami haut karengei, nelang kami karasa Hanyena tarungtuu Juru Selaamat dunia." Yesus nyamare Anak Pagawai Istana ⁴³ Dami nangkah 2 andrau, bulu Yesus nanan tumpuk Samaria nuju ma Galilea. ⁴⁴ Kapihuani, Yesus haut iwara neu erang kaulun nabi puang nahoromat daya ulun tumpuk natatni. ⁴⁵ Da- mi Yesus hampe Galilea, balalu kawan ulun Galilea nyamut manalu Hanye, daya here haut kadinung katuluh isa haut na karaja Yesus hang pesta Paskah hang Yerusalem daya here pada hawi ma pesta yeru. ⁴⁶ Daya yeru Yessus hawi lagi ma Kana, Galilea uneng Ni tawuk ngulah ranu jari anggur. Hang Kapernaum naan erang kaulun ia upu anak pegawai istana ganyah mekum. ⁴⁷ Tawuk pegawai istana yeru karengei neu pahawian Yesus teka Yudea ma Galilea, hanye bulu tulak lepuh naba, palus laku karawah ngampan Yesus hawi nyamare anakni, daya haut kai matei. ⁴⁸ Balalu Yesus kaeau ma hanye, "Paribasani hanyu puang kadinung kawan siri-siri andri kawan sa maka wawauh, hanyu pasti puang parisaya." ⁴⁹ Bulu paga wai istana kaeau pada,"Tuan, awat hawileh kapihuan anak ku matei." ⁵⁰ Yesus kaeau ma hanye, "Mudileh , anak nu welum!" Ulun yeru parisaya ma Yesus, balalu badadas tulak mudi. ⁵¹ Tawuk pagawai istana yiru hang wuang pakiaan nuju lewu, hanye panalu anri kawan walahni, here kaeau ia upunu ru welum. ⁵² Balalu Pagawai istana yiru nunti ma here jam pire kakira wangun anakku yiru nuku maeh. Balalu tu- ing here, "Hingka riwe kakira jam kapitu ekumni salenga wawai." ⁵³ Ammah ia upu yeru kaitung, pas tawuk yeru Yesus kaeau ma hanye, "Anaknu welum."Hingka yeru pagawai istana anri katu luh kalawargani balalu parisaya hampi Yesus. ⁵⁴ Yiru siri sa maka wawauh karueh sa natantarang Yesus dami haut mudi teka Yudea ma Galilea.