¹ Udi yeru, hi Paulus nanan Atena palus tulak ma Korintus. ² Paulus manalu ulun Yahudi ngaranni Akwila, pahawian teka Pontus, wa'u hawi teka Italia baya daranganni, Priskila, daya here Klaudius haut nunyu nanan Roma. Paulus hawi nunung here. ³ Daya here naan gawian isa sameh, Paulus muneng baya here pada daya gawian here hanye yeru ngulah tarup. ⁴ Pada, Paulus. pakat gurayang hang sinagoge hang andrau sabat palus ngayak ngajun ma kawan ulun -ulun Yahudi , Yunani nampan parisaya. ⁵ Kode, Dami Silas baya Timotius minau teka Makedonia, mulai ngabariran tenga anri tulus atei umak nampe lengan Alatalla, iwara andri tu'u ma ulun Yahudi neo Yesus yeru Raja Penyelamat. ⁶ Kode, Daya here santar nawan nelang ngahalaen Paulus, nelang ngebur pam'ma ni, nelang kaeau ma here," Ira nu naan hang ulu nu raerai! Aku barasis. Teka itati palus makalalawah, aku sagar tulak ma kawan here isa lain. ⁷ Udihiye, hanye nanan unengan yeru pada tulak ma lewu erang kaulun ngaranni Titius Yustus, erang kaulun puang Yahudi isa nyam'mah Alatalla, isa lewuni naan tuhi sinagoge. ⁸ Krispus, Pamimpin sinagoge, jari harap hang wuang Tuhan andri katuluh ulun isa naan hang wuang lewuni, pada wahai ulun Korintus isa karengei habar natahampe Paulus jari parisaya palus napidudus. ⁹ Balalu, Alatalla bapener andri Paulus hang anrau malem hang wuang isa paninungan,"ada gaer, kode tampalus nampe lengan Alatalla, ada sa muneng ¹⁰ Daya aku tatap sasameh hanyu, nelang puang uweng erang kaulun nganggu nelang niat murun daya rama ungkupKu hang tumpuk yena." ¹¹ Balalu, Paulus muneng hang yena salawah erang taun enem wulan, nelang nampe lengan Alatalla hang penah-penah here. ¹² Udihiye, Tawuk Galio jari prokonsol Akhaya, ulun-ulun Yahudi andri isa atei amuan nawan Paulus palus ngenei ma hadapan kurusi hukum. ¹³ Eau ni," Ulun yiti haut ngayak ngajun ulun rama nampan nyam'mah Alatalla, isa puang sameh Hukum Taurat." ¹⁴ Udihiye, Tawuk Paulus kai bapaner, Galio kaeau ma ulun-ulun Yahudi,"Amun yena hanye yeru isa nakadu kahalaen sa tamam, ari ulun Yahudi, aku patut nanggung aheng naun. ¹⁵ Kode, amun yena daya wangun antuhan nelang ngaran-ngaran nu raerai, urusleh raerai. Aku puang hakun mamutus hal yeru." ¹⁶ Balalu, Galio nyantulak here teka lewu pakara. ¹⁷ Udi yeru, here katuluh nyam'ma Sostenes, Paminpin Sinagoge, mupuk ngakasah hang wuang lewu pakara. Kode, Galio puang paduli. ¹⁸ Udi hiye, Paulus muneng papire andrau lagi bulu hanye iwara andri pulaksanai isa kaparsayaanni, palus bakayuh ma Siria, basameh Priskila baya Akwila. Hang Kengkrea, Paulus ngukur wulu ulu ni, daya hanye haut bahajat. ¹⁹ Balalu, here hampe Efesus baya Paulus nanan Priskila baya Akwila hang yaru, kode hanye ikule ma sinagoge palus iwaleng aheng um'ma ulun Yahudi. ²⁰ Tawuk here laku Paulus muneng labis lawah , Paulus puang hakun. ²¹ Udi kalayeru hanye iwara tulak andri here nelang kaeau," Aku sagar mulek lagi ma naun amun aheng Alatalla." Pada , hanye hawi bakapal teka Efesus. ²² Dami hanye minau hang Kaisarea, hanye palus nabe ma katuluh jemaat, balalu minau ma Antokhia. ²³ Udi muneng papire lawah hang yaru, hanye nanan unengan yeru palus ngalintar isa unengan ma unengan isa lain, hang wungku Galatia baya Frigia, nelang ngapikansing katuluh here sa um'ma. ²⁴ Hang tawuk yeru, naan ulun Yahudi bangaran Apolos, pahawian Aleksandria, hawi ma Efesus. Hanye erang kaulun isa pan'nai nelang kataru neo isi Surat Barasis. ²⁵ Ulun yiti haut kataru neo lalan Alatalla pada hanye penu aheng hang wuang roh. Hanye bapaner nelang manarang anri rasa penu atei neo Alatalla, kode hanye ekat kataru pidudusan Yohanes. ²⁶ Hanye mulai bapaner andri he'ei hang unengan sinagoge, kode tawuk Priskila andri Akwila nyanrengeini, here nyujut ma higa manarang ma hanye lalan Alatalla isa labih wuah. ²⁷ Udi yeru, Apolos ba aheng tulak ma Akhaya, pulak sana'i sameh parisaya narimeni nelang nulis ma kawan isa um'ma nyamut pihawianni. Dami hanye hampe, hanye wahai pangarawahen here isa daya lelu sinta Alatalla, sa haut jari perisaya. ²⁸ Daya hanye andri mahing nawan ulun-ulun Yahudi hang dahapan ulun rama, nelang nutui bukti teka Surat Barasis neo Kristus hanye yeru Yesus.